#/ Tui mBan tacei pato Tây Nguyên, meng ini tal thun 2020, mintri jalan mbak pajeng ba ieu pataom 115.066 tỷ đồng padang ngak jalan mbak bhum Tây Nguyên. Tui nan, mintri jalan mbak pajeng ba daok kuhria buh jien ngak pasiam veik jalan roya, jalan tỉnh hu radaih pajeng ba, nao mai rilo, abih di nyu nan lac dom jalan pambuak dom tỉnh dalam bhum saong pambuak bhum Tây Nguyên saong bhum Duyên Hải Nam Trung Bộ, jeng yau pambuak tal dom pabah mbang negar.

#/ Sở Y tế ban raya Hồ Chí Minh song kapul dunya phi lợi nhuận PATH bahrau tabiak mbaok dự án Menuac sia kayua boh hatai kajap. Meng bruk ngak ini, menuac sia di 4 quận dalam ban raya hu iek ruak song langyah brei saoh ka bruk tagok drah. Dalam 2 thun, meng bilan 6/2016 tal bilan 8/2018  Kapul PATH meda pambuak bruk song pasak y tế dự phòng ban raya HCM padang dom labik sàng lọc tagok darah di 16 phường di 4 quận nan lac : quận 8, quận 12, Gò Vấp song Thủ Đức.

# UB bhap bini tỉnh Bình Định barau peih harei pataom du lịch hè 2016. Ngan saong kadha “Quy Nhơn – Bình Định – về miền biển nhớ”, harei pataom du lịch hè 2016 rah tabiak meng ini tal harei 2/9 gam saong rilo bruk ilamu, thể thao praong. Ong Nguyễn Tuấn Thanh, phaok akaok  Ủy ban bhap bini tỉnh Bình Định brei thau: “Dom bruk ini piah pok meyaom dom ilamu, pren khang du lịch di tỉnh. Tapa nan ieu daa tuai damuai, ayut sahabat mai Bình Định piah duah thau, tapa nan rik daong yaih khan rup binguk, pandap panda saong bruk du lịch di Bình Định”.

 #/ Sang iek ruak đa khoa huyện Mộc Châu, tỉnh Sơn La lac sang iek ruak camereip di tỉnh Sơn La ngak hu bruk thụ tinh nhân tạo, tuk harei 21/6 meng bloh, sa anek kamar likei khang kadang hu ndik tapui tui jalan ngak ni. Jalan dong ni hu Thạc sĩ, Bác sĩ  Nguyễn Thị Thủy Hà - Phó Trưởng khoa Phụ sản dang akaok peih ngak song ngak hu ka saai Nguyễn Thị Quế daok di xã Nà Mường, huyện Mộc Châu.

#/ Peih ngak danak dak pakhang pasiam sang bac, tal bac saong sang công vụ ka gru pato, UB bhap bini tỉnh Thanh Hóa hu mbaoh tangin brei peih ngak đề án thun 2016 ka dom sang bac mầm non di 7 huyện kan kathaot daok dalam sarak 30A meng phun jien trái phiếu rajaei. Thun 2016, tỉnh Thanh Hóa hu daong labaih 250 tỷ đồng piah padang ngak 199 duk bac mầm non khang kajap ka 7 huyện bhum ceik.

#/ Tuk vak jiak di ni, dom boh sang daok jaik bãi rác xã Đông Thắng, huyện Cờ Đỏ, ban sit  Cần Thơ dok dang anak bruk hu rilo thur mun, mbau bruk trak meng dom ging am hareik, ngak kan kandah tal bruk mbang ngui dok dang yaok harei song pren yava di urang. Urak ni di labik ni hu 5 ging am hareik dok peih ngak luac harei melam. Dom ging am hareik ni di  Công ty Minh Thông, peih ngak tui jalan thủ công.

#/ Pandiak bhang dui atah daok ngak kan kandah praong dalam bruk pacang njom mbak di bhum hạ lưu dom pabah kraong tapen tasik di tỉnh Quảng Ngãi. Ralo labik, urang nông njauk kham merat duah jalan patrun patakik bruk njom mbak ngak kan kandah tal pala drak. Dom harei ini, urang nông di dom xã Nghĩa Hòa, huyện Tư Nghĩa saong xã Nghĩa Hà, ban Quảng Ngãi daok ramik taneh piah trun pajaih padai hè thu trà muộn.

Patui di ni dom khau tin dunya:

#/ Tui Tổng cục Du lịch Thái Lan, dalam 6 bilan akaok thun ni, TL taduan labaih 17 triệu tuai du lịch negar langiu, rilo jang 13% dut song tuk vak ni thun 2015, jien mek tame hu labaih 1 tỷ 300 triệu đola Mỹ, rilo jang 17%. Tuai damuai mai tal TL rilo meng lac TQ, Singapore song  Nhật Bản. Tổng cục Du lịch Thái Lan kuhria mboh dahlau lac, dalam quý 3 thun ni jien mek tame meng du lịch meda hu 900 triệu đola Mỹ. Top 5 negar nao du lịch TL hu Trung Quốc, Ma-lay-xia, Ôxtralia, Nhật Bản song Anh.

#/ Urang pan akaok gah dân chủ Thượng viện Mỹ Ha-ri Rết phản đối đề xuất di gah Cộng hòa ka kadung jien barau yaom 1,1 tỷ đôla piah pacang cakak dom bruk đe dọa meng vi-rút Zi-ka, takik jang ralo duk saong caong khin 1,9 tỷ đôla di tổng thống Ba-rắc Ô-ba-ma. Ông Ha-ri Rết ndom lac, ini oh lac sa jalan ngak siam piah pacang vi-rút nguy hiểm yau Zika. Dalam tuk nan, urang brei panuac di nhà trắng Giót Ơ-nét ndom lac, bruk ini di gah cộng hòa ba tabiak suai jang 4 bilan saong kurang tal jaik sa tỷ đô la duk saong dom hagait bo dom chuyên gia y tế mboh lac cần thiết piah pacang cakak vi-rút Zi-ka”

#/ Ngoại trưởng Thổ Nhĩ Kỳ Mê-lút Ca-vu-sô-glu (Mevlut Cavusoglu) ndom lac, piah pasiam veik talei rohim song Ixraen daok iek tui dom bruk ngak di  Ixraen. Tui ông Ca-vu-sô-glu, dom mbang ginum biai di 2 gah dok rah tabiak. Jalan ngak di Thổ Nhĩ Kỳ biak mbauan lagaih song ong cong khin gah Ixraen hu panuac javap chalơi dalam mbang taom gaok di 2 gah anak tal./.