1# UBND tỉnh Phú Yên bharau tabiak adat brei padeih ngak Bến cá phường 6 (ban sit Tuy Hòa) kayua khut trak, oh khik hu siam mekre salamat tui adat. Tui jalan patagok đô thị saong tui bruk ba tabiak di gah kaya ikan tal thun 2025, pamaong tal thun 2030, Bến cá phường 6 oh daok tra. Anak meta raidiuk urang ngak ikan meda gaok rilo kan kandah, tỉnh Phú Yên  hu tacei pato ban sit Tuy Hòa jak ba urang ngak ikan saong dom sang, dom doanh nghiệp ngak mbang gah kaya ikan di bến cá phường tame cảng cá Đông Tác piah ngak mbang. 

          2 # Tui Chi cục Kiểm lâm bhum  IV, urak ni dom tỉnh Tây Nguyên (Đắk Lắk, Gia Lai, Kon Tum, Đắk Nông, Lâm Đồng) dok dalam tuk tabung glong  bilan thu lagu, mbuan si ba tal khuah glai. Kayua yau nan ye, dom puk palei hu glai peih bruk tut angan tame sinya pacang caga khuah glai, khik caga glai song yaok pluh ribau boh sang dok jiak glai, tacei pato mik va  am hamu puh njauk  ilamu kỹ thuật piah oh caik ka pui khuah pambak tame glai.

3 #Dom thun jaik ini, dom sang iek ruak dalam tỉnh Đắk Lắk hu buh jien ramik pasiam, blei jamriak bahrau piah iek ruak ka bhap bini dalam tỉnh saong khu vực.  Lingiu jien di kadung jien karja, dom thun tapa, tỉnh jeng hu ieu pataom xã hội hóa, blei rilo jamriak iek ruak bahrau yau ye máy siêu âm, điện tim, blac raih nội soi, blac raih cấp cứu, chạy thận nhân tạo ka sang iek ruak tuyến huyện piah trun takik bruk ba urang ruak tagok gah angaok, dui katut panak tukvak iek ruak.

        4  # Urak ni, yaom pabui di dom  công ty, dom labik rong prong di  Đồng Nai  harei 10-4 lac meng  35.500-37.500 đồng/kg, tagok labaih  8 ribau đồng/kg dut song adit dahlau. Tui dom urang blei, makna ba tal yaom pabui tagok glaong kayua tapon pabui trun khang, kayua hadei di sa tuk vak khat trak, dom sang rong jak gauk patrun patakik tapon rong. Urak ni pabui pablei tabiak darak pasa rilo meng lac di dom công ty rong glang prong. 

 5# Sở ngak nong saong patagok palei pala tỉnh Cà Mau daok jhul khang bruk pathau khan, jak ba bhap bini ngak tui bruk khik kajap an toàn vệ sinh thực phẩm dalam gah pala drak. Tui nan, Chi cục Pala drak saong khik caga phun pala tỉnh Cà Mau peih bruk pato pasram dom sang bhap bini pacang caga jit palai kaik tui jalan IPM, tapa nan takik pandar dom janih jru khik caga phun pala piah trun takik jien buh tame ngak saong piah khik caga thiên địch hu kein ka mblang hamu.

          Patui di ni dom khau tin dunya:

6 # Mỹ daok peih bruk padang ngak sa binah dalam daneing tapen negar pacang cakak song  Mê-hi-cô di  bhum San-ta Tê-rê-sa (Santa Teresa), bang Niu Mê-hi-cô ( New Mexico). Sa dalam dom sinya di karja Tổng thống Mỹ Đô-nan Trăm (Donald Trump) lac padang ngak sa daneing rah tui jalan tapen negar song Mê-hi-cô, yaom lac oh ka hu bruk pachreih tui meng  Quốc hội Mỹ atau  Mê-hi-cô KA jien padang ngak daneing ni  .

          7# Yaok 10 urang Thụy Sĩ ye hu 9 urang daok sahneng tal bruk takik cai pandar. Nan lac bruk hu thau meng mbang duah thau di công ty roh duah darak pasar GfK peih ngak tui panuac caong di gah khik ramik alam dunya (WWF). Bruk nan hu duah thau tapa labaih 1.000 menuac daok di dom bhum karei di gauk di Thụy Sĩ, tui nan, dalam yaok 10 urang Thụy Sĩ, ye hu 9 urang daok sahneng tal bruk takik pandar cai..

          8 # Tổng thống Iran Hát-xan Rô-ha-ni (Hassan Rohani) bahrau hu panuac lac, Iran meda hu jalan cagar veik khang meyah Mỹ tabiak truh  thỏa thuận hạt nhân hu mbaoh tangin di Viên negar Áo, song bruk cagar veik ni nyu tabiak truh bruk sahneng mboh di  Mỹ. Dalam panuac ndom puac hu rayo papar binguk tapak dalam harei  Công nghệ hạt nhân  negar, Tổng thống Rô-ha-ni ndom lac, Iran oh ngak suan  thỏa thuận hạt nhân min meyah  Mỹ tabiak truh  văn kiện, ye Mỹ biak aih oh./.  

                                                                   Hanipha/VOVTPHCM