1# Dom harei tapa, tuai mai tal Đà Lạt me-in bilan pandiak biak ralo, jeng lac tuk kol cò du lịch di Đà Lạt hu ralo. Labik halei jeng mboh dui ieu tuai, nduac tui tuai min pataom ralo di abih jeng lac di labik pasak. Ông Phan Tất Chí, Phó trưởng Công an ban sit Đà Lạt brei thau, meng hatai caong ramik pasiam bruk ini, jak ba saong ieu dom labik ngak mbang gah du lịch di Đà Lạt sanya oh tagok yaom, kateik greik tuai damuai, Công an ban sit Đà Lạt jeng daok kham merat patagok bruk pasang iek saong langyah.

          2 # Urak ni, dom janih boh kayau hu pasiu yau  Kruac bung klik hajao, cam sành, quýt… di  huyện Bắc Tân Uyên (Bình Dương) dak harei dak siam song hu patagok samu gauk. Lingiu di nan, Cục Sở hữu trí tuệ - Mintri Khoa học song  Công nghệ brei harak chứng nhận khik caga angan je kapul nyaom song brei adat pandar angan je kapul nyaom “Cam Bắc Tân Uyên” song  “kruac bung Bắc Tân Uyên” ba mai kein lagaih prong ka bruk patagok phun mbang boh hu  pasiu tui jalan khang kajap di Bình Dương.

3#  Hadei di sa tukvak iek ruak, urang ruak angan Nguyễn Thị Tư palei daok di Vĩnh Long, daok iek ruak cúm A H1N1 di sang iek ruak Đa khoa ban sit Cần Thơ hu tani tanat veik. Tui kuhria, urang ruak nan hu nao sang di adit tal.  Bác sĩ Nguyễn Văn Nghĩa – Phó Giám đốc bệnh viện Đa khoa TP Cần Thơ brei thau, dalam tukvak iek ruak ka urang jom ruak cúm AH1N1, sang iek ruak bhian tui iek saong ngak vệ sinh sát trùng dalam sang iek ruak, dom Khoa, Phòng, abih di nyu nan lac dom labik urang ruak bhian nao mai.

           4 # Labaih sa adit ni mai, yaom ikan padoc rong di  tỉnh Trà Vinh tagok jang 4.000 đồng/kg. Urak ni ikan padoc  janih  I (800gr tal 1kg/sa drei) hu urang blei di danao yaom meng  37.000 - 39.000 đồng/kg, tagok jang  5.000 - 6.000 đồng dut song bilan dahlau  song tagok jang  15.000 - 17.000 đồng/kg  dut song tuk vak ni thun dahlau. Tui yaom pablei ni, urang rong liba meng  6.000 - 8.000 đồng/kg ikan padoc thương phẩm. Ong Huỳnh Văn Thảo, Trưởng Phòng ngak nong song patagok palei pala  huyện Trà Cú hu panuac kakei urang nong dalam tỉnh jhui peih prong taneh piah nyaih bruk  cung vượt cầu, kayua urak ni, ikan padoc tok hu pablei dalam negar .

  5# Urak ini, tỉnh Tiền Giang daok tacei pato peih ngak siam bruk pandar dom cống đập dalam dự án thủy lợi Phú Thạnh – Phú Đông mek ia pruh ka jaik 3.000 ha taneh pala drak, dalam nan hu 730 ha taneh ngak padai 1 vụ, 1.540 ha palang, 679 ha bein phun mbang baoh. Karja dom palei jeng hu panuac kakei urang ngak nong trun pajaih njauk tui lịch thời vụ. Saong brei patagok bruk kuac mek gluh dalam kraong ribaong piah samar ba ia mai pruh ka dom janih phun pala

Patui di ni dom khau tin dunya

          6 # Bhap bini  I-rắc dok brei mboh duh hatai ka bruk sarau kadau hadei di mbang pilih ruah urang ka Quốc hội di bilan dahlau, saong caong lac  dom đảng phái chính trị meda padeih bruk cagar gauk song pambuak bruk song gauk piah padang veik taneh ia njauk mesruh metak palai pajoa trak. Dahlau di nan, harei  11  bilan 6, cảnh sát I-rắc chap hu  4 urang medhi lac pagam tal  bruk am pui khuah sa labik praong  caik phiếu bầu dio mbang bầu cử quốc hội.

 7# Hội đồng An toàn negar, sa jabat phi lợi nhuận di Mỹ bahrau pathau khan lac, yaok thun hu 37 uraniah di Mỹ metai kayua njauk sốc nhiệt dalam ô tô. 3 makna ngak ka uraniah metai kayua sốc nhiệt dalam ô tô di Mỹ lac: ka sa kayua amaik ame atau urang khik iek uranaih var klaak uraniah dalam radaih, ka 2 lac kayua uraniah eng drei ndik tame dalam radaih saon g ka klau lac kayua amaik ame atau urang khik iek uraniah caik uraniah dalam radaih, ba tal njauk sốc nhiệt, metai.

          8  # Yaom menyek tamo di angaok dara pasa dunya  harei  14/6 trun hasit, hu mong  lac mai meng bruk khai thác menyek tamo di Mỹ tagok tal tanut kỷ lục bahrau . Hu thau, di var peih pabah mbang pablei salih meng bloh, yaom menyek tamo Bờ-ren (Brent) lac 76,46 đô la Mỹ/sa thùng, trun  28 xen (cent), samu  0,4% dut song var kreih pabah mbang harei karoi . Dalam tuk nan, menyek  tamo Mỹ (WTI)  yaom  66,58 đô la Mỹ/thùng, trun  6 xen./.