1 # Piah pachreih urang taong ikan nao tasik tuk Tết Mậu Tuất 2018, Mentri Ngak nong saong patagok palei pala hu harak payua ka Ủy ban bhap bani dom tỉnh, bal tapen tasik ka bruk tui mong iek bruk ngak di dom sruh gilai taong mek ikan saong tangi rivang, pachreih urang taong ikan nao tabiak tasik. Urak ini lac tame bilan di ikan vụ Barak thun 2017-2018, taphia di nan lac tukvak kuhria caga pandap panda kaya ikan duh ka tukvak hadei Tết nguyên đán. Dalam tuk Tết Mậu Tuất 2018, ralo sruh gilai taong mek ikan hu tabiak tasik akaok thun bahrau, gam ngak kinh tế, gam hu mbaok pacang khik chủ quyền, an ninh pulao tasik di taneh aia. Gah Kiểm ngư meda nao gam haong urang taong ikan, pambuak haong dom jabat chức năng angaok tasik daong ba urang taong ikan hu saim mekre jak jeng.

2 # Hadei di dom harei padeih mbang tết, dom kapan tong chap ikan  di  tỉnh Trà Vinh daok tabiak tasik dalam chreih chrai cong hu sa  thun tong chap rilo ikan. Di Trà Vinh hu jiak 1 ribau 300 kapan dom janih daok tong chap kaya ikan di bhum tasik dalam nega, yaok thun mek hu meng  60 tal 70 ribau tấn kaya ikan dom janih.

3 # Tal ini, urangnong bal Cần Thơ hu trun pajaih labaih 83 ribau ha padai Đông Xuân 2017 – 2018. Urak ini angaok mblang hamu daok dalam tukvak sroh tal tuk ine tasak. Ini lac bilan padai praong dalam thun, bhian mek hu năng suất saong chất lượng glaong. Amuk Nguyễn Thị Kiều, Phaok akaok Sở Ngak nong saong patagok palei pala bal Cần Thơ kakei dahlau, tukvak ini langik tasik tuk page hu aia kakuan, laghaih ka halak halin, abih di nyu lac rầy nâu saong đạo ôn tangi padai. Kayua yau nan ye, mikva urang nong njauk nao tabiak rivang laok hamu di drei piah samar duah mboh saong xử lý jit ruak halak halin hu siam lagaih.

4 # Pathau khan di  Gah Lao Động dunya (ILO) brei thau, 74% dalam tong abih urang ngak gah chế biến, chế tạo di Việt Nam mbuan gaok rủi ro, mbuan salih karei kayua tự động hóa. Kayua pambak tui cách mạng công nghiệp ka  4, dom doanh nghiệp brei salih công nghệ bahraui, saong urang ngak njauk paglaong ilamu ngak bruk piah pabak bruk ngak

5 # Hadei di sa adit padeih Tết Mậu Tuất 2018, page harei 21/2, di tỉnh Cà Mau, labaih 50.000 urang jakar, urang ngak mai veik jabat, công ty, sang mac ngak bruk dalam bui sambai harei ngak bruk akaok mereip di thun bahrau. Ralo jabat Karja hu peih bruk ka urang jakar, urang ngak adat salam hala dok dalam harei ngak bruk akaok mereip.

Patui di ni dom khau tin dunya:

6 # Akaok mintri Quốc phòng Singapore Ng Eng Hen ndom lac, dom negar di Hiệp hội dom negar  Ðông - Nam Á (ASEAN) song  Trung Quốc khang hatai ngak salah Bộ quy tắc ứng xử di  Biển Ðông.

7 # Menuac sia Nhật Bản dalam dom thun jaik di ini daok trun, menek bier saong manuac urang dalam umo ngak bruk trun, brei mboh bruk kurang urang ngak di Nhật Bản jeng oh ka siam veik. Tui panuac di mentri Y tế, Lao động saong Phúc lợi Nhật Bản brei thau, kuhria tal puac bilan 10/2017, manuac urang ngak negar langiu di taneh aia ini tapa tanut 1,2 triệu urang. Ini lac rilo di abih kuhria meng thun 2008 saong tagok 18% dut haong thun 2016.

 8 # Botum Sakor lac bein pakat negar prong abih di Campuchia hu hệ sinh thái đa dạng, song glai hajao prong gam mblang hareik haong takai tasik siam. Dalam thun 2018 ni, Shinta Mani Wild - Bộ sưu tập Bensley hu tabiak mbaok dalam sa  thung lũng krong  prong 400 ha  nao gah  đông nam di Botum Sakor./.