1 / Công ty Cổ phần Đầu tư Đèo Cả brei thau, Mintri jalan mbak pajeng ba hu tabiak harak brei adat peih ngak iek bruk kreik hầm Hải Vân pambuak Đà Nẵng song Thừa Thiên - Huế dalam 30 minite yaok harei (meng 13h15 – 13h45) piah patuh mìn peih prong hầm Hải Vân 2. Tuk vak peih ngak bruk nan ui kuhria meng harei 11/7. 

2/ jit aih caraoh rah tabiak saong mbuan njom mbak samar di tapon ada di tỉnh Phú Yên ngak khat lahik trak ka urang raong glang. Urak ini hu 9 tapon ada raong di 8 baoh sang daok di dom xã An Ninh Tây, An Thạch, An Định saong ban sit Chí Thạnh njauk ruak. Gah chức năng tỉnh kakei urang raong ada brei ngak pahacih var ro saong klauk vacxin pacang cakak jit, patakik bruk njom mbak di jit ruak. Min, urak ini ralo baoh sang raong jeng daok takik caik hatai sangka pacang cakak jit ruak.   

      3/  Dom gah chức năng di huyện Đạ Huoai (Lâm Đồng) dok kham merat pasiam veik sa baoh tatua jaleih kayua ia sua, ngak ka 20 boh  oh nao mai hu. Meng di tuk tatua jaleih, huyện Đạ Huoai song  xã Hà Lâm hu brei menuac mai khik iek di 2 gah akaok tatua, dong ka bhap bini ba pandap mbang menyum tapa tatua, khik siam mekre ka bruk mbang ngui dok dang di bhap bini.

4/ Tal urak ini bruk jaleih tatua máng di hệ thống thủy lợi kraong Dinh 3 (huyện Hàm Tân, tỉnh Bình Thuận) hu pasiam veik saong thau makna lac kayua chủ quan di gah thiết kế saong gah thầu padang ngak. UB bhap bini tỉnh Bình Thuận brei thau: Jien bayar bruk pasang iek, taong yaom saong pasiam veik khat lahik oh mek kadung jien karja. Gah thầu xây lắp lac Công ty Cổ phần Cửu Long hu sanya bayar taong abih jien pasiam veik labik tatua máng njauk glut jaleih. Gam saong nan, bruk bayar jien pasang iek, taong yaom lac di dom gah: tư vấn, padang ngak saong tui iek. 

   5/  Labaih 5 thun tapa, Sở Lao động, thương binh song  xã hội tỉnh Đồng Nai jak ba hu labaih 23 tỷ đồng brei kadung jien đền ơn đáp nghĩa, dalam nan hu 7,5 tỷ đồng kayua kadung jien đền ơn đáp nghĩa di tỉnh jak ba, dok veik kayua kadung jien đền ơn đáp nghĩa dom huyện, ban sit Long Khánh song ban Biên Hòa jak ba. Yaom jien nan piah peih ngak rilo bruk, rilo danak dak pamong tal dom urang dalam sarak karja, boh sang hu buh pren yava ka taneh ia dok dalam tỉnh. Dalam nan, eng bruk iek glang pren yava, brei harak  bảo hiểm y tế, gia hạn yaok thun ka labaih 8,7 ribau urang buh pren yava ka taneh ia abih jiak  39 tỷ đồng.

6/ Barau ini, 40 urang di klup kapul hưu trí Công ty Tanimex  ban raya Hồ Chí Minh hu mai tal pasak Bảo trợ xã hội Tây Ninh rivang saong alin hadiah pandap ka urang taha, uranaih daok hu raong ba, iek glang di labik ini. Urak ini, pasak Bảo trợ xã hội tỉnh Tây Ninh daok iek glang, raong ba 50 urang taha saong 30 uranaih, dalam nan hu ralo urang njauk khuyết tật thần kinh, khuyết tật vận động.  

      7/  Langik tuk pandiak tuk hajan yau urak ni ngak ka jit rầy nâu song ruak vàng lùn- lùn bilik hala dok tagok. Anak bruk nan, gah ngak nong tỉnh Hậu Giang hu panuac kakei urang nong dalam tỉnh tam drak padai Thu ĐÔNG njauk tui ịch di gah ngak nong ba tabiak, piah nyaik jit ruak palai pajoa. Sở ngak nong song patagok palei pala tỉnh hu panuac pandar  Chi cục khik ramik phun pala tỉnh, gah ngak nong dom puk palei tagok bruk tui iek, duah thau  mật độ rầy nâu song ruak vàng lùn- lùn bilik hala, piah samar mboh song tacei pato mik va dom jalan pacang caga hu siam lagaih.

          Patui di ini dom khau tin dunya:

8/ Akaok Uỷ ban Cải cách Chính trị di Hội đồng Cải cách negar Thái Lan (NRSA), ong Sê-ri Su-oan-pa-non barau brei thau, meyah Thủ tướng Pra-dút Chan-ô-cha khin jeng thủ tướng hadei di mbang tổng tuyển cử jaik tal, ye brei klak chức vụ urak ini dahlau harei 5/7.

9 / # Gah y tế bang Niu Sao Uên (New South Wales) di Ôxtrâylia daok kuhria ba tabiak bruk oh brei pablei dom janih pandap menyum hu saradang di tong abih dom sang iek ruak song cơ sở y tế di  bang ni , meng puac thun ni. Bruk ini lac sa dalam dom jalan ngak piah pacang veik ruak lamek labaih kilo dak harei dak tagok. Tui dom urang jakar dang akaok gah y tế bang, bruk thau palih ruah pandap mbang menyum kein lagaih ka pren yava hu peih akaok meng dom urang ngak gah y tế meda ngak jeng bruk caik ka bhap bini mblah tui.

          10/ Dom urang ilamu barau duah mboh sa janih cim kata barau di pulao Y-u-can-tan di Mexico. Ini lac janih cim kata Amazon, hu blau sambo hijao saong angaok akaok hu "vương miện" sambo hijao hala kayau, karei jang dom janih cim kata Amazon hu duah mboh dahlau nan. Janih cim kata barau ini daok tui tapon takik jang 12 drei di sa labik daok haong gauk. Pandap mbang di nyu lac dom janih asar, bingu, baoh kayau patau saong hala kayau./.