# Ban tacei pato 1237 tỉnh Bình Thuận bahrau peih ngak nyaom biai pataom iek veik bruk roh duah, pataom mek hài cốt liệt sĩ thun 2017. Bruk ngak ini daok hu puk palei sangka, peih ngak samu gauk ralo jalan ngak saong ba mai baoh jeng siam mekre. Dalam thun, Ban tacei pato 1237 tỉnh Bình Thuận taduan mek hu 106 thông tin ngan haong 364 baoh kabo. Tapa nan, xác minh saong kết luận hu 60 thông tin ngan haong 234 baoh kabo. Meng nan pataom mek hu 36 talang liệt sĩ, mek hu labaih 140% chỉ tiêu ba tabiak dalam thun.

# Sa mbang khuah radaih khách ndih laneng rah tabiak di jalan roya 1 canah tapa huyện Xuân Lộc, tỉnh Đồng Nai. Patoah jamo lac abih tih 30 urang ndik radaih hu nduac tabiak lingiu. Tuk radaih daok nduac di jalan roya 1 canah jalan tapa xã Xuân Hưng, huyện Xuân Lộc, tỉnh Đồng Nai patoak khuah. Mboh radaih khuah, tài xế Hải drah samal padheih radaih, ba tuai tabiak. Biak patoah abih tih 30 urang tuai di radaih drah samal nuac tabiak. Sruh radaih hadei nan khuah khang.

# Piah ngak brei patrun bruk gar jalan mbak nao mai di labik pabah lamnge Cát Lái, jalan Nguyễn Thị Định, canah jalan meng  Mỹ Thủy tal phà Cát Lái meda hu peih prong labaih 70m, jien buh tame ngak labaih 1.400 tỷ đồng. Akaok mereip, dự án quy hoạch mbaok jalan peih prong 60 ngan haong 6 làn radaih cơ giới, 4 làn radaih hỗn hợp.

# Thun 2016, Uỷ ban bhapbini tỉnh Kon Tum barau langyah Đề án ba urang bhapnini nao daok dalam huyện Ia H’Drai, piah khik caga menuac urang saong rik daong jhul khang patagok kinh tế-xã hội pagam saong khik caga an ninh libik tapeng negar di tỉnh saong huyện Ia H’Drai. Min, kayua daok rilo kan kandah dalam bruk pasiam cơ sở hạ tầng di huyện Ia H’Drai yau nan ye urang bhapnini oh ka mai tal libik barau piah tani tanat raidiuk.  

  # Dalam xã Tân Thành, huyện Bù Đốp, tỉnh Bình Phước bahrau rah tabiak sa mbang hajan prong ba tui angin ribuk ngak ka ralo mblang taneh pala phun amaraik kalu, cao su, sang danaok di bhap bani saong Trung đoàn 717 dalam Binh đoàn 16 jaoh jaleih, tapeih tabung. Tui số liệu thống kê di Duk ngak nong saong atagok  palei pala huyện Bù Đốp, meng bilan 3 tal ini dalam huyện rah tabiak 3 mbang ribuk khang ngak ka labaih 10.000 phun amariak kalu saong ralo mblang taneh phun pala karei yau pa-aok blait, cao su njauk jaoh jaleih, ralo sang tapeih tabung, ralo labik njauk aia dauk ngak ka bhap bani khat lahik ralo tỷ đồng.

# Urak ini, di khoa Hô hấp 1, sang iek ruak Nhi đồng 2 ban raya Hồ Chí Minh hu 300 uranaih pasang iek dom ruak hô hấp, dalam nan hu jaik 30% lac uranaih oh ka tal 12 bilan. Tui kuhria meng sang iek ruak Nhi đồng 2, meng bilan 8 tal ini hu jaik 10.000 mbang uranaih mai iek ruak kayua gaok dom ruak di jalan hô hấp saong labaih 4.500 uranaih njauk tame sang iek ruak. Rilo uranaih njauk tame sang iek ruak kayua gaok dom ruak ye: viêm tiểu phế quản, viêm phế quản, viêm phổi. 

# Báo Tuổi trẻ pambuak haong Tỉnh Đoàn Quảng Trị, Kapul nyaom pachreih bac tỉnh Quảng Trị, Rayo sapar sap papar binguk saong Báo Quảng Trị tổ chức peih bruk pok brei pok jien bac “Dong pen nao bac” ngan haong kadha “Nghĩa tình Quảng Trị”. Danak dak hu pok breik 204 pok jien bac labaih 1,5 tỷ đồng brei ka dom  tân sinh viên yam tapa kan kandah, bac megru naih jioy di tỉnh Quảng Trị; dalam nan hu 197 pok jien yaom 7 triệu đồng sa pok saong 7 pok biak karei hu yaom 10 triệu đồng sa pok.

Khaw tin dunya

# Tổng thống Philippin Rô-đri-gô Đu-téc-tê khan brei thau oh huac kanda peih praong kateik greik bruk thiết quân luật dalam taneh ia piah caga dom mbang tấn công di  phiến quân pambuak bruk saong kol IS. Khan brei thau di urang dang akaok taneh ia Philippin dalam tuk rilo urang par phao ndao di kol phiến quân Maute – dahlau thiah hu tuyên thệ trung thành saong IS jeng daok di ban Ma-ra-uy, gah meraong Philippin, yaom lac barau gaok bol bala taong tayah.

  # Truyền thông Thái Lan brei thau, anek likei di urang dahlau diah ngak Thủ tướng Thái Lan Thaksin Shinawatra, ong Panthongtae Shinawatra meda njauk khởi tố ka bruk rao jien dalam sa vụ án pambuak pagam tal gilang pariak Krung Thai. Tui báo chí Thái Lan, Cục Điều tra biak karei negar ini hu pal khik sa  “ ralo chứng cứ pambuak pagam tal bruk rao jien” di ong Panthongtae Shinawatra dalam tukvak duah tahau ka nghi án tham nhũng di gilang pariak Krung Thai.

  # Dom gah chức năng Trung Quốc barau ini hu pandar padheih abih dom hệ thống jien ảo di taneh ia ini, taphia nan paglaong dut iek dom bruk pambuak tal jien điện tử.  jabat hu trách nhiệm dut iek dom nguy cơ jien padai di Quốc vụ viện (rajaei ) Trung Quốc hu pandar abih jabat khik ramik di dom pakat puk palei kareik bambang dom sàn giao dịch chuyên pablei dom janih jien kỹ thuật số hu pambuak tal đồng Nhân dân tệ. Lệnh pakauk ini meda ngak kandah tal klau hệ thống jien ảo Bitcoin praong di Trung Quốc hu OKCoin, Huobi saong BTC China./.