Khaw tin 10g30- 14g30,  harei 14/9

# Ngak tui Công điện khẩn di Thủ tướng ka bruk pacang caga ribuk ka 10, tỉnh Quảng Trị hu panuac ieu dom puk paleisamar pacang caga, patrun takik di abih khat lihik kayua hajan ribuk. Karja dom huyện Gio Linh song Vĩnh Linh hu panuac ieu dom xã, ban sit panduan ba bhap bini song drap ar tal labik siam mekre.  

# Anak bruk kan kandah di ribuk ka 10 tui kuhria tuh tame dom tỉnh meng Thanh Hóa tal Quảng Bình, dom puk palei daok dark samal peih dom bruk caga pacang ribuk. Ông Đặng Tiến Dũng, Chánh Văn phòng Ban Chỉ huy pacang caga hajan ribuk tỉnh Thanh Hóa brei thau: Tal bair harei 13/9, dalam tỉnh hu 7.409 kapal taong cap ikan ngan saong  27.190  urang ngak, dalam nan hu 5.713kapal ngan saong 17.219 urang ngak hu katok siam di dom bến dalam tỉnh. Urak ini tok daok 1.696 kapal saong 9.971 urang ngak di tasik meng Quảng Ninh tal Quảng Bình. 

# Meng akaok thun 2017 tal ni, rilo boh sang urang nong di xã Nghĩa Hiệp, huyện Tư Nghĩa hu mbaok tame bruik pala njam patam hacih kayua  Công ty Trách nhiệm hữu hạn QNASAFE Quảng Ngãi buh jien tabiak ngak.  Urang nong langiu di bruk rik taneh, parabha kein liba dok hu công ty taduan tame ngak công nhân song yaom jien bilan tani tanat. 

# Ủy ban bhapbini tỉnh Bình Định barau dak padang Tổ daong urang taong ikan ngak kapal iakn barau tabiak tasik. Hu thau, tal tukvak ini hu 59 urang ngak ikan mbaoh tangin tame hợp đồng ngak barau kapal kandauh thép tui Nghị định 67 ngan saong paok jien brei mesraiy abih tih jaik 900 tỷ đồng. Ông Hồ Quốc Dũng, akaok uy mban bhapnini tỉnh Bình Định brei thau: Tỉnh hu dak padang 1 tổ daong ka urang ngak ikan. Daong ka gah pháp lý, pasang iek veik dom hợp đồng, daong gam kỹ thuật. tuk urang ngak ikan ngak lac daong mikva pasang iek gah kỹ thuật siam hai oh piah ka urang ngak ikan sahanang hatai.

# Tỉnh Khánh Hòa dok patagok dom janih phun pala khang di bhum mik va bangsa takik song bhum ceik. Ni lac sa dalam dom jalan ngak prong piah tagok jien duah hu ka bhap bini, sa dalam 4 danak dak prong bo tỉnh Khánh Hòa peih ngak dalam tuk vak 2016 – 2020. 

# Ủy ban bhapbini ban sit  Buôn Ma Thuột, tỉnh Đak Lak brei thau, tỉnh barau mboh dua sruh ruak hluak cambuai papaok kakau di tapol athur di xã Cư Êbur saong phường Tân Lập. Bruk kiểm nghiệm mẫu ruak di athur gaok ruak di jabat Thý y bhum 4 brei mboh, tapol pabui di sang ông Trần Ngọc Quang daok di phường Tân Lập saong tapol limo di klau sang bhapnini daok pak xã Cư Êbur, ban sit Buôn Ma Thuột jeng dương tính saong vi rút hluah cambuai papaok kakau type 0. 

# Tỉnh Cà Mau ba tabiak bruk lac buh jien padang ngak salah bloh tong abih jalan ô tô tal pasak xã dahlau di thun 2020. Bruk buh phun jien tabiak padang ngak jalan ô tô tal pasak xã hu makna biak prong, dong peih ngak siam danak dak pakat negar, padang ngak palei pala bahrau. 

          Khaw tin dunya

# 10 tỉnh ban di dom bhum tapeng tasik Trung Quốc meda gaok dua mbang ribuk khang lac Ta-lim (Talim) saong Đốc-xu-ri (Doksuri) dalam dua harei tal . Ribuk Talim meda khang tagok jeng ribuk biak khang tuk nao tapa Đài Loan (Trung Quốc), ba tui hajan praong saong angin khang. Tui kuhria, ribuk tuh tame mbaok haluk di tỉnh Chiết Giang, Trung Quốc di melam 15/9 atau dah pagaiy harei 16/9.

         # Harei 13/9, cảnh sát Băng-la-đét duah mboh 9 urang  Islam Rô-hinh-ya (Rohingya) metai, dalam nan hu 3 urang kamei song 3 uranaih di labik jalan tapen negar Băng-la-đét song Mi-an-ma, tapoa nan tong abih urang Rô-hinh-ya metai dalam dom mbang nduac tabiak truh  Mi-an-ma tagok tal 97.

#  Tui sa roh duah di Liên hợp quốc ka y tế dunya hu ba tabiak angaok tạp chí khoa học y tế Giờ Len-xét (The Lancet) di Anh, dalam abih tih 200 taneh ia pataom tame taong yaok, oh sa taneh ia halei hu triển vọng ngak hu bruk ba tabiak di Liên hợp quốc ka bruk yah klak abih ruak lao di thun 2030.