# Di jabat Rajaei, Thủ tướng Nguyễn Xuân Phúc bahrau dang akaok mbang nyaom Thường trực Rajaei. Brei panuac tamat mbang nyaom, Thủ tướng brei peih praong mblang kapal haoh Tân Sơn Nhất tui jalan ba tabiak di Công ty tư vấn độc lập di Prang ADPI. Thủ tướng ndom lac jalan ngak ini abih takik phun jien, taneh riya, khik hu siam mekre, salamat. Tui nan Thủ tướng jao Mintri jalan mbak pajeng ba tacei pato Công ty tư vấn ADPI pambuak bruk haong tư vấn dalam taneh ia piah ngak pasiam tui jalan khik kajap bruk pandar taneh siam di abih di gah meraong jang yau gah barak.

         # Biak mbuan si rah tabiak bruk khuah glai di tỉnh Lai Châu dalam bilan thu ni, kayua bruk am hamu puh di mik va dom bangsa bhian rah tabiak. Kayua yau nan ye, bruk pacang caga khuah glai hu dom pakat, dom gah, dom puk palei dalam tỉnh iek prong. Ong Nguyễn Văn Tình, Hạt phó Hạt Kiểm lâm huyện Nậm Nhùn brei thau: Urak ni gah kiểm lâm tỉnh peih hu jiak  150 mbang ginum biai  song puk palei , Hạt jeng pambuak bruk song dom puk palei peih bruk pasram pacang caga khuah glai.

       # Yaok ribau héc ta kanyik di Đăk Lăk jeng daok klak di lingiu mblang hamu, yaom lac bilan kaoh mek meng dua bilan ini mai. Yaom kanyik tok samu 20% thun bloh, dalam tuk yaom pah urang kaoh mek tagok glaong ngak ka urang nong oh khin kaoh mek... Ông Hồ Tấn Cư, urang dang akaok jabat ngak nong saong patagok palei pala huyện Ea Kar brei thau, bruk cakrok phun kanyik di huyện lac tui hatai takre di urang pala, tagok khang dalam 2 thun mai ini. Piah plaih pala rilo, ba tal laik yaom, huyện hu ba tabiak rilo panuac kakei, min bruk pala kanyik jeng daok pambak praong tal 1.400 hec ta.

        # Tuk vak ni, urang nong di huyện Đức Linh, tỉnh Bình Thuận dok buac mek ratak laow (đậu phộng) vụ Đông Xuân năm 2017- 2018. Urak ni ratak laow thu hu yaom pablei labaih 18.000 đồng/kg, urang nong biak bui sambai kayua kein laba glong. Tui gah ngak nong huyện Đức Linh, phun ratak laow lac sa dalam dom phun pala ba mai siam lagaih dalam bruk salih janih phun pala di angaok taneh padai karuang ia di palei pala. Jalan ngak ni pambak pakhang tal hatai sahaneng di urang nong KA bruk salih janih phun pala, pala rilo vụ dalam bruk ngak nong

# Ông Trần Anh Thư, urang dang akaok Sở ngak nông saong patagok palei pala tỉnh An Giang brei thau, tukvak 2018-2020, tỉnh An Giang meda kaoh tabiak 60 tỷ đồng piah pato pakai, pasram megru, paglaong ilamu ka urang jakar, công chức, viên chức chuyên môn, kapul urang pachreih nong saong urang ngak nong. Ini lac dom menuac urang pabak hu bruk cakrok patagok kinh tế - xã hội di tỉnh dalam tuk mbeik drei tame dunya

Patui di ni dom khau tin dunya

        # Harei 29/3, di sang prong Tôn-gin-gắc (Tongilgak) di Triều Tiên, gah brak  làng đình chiến Bàn Môn Điếm (Panmunjom) hu rah tabiak mbang ginum pakat glong di dom urang ngak praong 2 gah Triều Tiên, piah caga ka mbang taom gaok pakat glong liên Triềutui kuhria hu rah tabiak dalam bilan  4 tal. 

  # Harei 29-3, akaok mintri Quốc phòng 7 taneh ia Trung Âu nan lac Áo, Sec, Hungary, X-lô-va-kia, Crô-át-tia, Xlô-vê-nia saong Ba Lan hu pataom gauk di ban ine Bu-đa-pét di Hungary piah ginum biai jalan pambuak bruk dalam bhum. Tapa nan, dom akaok mintri mboh lac njauk patagok bruk pacang caga piah khik caga châu Âu anak dom kanjah jhak mead rah tabiak.

          # Negar Nga bahrau caik tang dom urang gaok bala dalam mbang khuah pasak pablei salih  di bhum Kơ-mơ-rô-vô (Kemerovo). 4 harei tapa bloh, min urang njauk rambuac dok hu rilo jang, urak ni lac  76 urang. Tui Ủy ban Điều tra  Nga, hu 8 urang njauk hu dong y tế hadei di mbang khuah di  pasak pablei salih Zim-nhai-a Vi-sơ-nhi-a (Anh đào mùa đông) - bhum Kơ-mơ-rô-vô (Kemerovo), tapa nan urang njauk rambuac tagok tal labaih 76urang, dalam nan hu 27 uranaih./.