Khaw tin 10g30-14g30 harei 7/2/2018

     # Thủ tướng Nguyễn Xuân Phúc bahrau jao ka Mintri Jien padai buh brah tabiak brei dom tỉnh ban daong ka bhap bini pacang eik lipa dalam tuk Tết Nguyên đán Mậu Tuất 2018 saong dalam tukvak cang yuak kuak thun 2018. Tui nan, Thủ tướng jao Mintri Jien padai buh tabiak oh mek jien 5.504,283 tấn brah meng gilang khik piah di negar brei ka 7 tỉnh lac  Quảng Ngãi, Quảng Bình, Bình Định, Đắc Nông, Đắc Lắc, Sóc Trăng, Kon Tum.

 # Pa-uan Tết Nguyên đán Mậu Tuất 2018, bair harei 6/2, akaok uy mban TƯMT negar Việt Nam Trần Thanh Mẫn nao ravang saong alin pandap Tết sang sarak, bộ đội xuất ngũ, sang katahot phường An Hội, quận Ninh Kiều, ban Cần Thơ. Akok UBTW MT negar Việt Nam caong khin karja puk palei pasang iek siam ka dom sang sarak, sang kathaot Tết 2018 bui sambai, trei sir, duah bruk ngak ka bộ đội xuất ngũ; ba jalan piah mikva ngak mbang pablei salih, anek bik hu mbang bac ginup.

# Pasak khik ramik inem krung medil Huế brei thau, dalam 3 harei Tết Mậu Tuất ,meng harei 16 tal harei 18/2, Pasak oh mek jien harak tame pabah mbang ka tuai du lịch dalam taneh ia tame rivang dom inem mek medil Huế. Ong Phan Thanh Hải, Giám đốc pasak khik ramik inem krung medil Huế brei thau: Dalam 3 harei Tết dom labik hu pablei harak tame pabah mbang oh mek jien harak di tuai urang Việt Nam. Daok dom inem krung Huế yaok thun hu 5 harei peih pabah mbang brei urang Việt Nam tame saoh, daong ka mikva dalam taneh ia hu tame iek

# Urak ini, urang bhapbini di dom bhum pala bingu Tết dalam tỉnh Bà Rịa-Vũng Tàu di xã Phước Long Thị, huyện Đất Đỏ daok pablei bingu ka dom urang blei meng grauk libik mai. Thun ini, urang pala bingu dalam tỉnh biak chreih chrai kayua hu sa thun lingik siam lagaih ka bingu cakrok, mbuan pasang iek saong bingu tal tukvak pablei jeng kheih, rak njauk tukvak. Min, tui urang pala bingu, thun ini jien buh tabiak ka pasang iek bingu nyu tagok meng 30-50% kayua jien jru, khak saongjien pah urang ngak jeng glaong .  

         #Pasak daong Anek saih– sinh viên TPHCM peih danak dak “Pataom mbaok sinh viên mbang  tết atah sang”– Xuân Mậu Tuất thun 2018. Hu mbaok tame danak dak, hu jaik 2.000 sinh viên kan kandah daok bac di dom sang bac đại học, cao đẳng, trung cấp dalam ban raya. Dalam danak dak thun ini,, jaik 2 ribau sinh viên hu tame daoh tamia, taom gaok dom ca sĩ, nghệ sĩ hu angan, ndom biai no mai haong dom sinh viên..

Khaw tin dunya

# Pchreih tui bruk chreih chrai di taneh ia saong bhapbini urang Việt grauk libik di dunya daok salam uan Xuân barau, melam kabroi (6/2), Đại sứ quán Việt Nam di Campuchia hu peih ngak praong prang harei tất niên, salam uan Xuân barau Mậu Tuất 2018. Mai pataom mbaok, hu lambaok dom tỉnh, ban tapeng negar Campuchia ye Đắc Lắc, Gia Lai, Tây Ninh…; Quân khu 7, Quân khu 9. 

# Akaok Mintri Quốc phòng 10 taneh ia dalam Hiệp hội dom negar Đông Nam Á (ASEAN) saong Trung Quốc njauk gauk brei tập trận haong gauk dalam thun 2018. Hãng tin Kyodo ba panuac di akaok mintri Quốc phòng Campuchia Tea Banh brei thau, bruk nan hu tabiak meng nyom biai oh chính thức akaok mintr Quốc phòng dom taneh ia ASEAN di Singapore hrei 7/2.

 # Takik di abih 2 urang metai saong dom tòa sang  jaleih hadei di mbang megaiy taneh khang 6,4 độ ríchte rah tabiak jaik ban duyên hải Hoa Liên (Hualien), Đài Loan (Trung Quốc) tuk kreih melam harei 6/2. Tui Cục khảo sát Địa chấn Mỹ, mbang megaiy taneh rah tabiak jaik ban Hoa Liên 22 kilômét di gah đông bắc saong pasak megaiy taneh biak kaoh tok 1 kilômét./