# Uỷ ban bhap bani tỉnh Khánh Hòa bahrau hu harak brei thau ka bruk daong bhap bani padang ngak, pasiam veik sang danaok njauk glut jaleih, khut tayah kayua ribuk ka 12. Tui nan, langiu di dom baoh sang sarak karja, bhap bani urang bangsa takik, dom baoh sang kathaot, jaik kathaot, baoh sang hu rai diuk kan kandah jeng hu daong pasiam veik sang danaok... njauk tapeih abih tabung, daning sang khut min meda pandar veik atau ngak pasiam veik. Yaom jien daong meng 5 triệu đồng tal 40 triệu đồng, tui manuac urang. Pok jien hu mek meng kadung jien karja tỉnh saong Kadung jien daong di Uỷ ban Mặt trận Negar tỉnh. 

# Di tỉnh Quảng Nam hu mboh jit ruak saloah cambuai papaok kakau ngan saong 94 drei kubao  njaom ruak. Xã Duy Trinh, huyện Duy Xuyên, tỉnh Quảng Nam lac puk palei akaok meti hu sruh jit salaoh cambuai papaok kakau di anek athur. Huyện Duy Xuyên hu labaih 16 rabau drei limo, 34 rabau drei pabui, min bruk klauk caga vắc xin saluah cambuai papaok kakau mbang 2 thun ini tok hu 44%; dom drei kubao ruak metai oh ka hu klauk caga. Di libik jit, kapul urang jakar Thú y hu pruh jru pametai anek ruak di var raong  saong dom labik mbuan si tamuh jit. 

# Lâm Đồng nan lac tỉnh hu mblang taneh cà phê dang ka dua dalam negar hadei di Đắk Lắk). Yaok thun tal bilan paik baoh cà phê, bruk kurang menuac paik daok ngak brei ralo baoh sang duh hatai. Lâm Đồng hu jaik 140.000 ha cà phê, caong khin labaih 60.000 urang paik cà phê dalam tukvak 2 bilan. Dalam vaktu paik baoh cà phê, yaok thun dom puk palei dalam tỉnh taduan raok yaok pluh ribau urang ngak mai meng dom tỉnh bal karei mai ngak tapa dom pasak môi giới saong ba brei brukngak atau tapa dom gah karei. Min tal urak ini, urang ngak mai likau bruk ngak trun jang 30% dut haong thun dahlau. 

# Hiệp hội raong glang tỉnh Đồng Nai barau peih cửa hàng khik kajap yaom kaya nong akaok meti dalam tỉnh. Ini lac cửa hàng pablei dom janih kaya nong hacih tui VietGAP, hu thau asal camabih. Bruk peih dom cửa hàng khik kajap yaom lac jalan ngak di UB bhapnini tỉnh Đồng Nai piah daong khik kajap yaom kaya nong. Hiệp hội raong glang tỉnh Đồng Nai hu ba tabiak bruk praong lac tapa cửa hàng meda peih dom chuỗi pambuak bruk di dom libik, doanh nghiệp piah ba kaya nong Đồng Nai pablei tabiak darak pasal praong haong sản lượng glaong jang.

# Patagok bruk mek veik jien, drap ar njauk meblah mek, tham nhũng hu labaih 60%, nan lac sa dalam dom bruk ngak prong hu Cục Thi hành án dân sự Cần Thơ ba tabiak pak Nyaom biai peih ngak bruk thi hành án dân sự thun 2018, peih tabiak harei kabroi (28/11). Tui harak pathau khan di Cục Thi hành án dân sự Cần Thơ, dalam thun 2017, Cục Thi hành án dân sự Cần Thơ hu thụ lý thi hành án dân sự labaih 15.000 bruk, tagok 3,2% dut saong tukvak ini thun dahlau; tapa pasang iek, duah thau, hu labaih 11.700 bruk meda langyah hu saong jaik 3.300 bruk oh ka langyah hu.

# Jeng dalam harei 28/11, Viện Kiểm sát bhapbini Quận 12, ban raya HCM barau phê chuẩn quyết định khởi tố vụ án, khởi tố bị can saong lệnh mek kareik Phạm Thị Mỹ Linh – po cơ sở mầm non Mầm Xanh (phường Hiệp Thành, Quận 12) urang hu pambuak tal clip taong dom adei hu Báo Tuổi Trẻ  brei thau. Công an Quận 12 jeng daa amaik ame saong dom uranaih hu pambuak tal gaok hành hạ tukvak tapa piah vak veik panuac khai, ngak hồ sơ khởi tố vụ án.

# Liên đoàn Lao động tỉnh Cà Mau bahrau peih bruk pok meyaom 60 urang jakar, urang ngak naih ghieh dalam bac megru saong ngak tui jalan hadah krah siam mekre di Hồ Chí Minh. Dalam thun tapa, hu 15.000 mbang urang ngak, urang jakar mboh tangin tame dom angan urang ngak naoh jioy, lao động tiên tiến, chiến sỹ thi đua dom pakat. Thun 2017, urang jakar, urang ngak di Cà Mau hu mbaok tame padang ngak 16 đề tài roh duah khoa học, 2.200 sáng kiến, ilamu. Ralo công trình, pandap panda, đề tài, sáng kiến ba tame pandar mek hu ralo siam mekre, duh ka bruk ngak mbang pala drak, rai diuk, patak pataom saong ba mai kein laba ka karja yaok pluh tỷ đồng.

Khaw tin dunya

# Hadei meng tayah tayaic di mbang ribuk Dam-ri di Việt Nam, Liên Hợp Quốc hu ba tabiak kadung jien daong pabak tame 4 triệu 210 rabau đô-la Mỹ meng kadung jien daong chip di Trung ương piah daong 150.000 urang, dalam nan hu jaik 47 rabau lac uranaih di 6 tỉnh di Việt Nam gaok kan kandah. Kadung jien ini meda langyah dom caong khin katut tukvak saong trung hạn, taphia nan patagok bruk pasiam di bhapnini mbuan si gaok kan kandah kayua bala.

# Dom darak Giáng sinh grauk labik di bal ine Béc-lin di Đức hu peih pabah mbang ngan haong bruk an ninh hu khik kajap pak bal ine ini jaik sa thun hadei di mbang  khủng bố ngak ka labaih pluh urang metai. Urang jakar di bal ini hu caik ralo paga pacang  meng bê-tông pak dom darak giáng sinh piah plaih dom mbang tấn công yau nan, langiu di nan daok brei ralo urang jakar gah an ninh nao tui iek.

# Jaik 6% dom urang njaom ung thư barau di dunya thun 2012 – sumu saong 800 rabau ca ung thư, kayua ruak me-ik saradang saong limek labaih kí lô. Roh duah jeng brei mboh, ruak ung thư tamuh meng gam me-ik saradang saong limek labaih kí lô di urang kumei glaong jang dua mbang duk saong urang likei. Tui akaok kapul roh duah, bruk pambuak pagam di limek labaih kí lô saong me-ik saradang hu brei thau meng livik mai. Min, bruk pambuak gauk di me-ik saradang saong ung thư barau duah mboh jaik ini./.