# Page harei 11/9, Phaok akaok negar Đặng Thị Ngọc Thịnh saong kapul urang ngak bruk hu nao rivang saong alin brei pandap ka anek saih sang kan kandah di tỉnh Quảng Trị. Phaok Akaok negar Đặng Thị Ngọc Thịnh pok brei 100 pok jien bac ka dom anek saih njaom jru mek đioxin saong 100 pok pandap ka dom adei bhum tapen tasik mbuan si klak bac, anek saih kathaot, anek kamuan baoh sang sarak karja, yaok pok hu yaom 1.2 triệu đồng. Langiu di pok jien bac, dom adei daok taduan hu dom pok pandap Trung thu, yaok pok yaom 500 ribau đồng.

     # Dalam mbang hu mbaok dalam Lễ peih pakak Nyaom darak Trung Quốc - ASEAN saong nyaom biai Thượng đỉnh pablei salih saong đầu tư Trung Quốc - ASEAN mbang ka 13 pak Quảng Tây, biar harei 11/9, Thủ tướng Nguyễn Xuân Phúc hu mai rivang Khu học xá Trung ương (daok iew lac Sang bac Dục Tài Nam Ninh, Quảng Tây) – sa kadha sajarah ka talei rohim "gam lac đồng chí gam lac adei sa-ai” di Trung Quốc saong Việt Nam. Jeng dalam biar harei nan, Thủ tướng hu nao rivang Khu Ngak nong công nghệ glaong Bát Quế Điền Viên – sa bruk ngak nong mek hu ralo kein laba di Quảng Tây.

     # Jeng dalam mbang nao rivang di Thủ tướng Raja-ei Nguyễn Xuân Phúc pak Trung Quốc, biar harei kabroi, ong Trần Quốc Vượng, Ủy viên Bộ Chính trị, Bí thư Trung ương Đảng, Akaok Ủy ban Kiểm tra Trung ương hu van taduan raok ong Vu Xuân Sinh, Bí thư Ủy ban Kiểm tra Kỷ luật Khu tự trị bangsa Choang, Quảng Tây, Trung Quốc. Pak van taduan raok, ong Trần Quốc Vượng taong yaom glaong dom bruk klah rabha ilamo haong gauk di Ủy ban Kiểm tra Trung ương Đảng Cộng sản Việt Nam haong Ủy ban Kiểm tra Kỷ luật Khu tự trị bangsa Choang, Quảng Tây dalam tukvak tapa, rik daong patagok talei pambua bruk di dua Đảng saong bhap bani dua negar.

     # Pak bal Vinh (Nghệ An), Báo Công an Bal raya Hồ Chí Minh, Tập đoàn Hoa Sen, Ủy ban bhap bani tỉnh Nghệ An bahrau peih danak dak “Mái ấm baoh sang Việt 2016 – Melam roya trung thu 2016”. Ini lac bruk ngak, mbang akaok mereip rah tabiak pak tỉnh Nghệ An, mblang ma-in hu kein laba saong hu makna brei ka labaih 1.000 adei sit hu rai diuk kan kandah pak dom mái ấm, sang daok, kapul urang sup meta, sang giáo dưỡng pak 2 tỉnh Nghệ An haong Thanh Hóa.

     # Báo Tuổi trẻ pambuak haong Tỉnh Đoàn Quảng Nam saong Sở Pato megru bal Đà Nẵng bahrau peih bruk pok brei jien bac “Daong pren tal sang bac” ka dom sinh viên bahrau,  yam tapa kan kandah bac megru naih jioy di tỉnh Quảng Nam saong bal Đà Nẵng. Mbang ini, 100 sinh viên bahrau, sang kan kandah taduan hu pok jien bac “Daong pren tal sang bac” yaok pok hu yaom 7 triệu đồng, kayua Klup kapul “Daong pren tal sang bac Quảng Nam-Đà Nẵng” pak bal raya Hồ Chí Minh daong brei.

     # Công ty Du lịch Sài Gòn (Saigon Tourist) pambuak haong tỉnh Quảng Nam bahrau peih danak dak Harei roya Trung thu thun 2016 ka labaih 1.500 adei sit dalam huyện Duy Xuyên. Danak dak lac bruk klah rabha dom kan kandah haong cộng đồng xã hội, abih di nyu nan lac uranaih sang kan kandah, anek naih bhum atah bayah. Tapa nan, Saigon Tourist pok brei 100 pok jien bac, yaok pok yaom 500 ribau đồng alin brei ka  dom anek saih kan kathaot bac da-a naih jioy saong 800 pok pandap trung thu dalam nan hu pandap bac megru, har kẹo, lồng đèn saong ao hajan alin brei ka uranaih kathaot, jaoh jo saong uranaih metui dalam huyện Duy Xuyên, samu yaom jien labaih 600 triệu đồng.

      # Dalam danak dak giao lưu nghệ thuật “Pamong tal pulao tasik palei negar” thun 2016 bahrau rah tabiak, kayua Ủy ban Mặt trận Negar Việt Nam Bal raya Hồ Chí Minh pambuak haong rayo papar sap papar binguk Bal raya Hồ Chí Minh peih ngak, bhap bani saong dom mạnh thường quân rik daong hu labaih 40 tỷ 300 triệu đồng tame Kadung jien “Brei ka pulao tasik palei negar, brei ka labik akaok taneh aia”. Ong Quách Cường, Phaok Bí thư Thường trực Đảng ủy Saigon Co.op, mộsa dalam domjabat ủng hộ quỹ brei thau: Tapa danak dak ini, khaol dahlak biak caong khin saong jia lac taong abih xã hội di khaol drei gam rik daong pren yava, sa hatung hatai haong bhap bani  saong chiến sĩ di bhum tapen negar, di pulao kaoh taneh aia piah ka bhap bani, bol lin di labik tapen negar, pulao tasik hu pabak hatai jia jang piah khik caga chủ quyền tapen negar, chủ quyền pulao tasik di khaol drei.

      Khaw tin dunya:

     # Hãng tin Yôn-háp (Yonhap) ba khaw tin Raja-ei Hàn Quốc brei thau, Triều Tiên bahrau salah blaoh dom bruk ngak kuhria caga ka sa mbang thử hạt nhân bahrau. Tui khaw tin, dalam mbang thử hạt nhân bahrau ini, Triều Tiên meda pandar sa jalan hầm oh ka pandar tapa di labik mblang thử bo negar ini bhian pandar piah peih ngak dom mbang thử hạt nhân. Nhật Bản, Hàn Quốc, Mỹ, Trung Quốc, Nga, Liên minh châu Âu (EU), Kapul Hiệp ước Bắc Đại Tây Dương (NATO)…v.v hu tabiak panuac oh njauk hatai ka mbang thử hạt nhân ini di Triều Tiên.

    # Thủ tướng Tan-da-ni-a Ka-sim Ma-gia-li-oa (Kassim Majaliw) bahrau nao tal bhum Ka-gê-ra (Kagera), labik rah tabiak mbang megei baoh taneh khang 5,7 độ ríchte piah pasang iek saong pachreih ba bhap bani. Pak ini, ong Ma-gia-li-oa brei thau, dom  chuyên gia di raja-ei daok taong yaom dom khat lahik meng mbang megei baoh taneh ini piah hu jalan pasiam veik saong daong ka bhap bani. Ong jeng brei thau, Tajaei Tan-da-ni-a jeng meda roh duah bruk daong brei thau meng dom kapul nyaom khí tượng dunya piah kuhria caga dahlau saong patrun dom khat lahik di dom mbang megei baoh taneh karei meda rah tabiak.

     # Hãng tin Ma-xra-vy (Masrawy), Ai Cập, ba khaw tin meng urang jakar mblang kapal haok negar ini brei thau, dom chuyên gia di Nga hu taong yaom glaong bruk hiện đại hóa jeng yau bruk peih ngak dom bruk an ninh pak mblang kapal haok dunya Cai-rô di Ai Cập. Dalam mbang nao rivang Ai Cập meng harei 7 tal harei 10/9, kapul nyaom hu 5 chuyên gia kỹ thuật di Nga hu mai pasang iek mblang kapal haok dunya Cai-rô. Tui kuhria dom chuyên gia di Nga meda peih dom mbang pasang iek karei di mblang kapal haok ini hadei di tuk sang ga ka dua di mblang kapal haok peih pabah mbang. Sang ga ini meda duh ka jaik abih dom tuai damuai lac urang Nga./.