#patui mbang nyaom ka 25, mesup ini 13-7, Ủy ban Thường vụ Quốc hội brei panuac ka dom bruk daok hu hatai sahneng karei di gauk di dự án Hukum pacang caga tham nhũng (pasiam veik). Biar harei ini, Ủy ban Thường vụ Quốc hội nyaom mbang tamat. Dahlau di tuk Chủ tịch Quốc hội Nguyễn Thị Kim Ngân brei panuac tamat mbang nyaom ka 25, Ủy ban Thường vụ Quốc hội brei panuac ka dự thảo Nghị định di Rajaei ka dom cơ chế đặc thù gah đầu tư, jien padai, kadung jien karja saong parabha pakat khik ramik ngan saong ban sit Cần Thơ; pataom iek veik mbang nyaom ka 5 saong brei panuac tuk camereip ka bruk kuhria caga ka mbang nyaom ka 6 di Quốc hội.

# Salah bruk ginum biai dự thảo Nghị quyết ka biểu thuế khik caga alam di mbang nyaom ka 25, Ủy ban Thường vụ Quốc hội page harei kabroi, akaok Quốc hội Nguyễn Thị Kim Ngân ndom lac: oh ka brei tapa bruk patagok kak je khik caga alam môi trường. Akaok Quốc hội pandar dom gah jien padai, thuế, hải quan, darak pasal paglaong bruk pasang iek haong doanh nghiệp pablei salih xăng menyek piah ngak tui bruk tanit tanat yaom, trun takik bruk patagok yaom xăng menyek.

       #Mesup ini, Diễn đàn pakat glaong “Jalan maong saong jalan patagok tui bruk salih bharau công nghiệp mbang ka 4” meda hu rah tabiak ala tacei ba di Thủ tướng Nguyễn Xuân Phúc. Tui kuhria, hu 1.700-1.800 urang lambaok dalam taneh ia saong lingiu negar mai hu mbaok. Lingiu di Diễn đàn pakat glaong, daok hu 5 mbang ginum biai daong langyah dom kadha praong di CMCN 4.0. Thủ tướng mead ba tabiak panuac cambaih laih ka công nghiệp 4.0 di Việt Nam dalam tukvak anak tal, saong meda javap jalei tapak atau tacei dom akaok mintri javap jalei dom tavak tavaiy hu doanh nghiệp ba tabiak.

  # Di mbang langyah di mbang nyaom HĐ bhapbini ban Đà Nẵng harei kabroi 12-7, Ông Huỳnh Đức Thơ, akaok uy mban bhapbini ban  Đà Nẵng brei thau urak ini urang dang akaok ban daok kham merat likau ý kiến dom jabat trung ương, ndom biai saong dom jabat pambuak tal piah mek veik sân vận động Chi Lăng. Urak ini sân vận động Chi Lăng hu neh tabiak jeng 14 lô taneh saong dom lô taneh urak ini lac drap ar thi hành án. Tui ông Thơ, bruk ndom biai nao mai mek sân vận động Chi Lăng piah duh ka bruk ilimo xã hội, njauk saong bruk khik ramik qui hoạch kiến trúc di ban .

 # Cục Cảnh sát Hình sự (C45) Mintri Công an bahrau tabiak bruk cap mek jip 9 urang dalam jalan talei đánh bạc liên tỉnh praong yaok ratuh tỷ đồng. Ini lac jalan talei kayua Nguyễn Văn Bình (ndih tapui thun 1982, palei Bắc Giang, daok di Quận 12, TPHCM) pan akaok.

    
 # Dahlau di nan, dom kapul nyaom di mintri Công an hu trinh sát Phòng 4 Cục Cảnh sát Hình sự, Bộ tư lệnh Cảnh sát cơ động (K20) pambuak bruk saong Công an dom tỉnh Tây Ninh, Bình Dương saong ban raya Hồ Chí Minh duah iek chip di 8 libik di 3 puk palei ini mek khik labaih 500 triệu đồng, 900 USD, 3 ô tô, 6 máy tính, 24 thẻ gilang pariak saong rilo harak baar pambauk tal bruk đánh bạc. Yaok ratuh tỷ đồng hu jalan talei ini giao dịch meng 2014 tal ini. Gam saong bruk peih cá độ, Bình daok brei rilo urang tangin takai lac dom giang hồ cộm cán nao brei mesraiy mek laba trak.

 # Tui pasak Dự báo khí tượng - thủy văn negar, harei ini (13/7), angaok biển Đông daok hu dãi hội tụ nhiệt đới. Kayua yau nan ye, bhum tasik meng Bình Thuận tal Cà Mau hu hajan ribuk khang, riyak glaong 2 - 4m. mBan tacei jalan Trung ương ka pacang caga bala meng lingik tasik pandar dom tỉnh tui iek catang bruk lingik tasik, khan brei dom pô ghe gilai thau jalan nao di áp thấp piah plaih, njaik, khik caga siam mekre menuac sia saong drap ar.

Khaw tin dunya

# Gilang pariak dunya barau ba tabiak pathau khan brei mboh, Ấn Độ yam tapa Pháp piah jeng gah kinh tế praong ka 6 di dunya. Kuhria tal puac thun 2017, tổng sản phẩm quốc nội (GDP) di Ấn Độ mek hu 2.597 tỷ đô la Mỹ, tapa Pháp ngan saong GDP hu 2.582 tỷ đô la Mỹ. Dalam 10 thun tapa, GDP di Ấn Độ tagok jang dua mbang. Lingiu di nan, Gilang pariak dunya kuhria mboh lac, dalam dua thun tal (2019-2020), taneh ia hu menuac sia praong ka dua di dunya (1,34 tỷ urang), meda lac taneh ia patagok kinh tế drah samal abih dunya (7,5%), dalam dom taneh ia barau tagok.  

# Taong abih anek naih umo ala 5 thun ginup điều kiện dalam dom baoh sang tame Mỹ suan hukum hu taom gaok veik amaik ame,  tui panuac tacei di tòa án. Ini lac panuac khan bahrau di rajaei Mỹ hu ba tabiak di harei kabroi, lac 2 harei hadei di thời hạn puac abih. Dom adei ini daok dalam labaih2.300 adei njauk neh rabha tabiak truh amaik ame kayua “chính sách không khoan nhượng” di rajaei Mỹ.  Yaom lac yau nan, min tui Bộ An ninh nội địa Mỹ, 46 dalam abih tih 103 uraniah dalam umo thun ini, daok hu khik caga meng rajaei jeng oh ka taom gaok veik amaik ame, kayua dom bruk an ninh.

 # Karei jang dom taneh ia daok pandik akaok kayua hu ralo menuac nhập cư, Rajaei Bồ Đào Nha daok chreih chrai taduan raok urang bhapbini lingiu biên giới. Tui kuhria, yaok thun taneh ia ini caong hu 75 rabau công dân barau piah khik caga urang ngak tani tanat. Piah Bồ Đào Nha jeng sa libik pachreih nao di urang nhập cư, rajaei hu ba tabiak rilo quy định barau piah pambuan adat likau thị thực ka sinh viên, anek saih atau dom urang caong khik ngak mbang, tabhia nan jhul khang bruk brei adat ka 30 rabau urang nhập cư njauk hukum hu quyền ngak saong ngak bruk di ini dalam tukvak tal.