#Harei kabroi (14/8), dalam mbang taduan raok dom urang dang akaok jabat lambaok Việt Nam daok di taneh ia lingiu dalam tuk Nyom biai Ngoại giao mbang ka 30 (rah tabiak dalam 5 harei, meng harei 13 tal harei17/8), lambaok urang pan akaok Đảng, Karja, ong Trần Đại Quang -akaok negar – hu panuac pok meyaom tadhau ayuh dom jak jeng di gah Ngoại giao dalam tukvak tapa. Ong Trần Đại Quang ndom lac, bruk đối ngoại daok mek hu rilo jak jeng praong, talei pambuak bruk ngoại hu peih praong saong dak harei dak tame dalam, hu kein laba, bruk mbeik drei tame dunya hu jhul khang, hu mbaok tame dom bruk di dunya, dom bruk ginum biai dalam bhum saong di dunya. Ong Trần Đại Quang daok hu panuac lac, gah ngoại giao njauk sami samar jang, peih ngak hu siam bruk khik caga kein laba di taneh ia, di bnagsa dalam saman bahrau.

# Dalam tuk pahadar 73 thun Cách mạng bilan 8 saong harei negar 2/9, 130 thun harei ndih tapui Chủ tịch Tôn Ðức Thắng (20/8/1888- 20/8/2018), Ðảng bộ, karja, bhapbini tỉnh An Giang peih rilo bruk ilimo nghệ thuật, thể dục thể thao, pakacah ngak mbang, thau dhar thau phuan…Dalam tỉnh hu tut angan 23 công trình an sinh xã hội, yaom jien abih tih labaih 22 tỷ đồng, dalam nan dom công trình ye: Trung ương MT negar Việt Nam padang 10 baoh sang jum pataom ngan saong paok jien 500 triệu đồng di libik bhapbini daok Sông Hồng, phường Mỹ Hòa, ban sit Long Xuyên; Padang ngak dua cống di xã Mỹ Hòa Hưng (ban sit Long Xuyên), yaom jien 1,6 tỷ đồng. Ban Trị sự T.Ư Phật giáo Hòa Hảo padang tatua Khánh An di xã Mỹ Hòa Hưng, yaom jien  500 triệu đồng. 

         # Salam uan harei roya Roya Aidil Adha, mesup ini (15/8), Hội Liên hiệp Urang kumei ban raya peih bruk taom mbaok urang jakar, urang hội lac urang Cam ngan saong bruk hu mbaok di labaih 200 adei sa-ai lac urang kumei hadah krah gheih ghang dalam bhap bini urang Islam ban raya. Rilo thun tapa, urang kumei Cam kham merat hu mbaok tame dom bruk di MTTQ saong Hội LHPN, tapa nan daong paglaong raidiuk di bhap bini Cam saong rik daong rilo jang ka bruk cakrok patagok di ban raya HCM. Dalam var pataom mbaok, rilo urang lambaok brei panuac thau dhar phor bruk sangka di Đảng, Karja saong di dom pakat Hội PN dalam bruk iek glang raidiuk mbang ngui daok dang ka adei sa-ai kumei, saong brei mboh hatai caong hu palagaih jang piah hu mbaok tame dom bruk ngak di Hội. Salam uan thun bharau 1439 Hijrah, Hội LHPN ban raya hu lin hadiah pandap gam saong dom panuac tadhau ayuh siam mekre di abih tal taong abih dom adei sa-ai kumei..

# Jaik 800 urang halan hatian lac urang jakar, công nhân viên dom Sở, mban, ngành dalam ban sit Gia Nghĩa, tỉnh Đắk Nông hu pataom tame harei tabiak bruk halan hatian brei darah pachreih tui bruk dom tanjaoh darah hồng hè thun 2018. Dalam dom urang ini hu jaik 600 urang halan hatian lac urang jakar, bol lin di dom libik nghiệp vụ Công an tỉnh Đắk Nông, Công an ban sit Gia Nghĩa. Ini lac mbang ka dua dalam thun ini, Công an tỉnh pambuak bruk saong Hội chữ thập đỏ tỉnh Đắk Nông peih bruk halan hatian brei darah.

 # Pasak Dự báo Khí tượng Thủy văn Quốc gia khan lac, mbuan rah tabiak ia dauk di dom bhum taneh dhaong, taneh biar, bhum tapen kraong, bhum lingiu ar pacang dom tỉnh An Giang, Đồng Tháp, Long An. Kuhria tal harei 20/8, ia glaong abih di kraong Tiền pak Tân Châu lac 3,85m, ala BĐ2 lac 0,15m; angaok kraong Hậu di Châu Đốc lac 3,25m, ala BĐ2 lac 0,25m. Tui nan mbuan hu ia dauk di dom bhum taneh biar, taneh dhaong, bhum lingiu ar pacang dom tỉnh An Giang, Đồng Tháp, Long An.

         # Saigon Co.op bahrau peih siêu thị Co.opmart Gò Dầu, daok di khu phố Rạch Sơn, ban sit Gò Dầu, huyện Gò Dầu, tỉnh Tây Ninh.  Ini lac siêu thị Co.opmart ka 4 di Tây Ninh saong lac siêu thị amereip abih dalam huyện Gò Dầu. Meng bruk peih siêu thị ka 98 di Co.opmart dalam taneh ia, Co.opmart Gò Dầu trun yaom khang tal 50% ka yaok rabau janih pandap (meng ini tal harei 23/8/2018) piah urang blei mbuan pilih ruah.

Khaw tin dunya

 # Mintri Thống Nhất Hàn Quốc  brei thau: Hàn Quốc meda ba sa phái đoàn tiền trạm nao tal Cộng hòa dân chủ bhapbini Triều Tiên piah pasang iek bruk kuhria caga ka mbang taom gauk di dom saong talah taluan dalam mesruh metak Triều Tiên. Phái đoàn hu gam urang jakar rajaei saong urang bhapbini, dalam nan hu dom urang daok pataom tame dom dự án pambuak bruk liên Triều. Phái đoàn meda tagok jalan tapa ceik Cưm- cang( Kumgang) di harei ( 15/8) saong kuhria caga daok veik di nan ka tal puac bilan 8 ini piah ngak dom bruk kuhria caga ka mbang taom gaok.

# Nhà mạng viễn thông quốc gia Ê-tếch-sa (ETECSA) di Cuba hu pabak dịch vụ mạng In-tơ-nét brei saoh ka labaih 5 triệu thuê bao di động dalam 1 harei di tukvak 8 maong dahlau di tuk tabiak mbaok dịch vụ mạng 3G akaok meti pak ini. Dahlau di nan, Cuba hu peih yaok rituh labik kết nối in-tơ-nét tapa Wifi, min meng dịch vụ in-tơ-nét angaok phone tangin, taong abih dom kết nối di bhap bini Cuba hu mbuan lagaih jang.

# Rilo nông trường di Israel daok pandar SupPlant, sa nền tảng ứng dụng trực tuyến meda duah pataom dữ liệu tui tukvak biak meng hệ thống cảm biến di mblang hamu saong khan brei thau hamiet tal urang nong. SupPlant pandar dom cảm biến pasang iek taneh riya, lingik tasik jeng ye dom cảm biến pasang iek nhiệt độ di hala, kích thước di baoh traoh gam saong rilo thông số karei piah daong urang nong thau hu dom salih barau dalam bruk cakrok di phun pala, dấu hiệu di bruk kurang ia, tabhia nan brei phép dom urang nan tabiak lệnh pruh ia ka phun pala tui caong di phun./.