** Harei 14/9, pak Bình Dương, Phaok Thủ tướng Thường trực raja-ei Trương Hòa Bình saong Phó Thủ tướng Singaore Tiêu Chí Hiền hu mbaok peih bruk pahadar 20 thun padang Khu công nghiệp Việt Nam - Singapore (VSIP). Gam haong talei rohim chính trị patagok dak harei dak jia gauk, pambuak gauk haong hadah hadai, Singapore urak ini lac sa gah pambuak bruk dang akaok di Việt Nam, hu labaih  1.600 dự án daok peih ngak saong yaom phun jien jaik 38 tỷ USD.

**  Dalam dom bruk di mbang pakacah tabung glaong pahadar 60 thun harei ilamu meng kan Kapul Liên hiệp dam dara Việt Nam, harei 14-9, pak xã Lũng Cú (huyện Đồng Văn, tỉnh Hà Giang), hu rah tabiak ralo bruk ngak an sinh xã hội, nan lac hatung hatai di dam dara dalam negar pamong tal urang jakar, chiến sĩ biên phòng saong bhap bani puk palei.

* * Pak Lâm Đồng, Ủy ban bhap bani tỉnh mboh tangin tame harak quyết định parabha brah daong ka anek saih  bhum biak kan kandahdi tỉnh dalam thun bac 2016 – 2017. Tui nan, brei brah daong ka jaik 2.500 anek saih, abih tih labaih 73 tấn brah. Anek saih mbang tui sarak ini, lac dom anek saih di dom sang bac trung học phổ thông, trung học cơ sở, tiểu học saong sang bac phổ thông bangsa gam bac gam daok di 12 huyện, bal dalam tỉnh Lâm Đồng.

** Kapul daong  urang kathaot Tây Nam Bộ brei thau: dalam 1 thun mai ini, Kapul hu padang ngak jaik 500 baoh sang brei ka urang kathaot; daong jien ka 50 urang ruak blac riah baoh hatai, yaok urang hu daong 100 triệu đồng;  brei pok jien bac, alin brei pandap ka uranaih jaoh jo, iek ruak brei saoh ka urang kathaot…

** Pak Trà Vinh, harei 14/9, Ủy ban bhap bani peih bruk padang ngak tua tame Khu kinh tế Định An. Ini lac sa dalam 8 khu kinh tế tapen tasik kayua Trung ương buh jien tame ngak. Ini lac khu kinh tế tổng hợp ralo gah, ralo bruk, dalam nan hu công nghiệp, thương mại, dịch vụ, du lịch, đô thị pambuak pagam haong kinh tế tasik.

** Pak tỉnh Thừa Thiên Huế, Kadung jien daong brei Uranaih tỉnh pambuak haong Pasak Dam dara uranaih tỉnh peih ngak danak dak “melam aia bulan bak baoh” ka jaik 1.000 uranaih jaoh jo, uranaih hu rai diuk kan kandah saong dom adei njaom jru mek kalik kruac dioxin dalam tỉnh. Ban tổ chức hu pok brei jaik 1.000 pok pandp saong 56 pok jien bac ka 56 anek saih, tui yaom jien abih tih  labaih 70 triệu đồng. 

**  Melam 14/9, pak Hà Nội, Phái đoàn Wallonie – Bruxelles pak Việt Nam pambuak haong Hãng phim Tài liệu saong Khoa học Trung ương peih Harei pataom Phim Dunya Hatai ranam Mons mbang ka 1 pak Việt Nam. Van peih pakak pachreih hu ralo bhap bani takre iek điện ảnh Việt Nam mai mong iek:  Harei pataom pakat Dunya Phim Hatai ranam Mons hu peih ngak mbang akaok meti dalam thun 1985 piah yaih khan tal bhap bani dom bộ phim ndom tal hatai ranam. Kuhria tal urak ini, Harei pataom hu 32 mbang peih ngak siam saong jeng sa Liên hoan phim hu angan je pak Bỉ, châu Âu saong dunya.

Khaw tin dunya:

** Harei kabroi 14/9, Ủy ban Đối ngoại Hạ viện Nhật Bản hu tabiak sarakt lên án mbang thử hạt nhân ka 5 di Triều Tiên dalam adit dahlau. Tui sarak nan, mbang thử hạt nhân lac sa bruk ngak “liều lĩnh" bo Nhật Bản, lac negar duy nhất hu njauk tấn công meng bom hạt nhân, oh chấp nhận hu". Sarak ndom lac: "Raja-ei Nhật Bản njauk duah jalan patagok áp lực ngan haong  Triều Tiên tapa dom jalan ngak  di negar ini, jeng yau dom phản ứng di Hội đồng Bảo an Liên hợp quốc".

** Harei kabroi 14/9, dom urang jakar pakat glaong iek gah tasik di Nhật Bản saong Trung Quốc hu mbang ginum biai dui atah dua harei piah pacang cakak bruk mbuan rah tabiak dom bruk oh thau dahlau angaok tasik Hoa Đông. Pasak di mbang ginum biai nan lac jhul pakhang bruk peih ngak "cơ chế liên lạc angaok tasik saong angaok langik" di dom urang jakar quốc phòng dua negar piah pacang cakak dom bruk suan meda ba tal  srau dhau angaok tasik Hoa Đông.

**  Harei kaboi 14/9, raja-ei Thái Lan hu tabiak sarak brei padeih bruk đấu thầu pablei brah khik piah dalam dom gilang khik piah di Karja piah plaih bruk labaih brah pablei tabiak darak pasar dahlau di vụ yuak kuak dakam bilan 11 anak tal. Bruk ini hu Thủ tướng Thái Lan Prayut Chan-ocha (Pray-út Chan-ô-cha) brei thau hadei di mbang nyaom jeng dalam harei di Ủy ban Sarak padai brah Thái Lan kayua ong dang akaok. Tal urak ini dalam gilang khik piah di negar ini jeng daok jaik 8,4 triệu tấn brah meng danak dak blei tame daong yaom brah di saman raja-ei dahlau./. 

Jasi