# Biar harei 16/8, ala bruk tacei ba di akaok Quốc hội Nguyễn Thị Kim Ngân, Ủy ban Thường vụ Quốc hội hu nyaom mbang peih talaih, brei panuac ka bruk kuhria caga mbang nyaom ka dua, Quốc hội mbang XIV, tui kuhria meda peih tabiak dalam harei 20-10-2016 saong tamat di harei 18-11-2016. Pok panuac di van nyaom peih talaih, Chủ tịch Quốc hội Nguyễn Thị Kim Ngân pandar dom urang di Ủy ban Thường vụ Quốc hội pataom lực lượng kuhria caga dom asal kadha siam abih piah ka mbang nyaom ka dua mek hu baoh jeng siam mekre.

      # Jeng dalam harei 16/8, di jabat ngak bruk rajaei, Thủ tướng Nguyễn Xuân Phúc hu taom gaok dom VĐV, huấn luyện viên kapul thể thao VN hu mbaok tame Thế vận hội Olympic 2016, dalam nan hu xạ thủ Hoàng Xuân Vinh, urang mek hu sa huy chương ameh saong sa huy chương pariak janih cuh phao, ba mai hadah mbaok ka thể thao taneh ia drei. Thủ tướng ndom cambaih, ini lac bruk praong oh lac di eng gah thể thao, bo daok ba mai bui sambai, hatai jia di bhap bini ngan saong thể thao VN. Thủ tướng caong khin, meng dom bruk praong prang ini, thể thao VN patui mek hu ralo jak jeng glaong dalam pakacah thể thao dunya.

     # Pak bal raya Hồ Chí Minh, Thượng tướng Tô Lâm - Bộ trưởng Bộ Công an hu pok brei gilac angan Anh hùng lực lượng vũ trang bhap bani jaman mesruh metak taong Mỹ daong taneh aia ka ong Lê Thanh Vân, Urang dahlau diah ngak  Giám đốc Công an bal raya, urang dahlau diah ngaok akaok ban Nội chính Thành ủy bal raya Hồ Chí Minh. Ong Lê Thanh Vân (daok hu angan iew lac Trần Văn Tú, Năm Tú, Sáu Ngọc, Ba Tâm), ndih tapui thun 1921, palei di huyện Thạnh Phú, tỉnh Bến Tre, lahik thun 2005. Ngan haongdom thành tích ngak hu, ong Lê Thanh Vân vinh dự hu Đảng saong Karja pok meyaom ralo huân huy chương praong glaong yau: Huân chương Độc lập hạng Nhì, Huân chương Quân công hạng Nhất, Huân chương Kháng chiến chống Pháp hạng Nhất, Huân chương Kháng chiến chống Mỹ hạng Nhất saong ralo binah pok meyaom prong glaong karei. Saong urak ini hu pok brei gilac angan Anh hùng lực lượng vũ trang bhap bani jaman mesruh metak taong Mỹ daong taneh aia.

    # Hadei di 5 thun peih bruk phổ cập pato megru mầm non ka uranaih umo 5 thun di tỉnh Lai Châu, tal urak ini hu 100% dom xã hu sang bac mầm non. Dalam nan hu 26/139 sang bac mầm non mek hu chuẩn pakat negar. Taphia di nan, kapul gru pato saong urang jakar khik iek pato megru mầm non hu pabak ka số lượng saong chất lượng. Yaok thun, uranaih umo 5 thun nao bac nan lac 99,7%; 100% dom uranaih umo 5 thun hu bac danak dak pato megru mầm non barau; 99,8% dom uranaih umo 5 thun hu mban bán trú; 100% dom uranaih umo 5 thun hu bac var sa harei saong 100% dom uranaih bangsa takik hu caga bac sap Việt dahlau tuk tame tal 1.

    # kapul nyaom Chữ thập đỏ huyện Quế Phong bahrau pambuak haong Kapul nyaom Chữ thập đỏ tỉnh Nghệ An saong Sang bac đại học Y khoa bal Vinh peih bruk iek ruak, brei jruh oh mek jien ka urang kathaot, urang taha metui saong bhap bani urang bangsa takik dalam xã Cắm Muộn, huyện Quế Phong. Kapul nyaom hu nao iek ruak, tacei pato khik caga pren yava saong brei jru thaoh ka jaik 330 urang dalam xã. Gam haong bruk iek ruak, brei jru oh mek jien, kapul nyaom y, bác sĩ di sang bac đại học Y khoa bal Vinh daok tư vấn ka mikva jalan pacang caga ruak saong khik caga pren yava dalam tuk langik tasik salih bilan, taphia di nan brei  30 angan jru iek ruak ka bhap bani, ngan haong phun jien labaih 35 triệu đồng.

     # Sở Y tế ban Đà Nẵng saong Viện Pasteur Nha Trang hu nao pasang iek bruk pacang cakak jit ruak pandiak tabiak drah di ban Đà Nẵng. meng akaok thun tal ini, hu 2.240 urang ruak pandiak tabiak drah, oh hu thei metai. Dom urang ruak pandiak tabiak drah dom bilan jaik di ini hu patrun duk saong dom bilan akaok thun ini. Tui kuhria dalam tukvak tal, langik pandiak, hajan oh lagaih ngak hu ralo jamuok saong loăng quăng nan ye meda tamuh jit ruak pandiak tabiak drah di ban Đà Nẵng.

     # Pak Bình Phước, urang njauk ruak pandiak tabiak darah daok tagok khang, abih di nyu lac labik bhum atah bayah. Tui pasak Y tế dự phòng tỉnh Bình Phước, urang njauk ruak pandiak tabiak darah tagok meng akaok thun tal ini labaih 1.900 urang, ralo jang 4 mbang dut haong tukvak ini thun 2015, oh ka mboh urang halei metai. Ong Nguyễn Văn Sáu, Phaok Akaok Pasak Y tế dự phòng tỉnh Bình Phước brei thau dom jalan pacang cakak ruak pandiak tabiak darah di gah y tế puk palei: “Kasa nan lac dak padang kế hoạch pruh jru diện rộng, padam jit ruak pandiak tabiak darah pak dom xã, phường daok hu jit ruak pandiak tabiak darah; kadua 2 nan lac patagok bruk pathau khan piah ka bhap bani chủ động hu mbaok tame chiến dịch pacang cakak ruak pandiak tabiak darah; patagok bruk pasang iek dom urang ruak yaok harei piah samar hu jalan xử lý sruh jit” .    

       Patui di ini dom khau tin dunya:

      # Dalam tukvak tapa, dom urang ruak pandiak tabiak drah tagok glaong di tỉnh Quảng Đông di TQ. Meng akaok thun tal ini hu 107 urang ruak pandiak tabiak drah, ralo jang 60% duk saong thun dahlau. Eng ban Quảng Châu, thủ phủ tỉnh Quảng Đông, dom urang njom ruak lac tagok glaong, ngan saong 41 urang. Tui thống kê di Tổ chức Y tế dunya (WHO), jaik 40% menuac sia dunya, samu 3,9 tỷ urang, mbuan njom ruak pandiak tabiak drah. Yaok thun, jaik 400 triệu urang di labaih 128 taneh ia hu njauk ruak ini ralo meng lac di dom taneh ia châu Á, châu Phi saong Mỹ Latinh, dalam nan hu jaik 22 ribau urang ruak metai. Dalam meteh abhap gilac mai ini, dom urang njom ruak pandiak tabiak drah hu ralo jang 30 mbang ngan saong labaih 50% menuac sia dunya mbuan njauk ruak.

     # Harei 16-8 sa sruh kapal haok trực thăng hu laik trun pak sa palei gah pai di Cộng hòa Séc, ngak ka dua urang angaok kapal haok metai. Bala rah tabiak dalam 3 tuk 30 minit di sa mblang taneran daok kreh dua palei Ri-b-ni-xe (Rybnice) saong Ca-z-nây-ốp (Kaznejov) gah pai negar ini, atah bal Praha jaik  100 km gah pai. Cảnh sát jeng brei thau sruh kapal haok laik nan lac janih kapal haok trực thăng hạng njuan 4 labik daok Rô-bin-sơn 44 (Robinson 44) kayua Mỹ ngak tabiak. Janih kapal haok ini bhian hu pandar ka dom mục đích cá nhân yau rivang ma-in, atau dalam bruk pato pathram par. Makna ba tal mbang laik kapal haok ini daok duah thau.

    # Urang ngak praong negar Anh barau mbaoh tangin tame kế hoạch peih praong dự án trang trại điện ngin praong abih dunya di labik tasik biển Bắc, piah patagok sản lượng điện pabak ka taneh ia ini. Dự án trang trại điện ngin hu angan Hon-xi Tu kayua Công ty năng lượng Đông (DONG) đầu tư padang ngak, lac sa phần dalam kế hoạch patagok đầu tư sản lượng điện piah caga  bruk kurang điện dalam tukvak tal. Meyah hu peih praong, dự án trang trại điện ngin Hon-xi Tu, pandar  300 tuốc-bin ngin khổng lồ, ngan saong công suất 1,8 gi-ga-oắt (gigawatt) hu ginup pabak  điện ka jaik 1,6 triệu baoh sang di taneh ia ini./.