# Akaok Quốc hội Nguyễn Thị Kim Ngân bahrau mai ngak bruk haong urang pal akaok tỉnh Bạc Liêu. BREI panuac di van ngak bruk, akaok Quốc hội Nguyễn Thị Kim Ngân brei mboh hatai bui sambai ka bruk jak jeng dalam cakrok patagok kinh tế, xã hội 6 bilan akaok thun saong ndom lac, Bạc Liêu njauk patagok pren khang di sa tỉnh bhum taneran kraong Cửu Long hu jalan tasik atah, dalam nan hu patagok điện angin.

# Brei mesraiy tui sarak lac sa dalam dom libik hadah ka patrun kathaot khang kajap di Việt Nam tukvak tapa. Tal urak ini hu jaik 1 triệu 500 tuai lac bhapbini bangsa takik daok hu mbang tui dom danakdak sarak meng gilang pariak sarak karja, ngan saong yaom jien sraiy abih tih labaih 179 rabau tỷ đồng. Tui kuhria di gah gilang pariak, bruk pandar jien sarak ini hu daong ka labaih 4,5 triệu sang yam tapa tanut kathaot, dak harei dak rik daong oh sit ka bruk salih bahrau ia mbaok palei pala, bhum bhapbini bangsa takik bhum atah bayah di taneh ia drei.

# Huyện Tây Giang, tỉnh Quảng Nam daok peih bruk daong ka 51 baoh sang di xã Ch’ơm bahrau tapeih tabung sang saong khut khat njam patam kayua hajan prong, angin ribuk. Anek meta, huyện Tây Giang brei buh brah khik piah, daong ka yaok baoh sang njauk khat lahik 15 kg brah saong aia mesil, menyek mbang, ikan thu… daong ka mikva grap tanat rai diuk. Dahlau di na, harei 14/6, dalam xã Ch’ơm, huyện Tây Giang, tỉnh Quảng Nam rah tabiak hajan ribuk prong ngak brei 51 baoh sang di bhap bani daok di 2 palei A’choolr saong Ch’nooc njauk tapeih tabung.

# Tui ông Nguyễn Văn Hiếu, Phó Giám đốc Sở pato megru ban raya TPHCM, tal tukvak ini, bruk kuhria caga cơ sở vật chất, pasram urang jakar maong pakacah, pasang iek, thanh tra duh ka mbang pakacah Trung học phổ thông negar thun 2018 hu blaoh blai. Thun ini, Sở pato megru ban raya HCM hu mintri pato megru jao bruk peih cụm pakacah ka dua ka labaih 78 rabau thí sinh dalam tỉnh. Ban raya hu abih tih 124 libik pakacah ngan saong labaih 8 rabau urang jakar maong iek,pasang iek pakacah.

# Hadei di ini lac kết quả dom mbang dit blaong di vòng chung kết (VCK) World Cup 2018 rah tabiak  harei 20/6 saong page mesup harei 21/6:

Mbang caoh di Uruguay saong Saudi Arabia tamat ngan haong tỉ số 1-0. Bruk ini jeng lac Uruguay ba tangin Nga tame dhi dalam di bảng A. Dalam tuk nan Saudi Arabia saong Ai Cập lac dom kapul njauk tabiak truh  World Cup 2018. Daok di bảng B, Bồ Đào Nha jayak 1-0 anak Morocco dalam mbang caoh ka dua. Meng jayak ini Bồ Đào Nha hu 4 điểm  hadei di dua mbang caoh, anak meta lac ba akaok bảng B. Meng baoh dit tame di Diego Costa hu daong ka Tây Ban Nha mek hu 3 điểm anak Iran.

Khaw tin dunya

# Gah Y tế dunya barau khan brei thau, jit ruak Ê-bô-la di Cộng hòa dân chủ Công-gô barau hu pacang cakak saong urak ini oh hu urang halei bahrau njauk ruak kuhria meng di tuk hu sa urang metai barau abih di harei 9/6 meng blaoh. Abih tih dom urang njauk pasang iek hu njaom ruak hai oh jeng trun takik rilo, ngan saong abih tih 1.417 urang barau tapa blaoh tukvak pasang iek bắt buộc 21 harei.

# Urang jakar ngak praong di Mentri Môi trường Trung Quốc bahrau bei thau, negar ini meda peih jalan ngak 3 thun piah ngak salih mục tiêu chất lượng không khí hacih sa-at jang di puac thun ini. Jalan ngak ini piah pasiam veik chất lượng không khí jeng yau pabak hu bruk caong khin di bhap bani. Tui nan, tal thun 2020, lượng khí thải S02 (sulphur dioxide) saong amoniac oxit meda trun 15% dut haong tanut di thun 2015, dalam tuk nan di dom bal hu tiêu chuẩn chất lượng không khí biar meda hu mboh mật độ dhul mul PM 2.5- sa tanut quan trọng ka ô nhiễm không khí, trun takik abih 18%. 

# Rajaei Mông Cổ barau tabiak bruk pakauk pandar kadung nhựa pandar sa mbang dalam taneh ia. Bruk ini hu ba tabiak ngak tui meng harei 1/3/2019. Asal kadha ini hu akaok mintri Môi trường saong Du lịch Mông Cổ Nam-xrai Trê-ren-bát ba tabiak harei 20/6. Tui ông Trê-ren-bát, lệnh pakauk piah caga dom sang mac tuh kadung nhựa tabiak alam moi truong. Ini jeng lac panuac cảnh báo ka urang bhapbini saong dom gah blei pandap tame taneh ia. Jabat Thanh sát karja saong gah Hải quan Mông Cổ meda pasang iek bruk ngak tuk adat pakauk./.