# Page ini (24/1), Thủ tướng Nguyễn Xuân Phúc saong hadiuk di gait tagok jalan nao Ấn Độ piah hu mbaok tame Nyaom biai pakat glaong ASEAN-Ấn Độ saong hu mbaok dalam lễ pahadar 69 thun Harei Cộng hòa Ấn Độ từ 24-26/1/2018. Ngan haong asal kadha "Klah rabha yaom glaong gam sa thar vak", nyaom biai nan lac tuk piah jhul pakhang jang talei rohim pambuak bruk di Việt Nam - Ấn Độ, taphia di nan brei mboh cambaih bruk điều phối di Việt Nam dalam talei rohim pambuak bruk Việt Nam - Ấn Độ. Ấn Độ urak ini lac sa dalam 10 negar pambuak bruk pablei salih prong abih di Việt Nam ngan haong kim ngạch pablei salih dalam thun 2017 kuhria hu labaih 7,5 tỷ USD. Kuhria tal abih bilan 11/2017, abih tih phun jien tut angan di Ấn Độ buh tame  Việt Nam lac 756 triệu USD. 

# Gah khik ramik darak pasal, Bộ đội Biên phòng ban Đà Nẵng saong  Công an quận Liên Chiểu barau peih bruk cuh klak labaih 76.000 paok pakao hala blei lậu meng taneh ia lingiu, pakao hala ja hu: pakao Jet, pakao 3 ka 5 (555) saong  Esse di mblang hareik Khánh Sơn, phường Hòa Khánh Nam, quận Liên Chiểu. Ini lac pakao hala blei lậu meng taneh ia lingiu, pakao hala ja gaok dom gah chức năng mek khik jaik ini dom harei.

# Pak Hà Nội, Hiệp hội An toàn thông tin Việt Nam bahrau tabiak mbaok Klup kapul Chữ ký số saong giao dịch điện tử Việt Nam. Bruk tabiak mbaok klup kapul ini  lac kadha prong dalam bruk cakrok patagok di gah chữ ký số, xác thực điện tử saong giao dịch điện tử di negar drei. Dom doanh nghiệp công nghệ chữ ký số hu jalani pambuak bruk piah gam cak rok patagok bruk ngak ini.

 # Tui pasak pachreih nông – pachreih ngak ikan tỉnh Ninh Thuận, urak ini taong abih kapal gilai di tỉnh taong cap di tasik jeng hu pabak mac định vị, mac thông tin liên lạc saong 60% mac radar hàng hải. Taphia nan, rilo kapal jeng daok pandar mac dò ngang, công nghệ đèn led truac hadah, ngak hầm cách nhiệt khik caga pandap meng vật liệu Foam PU…

# Biar harei kabroi (23/1), U23 Việt Nam hu sa mbang caoh biak naih gheih, tuk mek hu jayak anak U23 Qatar ngan haong tỉ số 4-3 dalam mbang caoh penalty. Dahlau di nan, hadei di 120 minit pakacah, U23 Việt Nam hòa 2-2 haong U23 Qatar. Ini lac mbang akaok meti dalam dakrai sajarah, U23 Việt Nam tame tal hung kết di mblang ma-in châu lục. Đối thủ di U23 Việt Nam di mbang chung kết nan lac Uzbekistan.

Khaw tin dunya

# Ceik apui Kư-sát-su Xi-rên, daok gah Tây Bắc ban ine Tô-ki-ô, Nhật Bản nyu pruh rilo mbang bau dhur khang ngak takik abih 15 urang njauk rambuaic. Tui gah Khí tượng Nhật Bản, thak par tagok bak abih  meng gah meraong tabung ceik gam saong nham thạch, patau haluk pruh khang. Gah Khí tượng Nhật Bản hu patagok tanut cảnh báo ceik apui tagok pakat 3 dalam dom tanut cảnh báo ceik apui hu 5 pakat saong tacei pato urang bhapbini plaih atah libik ceik apui daok pruh.

# Pasak Khí tượng Negar Trung Quốc daok khik tanut cảnh báo hijao – tanut biar di abih dalam 4 tanut brei thau lingik tasik oh siam di Trung Quốc – hadei di không khí la-ar daok pambak prong tabiak ralo labik di negar ini. Tui nan, dalam dom harei meng 23-26/1, nhiệt độ meda trun 6-10 độ C di gah miền Trung saong Đông Trung Quốc.

# Dom kapul tiền trạm kuhria caga ka Thế vận hội bilan Đông Olympic Pi-ông-chang 2018 di Hàn Quốc saong Triều Tiên daok kham merat kuhria caga ka bruk ini. Kapul tiền trạm di Triều Tiên nao tapa Hàn Quốc piah pasang iek dom libik parang me-in nghệ thuật di Thế vận hội bilan Đông Olympic Pi-ông-chang 2018 barau blaoh hu nao veik Triều Tiên hadei di dua harei ngak bruk di Hàn Quốc./.

Jasi saong Thuy Linh lang tapa sap Cam