# Tui danak dak mbang nyaom ka 4, Quốc hội mbang 14, page ini (25/10), dom urang QH pang harak langyah, taduan mek panuac rik daong, pasiam veik Dự án Hukum Quy hoạch saong ginum biai pak hội trường ka dom dom asal kadha daok hu panuac karei di gauk ka dự án hukum ini. Biar harei, Quốc hội meda tabiak bruk miễn nhiệm chức vụ Akaok mentri Giao thông Vận tải ngan haong ong Trương Quang Nghĩa saong chức vụ Tổng Thanh tra Raja-ei ngan haong ong  Phan Văn Sáu; pang Thủ tướng Raja-ei Nguyễn Xuân Phúc puac harak brei thau ka bruk bổ nhiệm menuac ngak Akaok mentri Giao thông Vận tải saong Tổng Thanh tra Raja-I; ginum biai pak Đoàn ka bruk phê chuẩn bổ nhiệm menuac ngak akaok mentri Giao thông Vận tải saong Tổng Thanh tra raja-ei. 

# Di jabat ngak bruk Trung ương Đảng, Tổng Bí thư Nguyễn Phú Trọng barau taduan ong Sonexay Siphandon, Ủy viên mintri Chính trị, Phó Thủ tướng Lào ba akaok kapul urang pakat glaong rajaei Lào mai rivang saong ngak bruk di Việt Nam.

# Dalam 5 thun (2012 - 2017), kapul urang kamrei tỉnh Điện Biên pambuak haong Pasak pato bruk ngak peih 366 tal pato bruk ngak ka labaih 15 ribauurang lac urang bangsa takik. Kapul hu padang sa hợp tác xã jik pet jih dalah bangsa Thái pak xã Thanh Nưa, huyện Điện Biên hu 30 urang; peih ngak siam bruk ngak  padai chất lượng glaong, ba mai kein laba kinh tế, dak harei dak paglaong jien mek tame ka yaok baoh sang, grap tanat rai diuk.

# Di ban sit Gia Nghĩa, tỉnh Đắc Nông, Ủy ban bangsa barau pambuak bruk saong Hội đồng bangsa di Quốc hội, Ub bhap bini tỉnh Đắc Nông saong gilang pariak dunya peih ndom biai patagok bangsa takik thun 2017 ngan saong kadha xúc tiến pambuak bruk công tư dalam patagok khang kajap bhum Tây Nguyên. Tapa nan, ralo tham luận, ralo hatai sahneng bahrau, dom jalan meda ngak hu siam dalam pambuak bruk công  - tư saong trách nhiệm XH di DN; pambuak bruk công – tư, patrun kathaot saong patagok khang kajap bhum urang bangsa takik.

# Đồn Biên phòng Ea H’leo, Bộ đội Biên phòng tỉnh Đác Lắc pambuak haong  UB bhap bani xã Ia Lốp, huyện Ea Súp, tỉnh Đắc Lắc peih tal pato akhar huroh ka bhap bani oh ka thau akhar haroh dalam xã. Hu mbaok tame tal bac ini hu labaih 30 urang, umo meng 15 tal 60, ralo meng lac urang bangsa Thái, hu rai diuk kan kandah, oh hu điều kiện bac da-a.

# Tuk 17 tuk meteh biar harei 24/10, baoh sang 2 tal daok dalam pasar phụ tùng radaih mac Tân Thành angaok jalan Phạm Hữu Chí, Phường 12, Quận 5, ban raya Hồ Chí Minh khuah. Pui khuah meng tal 2 di baoh sang saong khuah khang. Cảnh sát padam khuah quận 8 gam saong dom đơn vị puk palei jeng hu mbaok samar padam khuah. Mbang khuah nan patuah oh hu thei metai min ralo drap ar, pandap panda di labik tal dua di baoh sang njauk pui mbang.

# Sang mac thủy điện Hàm Thuận – Đa Mi daok kuhria taoh aia xả lũ điều tiết tapa binek tràn hồ Hàm Thuận ngan haong lưu lượng meng 25m3/s tal 50m3/s  meng 9 tuk harei 26/10 anak tal. Labik xã Đa Mi, huyện Hàm Thuận Bắc, tỉnh Bình Thuận daok gah ala tràn xả aia meda dauk trak, gam haong nan aia sua trun gah ala kraong La Ngà meda pambak prong tal labik ngak nong pala drak di dua huyện Tánh Linh saong Đức Linh.

Patui di ini dom khau tin dunya:

# Di Ðại lễ đường Nhân dân di ban ine Bắc Kinh, nyaom ROYA pakat negar mbang ka 19 Ðảng Cộng sản Trung Quốc barau tamat hadei di 7 harei ngak bruk. Di mbang tamat bruk, dom urang dalam nyaom roya  hu biểu quyết brei tapa dom sarak di nyaom raya ka báo cáo chính trị di mban Chấp hành T.Ư mbang 18, Báo cáo bruk ngak di Ủy ban pasang iek Kỷ luật T.Ư mbang 18 saong dự thảo pasiam veik Ðiều lệ Ðảng.

# Akaok Cục bruk ngak, mentri Lao động Thái Lan, Ong Va-ra-non (Varanon Peetiwan) bahrau brei thau, dalam kham merat ngak brei njauk adat hukum ka urang ngak meng negar lingiu tame Thái Lan, raja-ei Campuchia hu peih klau pasak xác minh quốc tịch pak Băng-cốc (Bangkok), Ray-dong (Rayong) saong Xổng-khả (Songkhla) piah pabak dịch vụ ka urang ngak mai meng Campuchia hu thẻ hồng. 

# Sa mbang megei baoh taneh khang 6,6 độ rích-te barau rah tabiak di bhum gah kreih negar In-đô-nê-xi-a. Kayua tâm chấn daok biak dalam ala mbat tasik nan ye jabat ini oh ba tabiak panuac cảnh báo sóng thần. In-đô-nê-xi-a daok dalam vành đai pui di Thái Bình Dương nan ye bhian njauk dom mbang megei baoh taneh./.