# Biar harei 28-6, Phaok Akaok negar Đặng Thị Ngọc Thịnh taduan raok kapul urang lambaok hu 50 dam dara, uranaih naih gheih di tỉnh Hà Giang. Phaok Akaok negar pok meyaom dom siam mekre bo dam dara uranaih tỉnh Hà Giang ngak hu dalam tukvak tapa, abih di nyu nan lac 50 anek saih lac kareih camin dalam bruk bac megru, dom chỉ huy Đội baih gheih, taphia di nan lac dom kareih camin kham merat yam tagok dalam rai diuk pak puk palei. Phaok akaok negar ndom lac, Đảng saong Karja tuk halei jeng sangka, iek glang tal bruk pato megru, abih di nyu nan lac ngan haong dom bhum atah bayah, labik kan kandah.

       # Ngak tui tacei pato di Thủ tướng Nguyễn Xuân Phúc, jabat chức năng tỉnh Kon Tum thau hu menuac ngak song dok duah thau cambaih laih bruk palai pajoa glai song pajeng ba kayau suan adat di labik glai di Công ty lâm nghiệp Đắc Glei. Gam song bruk duah thau cambaih laih piah langyah catang bruk palai pajoa glai di kol blah glai, jabat chức năng tỉnh jeng dok pasang iek hu atau oh hu bruk dom urang jakar bilai khik caga glai di Công ty lâm nghiệp Đắc Glei mbang jien piah daok kandang brei kol blah glai mek kayau.

        # Harei 28/6, Phaok Thủ tướng Vũ Đức Đam mai rivang dom công ty hu ralo urang ngak, ngak siam bruk iek glang sangka tal rai diuk ka urang ngak pak tỉnh Bình Dương yau: Công ty Sao Việt, Công ty Jik 3-2, Công ty takhaok Shyang Hung Cheng. Pak dom labik mai rivang, Phaok Thủ tướng Vũ Đức Đam caik ralo tukvak ndom biai haong urang ngak, oh takik urang dalam nan hu ngak bruk ralo thun saong caong khin pambuak pagam suai lavik haong doanh nghiệp. Phaok Thủ tướng brei thau bruk daok pamoang ngak nan lac padang labik daok, đô thị bahrau njauk hu ginup meng sang brei ka urang hu jien mek tame ralo, tal sang brei ka urang hu jien mek tame mbiah saong takik…

        # Harei 28/6, di ban Huế, Tạp chí Thông tin đối ngoại, Ban Tuyên giáo Trung ương peih Nom biai urang pambuak bruk bhum kreh negar  - Tây Nguyên thun 2016. Tuk vak tapa, Tạp chí Thông tin đối ngoại dak harei dak hu rilo urang puac, urang vak, ngak siam bruk hu jao brei. Urak ni Tạp chí dok caga tabiak blah thông tin điện tử đối ngoại meng sap Trung.

         # 6 bilan tapa, dalam negar hu labaih 54.500 doanh nghiệp padang ngak bahrau ngan haong phun jien đăng ký nan lac 427 ribau 762 tỷ đồng, tagok meng số lượng tal phun jien đăng ký dut haong tukvak ini thun dahlau. Yau nan min, dom doanh nghiệp hu ngak blaoh harak adat piah giải thể, padeih ngak dalam 6 bilan tapa tagok tal labaih 36.600 doanh nghiệp. Yau nan, kuhria rah tapa yaok harei hu 203 doanh nghiệp giải thể, padeih ngak. Gah pablei salih, pasiam veik radaih ôtô, radaih patuh hu doanh nghiệp padaih ngak rilo di abih, jaik 13.500 doanh nghiệp. Dom ngành, dom gah daok hu rilo doanh nghiệp padang ngak bahrau dut haong tukvak ini thun dahlau yau: pablei salih taneh riya, y tế saong bruk daong ba rahra, bruk ngak dịch vụ karei karei, pato megru.

        # Harei 28/6, Chi cục An toàn vệ sinh thực phẩm tỉnh Tiền Giang brei thau, bruk 62 urang ngak di Công ty dệt len Ecoway di xã Phú Nhuận, huyện Cai Lậy njauk jru mek pandap mbang njauk ba tame sang iek ruak dalam harei 15/6 meng bloh, bo rayo sap ndom VN hu khan brei thau, lac kayua pandap mbang njom vi sinh rilo  jang 3 mbang tanut brei adat. Labik tanek mbang ni njauk taong phạt 30 triệu đồng song njauk baar jien dut drah, jien tui iek duah thau song jien iek ruak.

     # Page harei 28/6, pak ấp Bình Định, xã Bình Thành, huyện Thanh Bình, tỉnh Đồng Tháp  rah tabiak mbang glut jaleih taneh takai kraong Cả Tre atah jaik  20 mét, mbang dalam tame ar labaih 7 mét. Kayua glut jaleih di tuk page mesup jaik 5 tuk 25 minit nan ye ngak ka kho caik pandap padang ngak saong labik ar pacang di baoh sang ong Phạm Thanh Tùng laik abih trun kraong. Baoh sang jaik nan di amuk Phạm Thị Đồng Ẩn njauk panduan ba samar chip. Urak ini, bruk glut jaleih taneh takai kraong daok rah tabiak, ngak kan kandah trak tal rai diuk manuac urang saong drap ar di bhap bani.

    Patui di ni dom khau tin dunya:

     #Tổng thư ký Liên hợp quốc Ban Ki Mun (Ban ki-Moon) harei 28/6 hu panuac ieu Ixraen klak bruk pacang cakak dải Ga-da (Gaza). Bruk ni dok ngak kan kandah tal rai duik di bhap bini, pacang jalan kinh tế song dok ngak kan kandah tal bruk pasiam veik labik ni. Panuac ieu di Tổng thư ký Liên hợp quốc hu ba tabiak sa harei hadei di tuk Ixraen khan lac bruk pacang cakak dải Ga-da tui jalan tasik daok hu peih ngak tui sa thỏa thuận di Thổ Nhĩ Kỳ song Ixraen piah pasiam veik talei rohim di 2 negar.

      # Harei 28/6, Quốc hội In-đô-nê-xi-a tabiak quyết định tagok kadung jien quốc phòng, tagok tanut 8 tỷ 250 triệu đô la, nan lac tagok jaik 10% dut haong kadung jien akaok mereip di thun 2016. Akaok Mentri Quốc phòng Ria-cu-đu (Ryamizard Ryacudu ) brei thau sa binah dalam kadung jien bahrau meda hu pandar piah pasiam veik căn cứ không quân saong padang ngak bahrau sa pabah lamnge angaok pulao Na-tu-na piah palaghaih ka dom gilai mesruh saong kapal haok mesruh pak ini. Bruk nan hu ba tabiak dom harei hadei di tuk Tổng thống Giô-cô Uy-đô-đô (Joko Widodo) mai rivang pulao  Natuna piah brei mboh quyền ngak po di In-đô-nê-xi-a ngan haong labik ini, saong pasang iek catang jang dom bhum taneh đặc quyền kinh tế.

      # Kadung jien uranaih Liên hợp quốc bahrau hu panuac lac tal thun 2030, 69 triệu uranaih umo ala 5 thun mbuan si metai meyah dunya oh hu dom bruk ngak siam lagaih piah jhul pakhang bruk dong ka dom negar dok pataogk. Harak pathau khan ndom lac, meyah dunya oh pataom sangka tal rai duik di dom uranaih kan kathao eik lipa di abih, dom adei meda dang anak bruk metai lihik kayua dom makna meda pacang cakak hu yau njauk ruak truyền nhiễm, daok di labik mesruh metak  atau gaok kan kandah kaua langik pandiak tagok di dunya./.