# Harei 29/10, pak bal Đà Nẵng, akaok negar Trần Đại Quang gam haong hadiuk di gait dang tabiak Tổng duyệt dom bruk ngak dalam Adit pakat glaong APEC 2017. Dalam nyaom biai pataom iek veik hadei di mbang Tổng duyệt, akaok negar  Trần Đại Quang ndom lac, bruk peih ngak thun APEC 2017 nan lac bruk đối ngoại prong di taneh aia dalam jaman bahrau, brei mboh jalan kham merat yam tame dunya prong dalam di Đảng, karja; lac peih tabiak piah patagok bruk ngoại giao ralo gah, ngak siam jang talei rohim pambuak nao mai di dom taneh ia pambuak bruk dalam khu vực saong angaok dunya. 

# Pamaong tal pahadar “100 thun Cách mạng tháng Mười Nga” melam 29/10, di Hà Nội, rayo sap ndom VN pambuak saong Đại sứ quán Liên Bang Nga di Việt Nam saong pasak ilamu- Khoa học Nga di Hà Nội peih melam taom gaok ndom meyai nao mai – nghệ thuật ngan saong kadha “Dan miat kadha daoh bilan 10”.Thủ tướng rajaei Nguyễn Xuân Phúc saong diuk di ong mai hu mbaok. Dalam danak dak,  urang hu pang, hu maong dom kadha daoh tamia di Nga hu bhap bini takre yau: Giã biệt adei kamei Slavơ, meng Razlip tal Pắc Bó, Tình ca thảo nguyên.

# Kuhria meng tuk Việt Nam hu mbaok tame APEC thun 1998, Diễn đàn ini hu jeng sa pren khang piah daong ka bruk salih bahrau, pasiam veik cơ cấu kinh tế, salih jalan patagok saong ba kinh tế di negar drei tagok pakat dunya ngan haong bruk hu mbaok tame Gah Pablei salih dunya (WTO) hadei di nan. Nan lac panuac ndom di Phaok akaok Ủy ban negar APEC 2017, Thứ trưởng thường trực Mentri Ngoại giao Bùi Thanh Sơn dahlau di Adit pakat glaong APEC, tui kuhria meda rah tabiak pak Đà Nẵng akaok bilan 11 tal. 

# Urak ini, bruk palao nerak trun kraong ribaong thủy lợi daok dak harei dak ralo di Ninh Thuận. Bruk ini nyu ngak ô nhiễm môi trường saong gar hệ thống kraong ribaong daok pabak ia ka bruk pala drak, tathuak ia sua saong lac ia pandar ka yaok ribau baoh sang bhap bini. Ong Lưu Văn Nhạt- Phaok akaok UB bhap bini  xã Phước Thái, huyện Ninh Phước, tỉnh Ninh Thuận, labik hu tuyến kênh Nam njauk njauk nerak palao brei thau: “Kol dahlak hu jalan ngak cambaih laih yau: pathau khan meng ralo jalan piah mikva paglaong akaok saneng ka bruk vệ sinh môi trường, oh palao nerak athur metai trun ribaong. Kayua ribaong ini duh ka bruk pala drak, dua tra lac pabak ia pandar ka mikva jaik taphia atau rah tui ribaong Nam”.

# Page harei 29/10, Harei pataom nduan hồng 2017 ngan haong kadha “Diuk mbang ka dua” pachreih biak ralo manuac urang njauk ruak ung thư tasau hu mbaok tame di bal raya Hồ Chí Minh. Kadha praong di harei pataom nan lac danak dak khan brei thau thư viện mbuk ja dalam nan hu 50 bộ mbuk ngan haong phun jien 239 triệu đồng. Thư viện mbuk ja hu padang ngak meng bruk pambuak gauk di kapul Mạng lưới ung thư tasau Việt Nam ngan haong nhãn hàng sữa metham Yakult.

# Tỉnh Vĩnh Long ba tame pandar “Mô hình darak pasar thí điểm khik kajap vệ sinh an toàn thực phẩm” di darak pasar  Phước Thọ, phường 8, ban sit Vĩnh Long. Ini lac darak pasar an toàn thực phẩm akaok meti di tỉnh Vĩnh Long, hu padang ngak meng nền pasar kaya nông, thực phẩm Phước Thọ klak, ngan saong taneh 350 m2, abih tih phun jien padang ngak lac 825 triệu đồng, pabak dom tanut ka cơ sở vật chất kỹ thuật, urang pablei salih saong pandap panda pablei salih di darak pasar.

# Đồn Biên phòng Gành Hào pak huyện Đông Hải, tỉnh Bạc Liêu bahrau duah mboh saong cap khik sruh gilai pajeng jaik 16 ribau lít menyek oh thau cambaih laih asal di nyu mai meng halei. Tui nan, dalam tuk nao pasang mong, urang jakar, urang lin Đồn Biên phòng Gành Hào hu duah mboh sruh gilai taong mek ikan tuan số hiệu BT 94995 TS di ong Huỳnh Thanh Châu, ndih tapui 1974, daok di xã Bình Thắng, huyện Bình Đại, tỉnh Bến Tre pajeng jaik 16 ribau menyek DO angaok tasik. 

Patui di ini dom khau tin dunya:

# Pa-ki-xtan harei 29/10 hu lui palao 68 urang taong cap ikan Ấn Độ yau sa jalan ngak siam tuk căng thẳng hong Ấn Độ ka dom bruk srau kadau di labik taphia negar. Dom urang ngak praong Pa-ki-xtan brei thau, dom urang taong cap ikan ini hu jao ka  dom urang ngak praong Ấn Độ di taphia negar  Oa-ga (Wahga) di harei ini 30/10.

# Harei 29/10 angin khang pakat ribuk gam haong hajan prong ngak khat lahik trak tal dom negar Trung Âu. Takik abih hu 4 urang metai pak Cộng hòa Séc saong Ba Lan; jalan mbak nao mai oh hu; yaok rituh ribau baoh sang njauk cakak điện.

# Kapul cứu hộ Na Uy brei thau hu duah mboh sruh kapal haok trực thăng di Nga lahik harei 26/10 di ala mbat tasik di labik ia-sar mũi Hê-rốt-đen (Heerodden). Tui kapul cứu hộ Na Uy, sruh kapal haok Mi-8 lahik hu duah mboh di labik dalam 209 mét ala mbat tasik./.