# Biar harei 30/1, akaok negar Trần Đại Quang saong kapul urang ngak bruk Trung ương hu mai rivang, ngak bruk saong tadhau ayuh Tết urang jakar, urang lin  Bộ Tư lệnh Quân đoàn 4 - Binh đoàn Cửu Long Anh hùng (bal sit Dĩ An, tỉnh Bình Dương). Akaok negar Trần Đại Quang pok meyaom Quân đoàn 4 hu pambuak bruk siam haong dom pakat ủy đảng, karja puk palei, dom pakat, dom ngành dalam bruk dak padang quốc phòng taong abih bhap bani.

# Harei 30/1, tỉnh Tuyên Quang hu pataom iek veik Dự án daong ngak nong, urang nong saong palei pala 2011- 2017. Hadei di 6 thun peih ngak, Dự án hu daong patagok GDP ngak nong Tuyên Quang hu 4,6%/sa thun, rilo jang bruk ba tabiak 4%/sa thun.

# Tỉnh Quảng Ngãi bahrau ngak blaoh labaih 300 baoh sang brei ka urang kathaot piah samu uan raok Tết Mậu Tuất. Dalam nan padang ngak bahrau labaih 100 baoh sang, daok veik nan pasiam veik. Taong abih phun jien padang ngak bahrau saong pasiam veik sang danaok ka urang kathaot labaih 7,5 tỷ đồng.

# Cục Thuế tỉnh Bình Định saong dom Chi cục Thuế, karja dom ban, huyện, ban sit hu biai rilo bruk patagok jien kak je di gah pablei salih lingiu quốc doanh. Cục Thuế tỉnh Bình Định  kham merat dalam thun 2018 ngak blaoh tanut dự toán kayua uy mban bhapbini tỉnh Bình Định jao, saong jien mek tame abih tih 6.190 tỷ đồng.

# Harei 30/1, mban tacei jalan padang bruk taong abih bhap bani pacang khik an ninh palei negar tỉnh An Giang peih bruk ba tabiak jalan ngak ka thun 2018. Thun 2018, mban tacei jalan dom puk palei njauk pataom tame tacei pato catang, pasiam veik samar drah dom kan kandah, taphia di nan hu jalan ngak samu gauk piah ka bruk taong abih bhap bani pacang khik an ninh palei negar tuk halei jeng cak rok patagok khang kajap.

Khaw tin dunya

# 20 rabau đô-la Mỹ (labaih 166 triệu kíp Lào) lac paok jien bo bhapbini Lào daong ka bhapbini Việt Nam gaok kan kandah di mbang ribuk ka 12, akaok bilan 11-2017 barau blaoh. Akaok mintri Lao động saong Phúc lợi xã hội Lào Khăm pheng Xay xổm pheng saong lambaok jabat Thủ tướng, mintri Quốc phòng, mintri Ngoại giao Lào  harei 30/1 hu mai jabat Đại sứ quán Việt Nam di Lào di ban ine Viêng Chăn alin paok jien nan.

# Thun 2017, nền kinh tế Pháp mek hu tanut patagok 1,9%, ini lac tanut patagok samar abih dalam 10 thun tapa. Tui Viện thống kế negar Pháp (INSEE), tanut patagok ini daok dalam bruk kuhria dahlau di INSEE saong Gilang pariak negar Pháp. Abih di nyu nan lac, nền kinh tế Pháp patagok samar dalam 3 bilan puac thun tuk Tổng sản phẩm quốc nội tagok 0,6%.

# Harei 30/1, jabat Khí tượng Nhật Bản barau tapatagok tanut cảnh báo di ceik apui Zao daok jaik sa libik trượt tuyết danei angan di gah Đông Bắc taneh ia ini, hadei di tuk duah mboh dom rung chấn di ini brei thau lac ceik apui mbuan pruh. Tui panuac khan nan, ceik apui Zao mbuan pruh sit saong patau ceik apui meda nduc trun dalam bán kính 1,2 km kuhria meng pabah ceik apui./. 

Jasi saong Thúy Linh lang tapa sap Cam