# Akaok negar Trần Đại Quang bahrau hu mbaok dalam harei peih bruk “Tết pala phun miat miat hadhal tal dhar phor Wa Ho” Xuân Đinh Dậu thun 2017 kayua Mentri ngak nong saong patagok palei pala pambuak haong tỉnh Quảng Ninh peih ngak. Akaok negar Trần Đại Quang pok sap iew ayut sahabat, bhap bani, dom dam dara uranaih dalam negar njauk hu mbaok dalam bruk pala phun, pala glai laghaih haong bruk di yaok bhum taneh. Taphia di nan, njauk patagok trách nhiệm saong hu ralo jalan ngak cambaih laih, biak biai piah pacang khik glai, pacang cakak bruk jah tak glai, am cuh glai, kaoh mek kayau suan adat hukum.

# Dalam tuk pahadar harei padang Đảng 3-2 , akaok Ủy ban Trung ương Mặt trận negar Việt Nam Nguyễn Thiện Nhân ba akaok kapul urang jakar Ủy ban Trung ương Mặt trận negar Việt Nam hu nao cuh gilau pahadar Wa Hồ dalam sang 67 – libik inem mek Chủ tịch Hồ Chí Minh. Anak anh linh Chủ tịch Hồ Chí Minh, akaok Ủy ban Trung ương Mặt trận negar Việt Nam Nguyễn Thiện Nhân ndom lac : Mặt trận negar Việt Nam dom pakat halan hatin ngak tui greih camin Wa, rik daong ngak siam Sarak Trung ương 4 khóa XII, paglaong hatai, pren khang sáng tạo di bhapbini ba taneh ia patagok. 

# Giáo hội Phật giáo Việt Nam tỉnh Ninh Bình bahrau peih ngak Lễ khai hội baha Bái Đính 2017. Peih mbaok Lễ khai hội baha Bái Đính nan lac danak dak daoh tamia biak karei ngan haong kadha trống hội Hoa Lư saong ralo kadha daoh tamia salam uan Đảng, uan thun bahrau. Yaom lac hu yam tapa ralo kan kandah di dak rai sajarah, min baha Bái Đính klak jeng daok hu tăng ni, tín đồ phật tử saong bhap bani atah jaik iek prong, khik ramik ka tal harei ini. 

# Harei pataom ilimo bangsa Mông huyện Mèo Vạc, tỉnh Hà Giang meda rah tabiak di dua harei 4-5 bilan 2 thun 2017 (yaom lac harei 8 – 9 Tết Đinh Dậu) di pasak huyện Mèo Vạc, tỉnh Hà Giang. Dom bruk ngak di lễ hội, kadha mein mengkan di bhapbini bhum glaong Hà Giang meda hu mein di harei roya ye: đánh Yến, ném còn tập thể, menyim khan bai lanh; ngak pandap tangei ndiuk, daoh nao mai...

# Tỉnh Thái Bình bahrau peih bruk doanh nghiệp pakacah gauk jhul pakhang bruk ngak mbang pablei salih thun 2017. Pak buổi lễ, Akaok Ủy ban bhap bani tỉnh Thái Bình Nguyễn Hồng Diên pok sap iew dom doanh nghiệp, doanh nhân saong urang ngak sa hatung sa hatai haong gauk, sáng tạo, jhul pakhang bruk pakacah gauk ngak mbang, pablei salih meng dom harei akaok mereip.

# Pagaiy harei 6 bingun Tết (lac harei 2/2), dom urang nong, doanh nghiệp ngak mbang pablei salih cà phê di tinh Đac Lac hu ba gauk tabiak pasang iek caphe kayua ini lac tukvak phun cà phê tabiak bingu, ndam baoh. Ini jeng lac tukvak praong ba tal năng suất, sản lượng, chất lượng cà phê . 

# Dalam 5 harei meng 1 bingun tal 5 bingun Tết Nguyên đán, bal Vũng Tàu, tỉnh Bà Rịa – Vũng Tàu taduan raok, pamere labaih 260 ribau tuai damuai mai du lịch, pataom ralo abih dalam dua harei 4 bingun saong harei 5 bingun Tết. Bruk an ninh trật tự, vệ sinh an toàn pandap mbang menyum, vệ sinh môi trường tuk halei jeng hu khik siam. Meng ini tal abih harei 9 bingun Tết, dom phòng di dom khách sạn jeng hu labaih 70% dom tuai damuai.

Khaw tin dunya

# Salam uan pahadar mbang yaka 87 harei dak padang Đảng Cộng sản Việt Nam, di ban ine Moskva, Liên bang Nga, Đảng bộ Đại sứ quán Việt Nam saong bhapbini Việt Nam di Liên bang Nga barau peih ngak dom bruk ye : cuh gilau di libik pahadar Wa dalam mblang sang Đại sứ quán; caik bingu di Tượng đài di Quảng trường Hồ Chí Minh saong bia lưu niệm di Quảng trường Lê Duẩn.

# Urang dahlau diah pal akaok đảng đối lập Min-giô (Minjoo), Hàn Quốc, ong Mun Chê In (Moon Jae-in) daok hu bhap bani pachreih tui hadei di urang dahlau diah ngak Tổng Thư ký Liên hợp quốc Ban Ki Mun (Ban Ki-moon) brei thau lac oh tabiak tranh cử tổng thống Hàn Quốc. Tui mbang duah thau hatai sahneng menuac sia Hàn Quốc di hãng Rin-mét-tơ (Realmeter) peih ngak ngan haong labaih 1 ribau cử tri Hàn Quốc brei mboh, bruk pachreih tuidi cử tri Hàn Quốc ngan haong urang dahlau diah ngak Tổng Thư ký Liên hợp quốc Ban Ki Mun urak ini daok parabha samu ka dua ứng cử viên hadah dalam mbang pakacah tame Thang Hijao urak ini nan lac Urang dahlau diah pal akaok đảng đối lập Min-giô, ông Mun Chê In saong Thủ tướng daok ngak Hoang Ki-ô An (Hwang Kyo-ahn).

# Cơ quan liên bang ka an toàn pandap mbang menyum (AFSCA) di Bỉ khan brei thau lac barau duah mboh virus cúm menuk ada H5N8 di sa trang trại raong glang dalam sang di tỉnh Lebbeke (Lơ-bếch), gah timul Flanders (Phlăng-đê) - Tây Bắc taneh ia Bỉ. Meng jala harei 2/2, dom janih menuk ada, cim raong jeng mek kareik saong brei takik taom gaok cim thiên nhiên. Akaok mintri ngak nong liên bang Willy Borsus (Guy-ly Bo-suýt) ndom lac njauk paglaong bruk caga kayua virus cúm menuk ada H5N8 meda tamuh meng dom bilan ini di dom taneh ia taphia Bỉ./.