# Thủ tướng Nguyễn Xuân Phúc bahrau mboh tangin tame harak payua tal dom mentri, ngành, puk palei pachreih gauk ngak bruk hadei di mbang padeih Tết Nguyên đán Đinh Dậu 2017. Dalam nan ndom lac, urang jakar, urang ngak bruk karja oh brei thei nao lễ hội dalam tukvak ngak bruk, oh pandar radaih công nao hội, lingiu di bruk nao ngak bruk, oh peih bruk mbang menyum pambak tal tukvak ngak bruk.

# Bruk an ninh chính trị, trật tự an toàn xã hội dalam ban raya Hồ Chí Minh, 7 harei tết meng blaoh tuk halei jeng tani tanat. Dalam nan, gah cảnh sát giao thông hu ba abih kapul tabiak kham merat khik caga an toan jalan nao mai dalam tuk tết, oh caik rah tabiak dom bruk gar radaih dui atah di dom pabah jalan praong tame tabiak ban raya. Công an samal pacang hu 2 kapul pakacah radaih suan hukum di Quận 2 saong quận Bình Tân ngan saong 57 janih radaih. Min, dalam dom harei tet meng blaoh hu 10 mbang menyum alak mbia mebhuk, ba tal taong gauk hu thương tích (rilo jang 5 mbang duk saong tết thun 2016).

# Dalam dom harei tapa, dalam tỉnh Tiền Giang hu rah tabiak ralo mbang hajan gam gam pambuak haong radaih meng miền Tây tuh mai Bal raya h phố Hồ Chí Minh saong gah Đông Nam bộ tagok glaong nan ngak ka bruk nao mai angaok jalan Roya 1 srau dhau jang. Ralo sruh radaih pajeng tuai tuk langik hajan nduac samar, vượt ẩu meblah mek tuai blaoh chèn ép gauk, nduac ngak ka aia parah bal glai bal klo, ngak lahik trật tự saong an toàn giao thông angaok jalan.

# Dalam dom harei padheih Tết Nguyên đán, sang iek ruak Bệnh Nhiệt đới Trung ương taduan mek 3 urang ruak likei gaok liên cầu lợn kayua mbang tiết canh hu vi khuẩn liên cầu. Dalam 3 urang nan, hu sa urang ruak umo labaih 60 thun di Nam Định metai. Dua urang daok veik jeng jaik 40 thun di Bắc Ninh saong Ninh Bình, daok hu iek ruak di sang iek ruak Bệnh Nhiệt đới Trung ương.

# Pak tỉnh Quảng Ngãi dalam dom harei Tết meng blaoh, manuac urang njauk ngộ độc alak tagok ralo ngan haong 22 urang. Dalam nan, ralo urang ngộ độc alak trak njauk ba tame sang iek ruak tuyến huyện blaoh tagok pak Khoa hồi sức tích cực pacang caga độc Sang iek ruak đa khoa Quảng Ngãi.

# Dom harei akaok thun sak menuk, urang ngak ikan bhum bãi ngang tỉnh Quảng Trị tabiak tasik aval, tame vụ taong cap ikan khoai. Dalam mbang tabiak tasik camereip akaok thun barau, urang ngak ikan taong cap hu biak rilo. Kuhria yaok harei tabiak tasik taong cap, yaok kapal mek hu labaih kurang 50 kg ikan. Yaom ikan khoai urak ini meng 60 rabau tal 70.000 đồng sa kg. Ông Hồ Văn Lành, umo 50 thun, daok di xã Gio Hải, huyện Gio Linh, tỉnh Quảng Trị brei thau: Harei 1 bingun saong dua bingun, urang ngak ikan taong cap ikan khoai, sruh halei rilo jaik 4 triệu, takik ikan jaik 1 triệu. Lingik gindang jua lac kol dahlak kham merat tabiak tasik piah taong cap ikan khiao kayua yaom biak glaong, caong khin thun ini taong cap hu rilo ikan khoai.

# Ralo puk palei di tỉnh Kon Tum bahrau peih bruk tabiak mbaok akaok thun. Tui nan, bruk tabiak mbaok akaok thun padang ngak palei pala bahrau hu Ủy ban bhap bani huyện Đăk Hà peih ngak pak palei Đăk Lộc, xã Đăk Ngọk. Hadei di tuk ngak adat blaoh, dom urang hu mbaok pak ini gam haong bhap bani palei Đăk Lộc gam gauk tuh 500m jalan bê tông liên palei peih mbaok ka bruk padang ngak palei pala bahrau di xã dalam thun ini.  Jeng dalam harei tabiak mbaok akaok thun ini, huyện Đăk Hà jak ba hu dom jabat chuyên môn saong kapul nyaom dom pakat daong ba bhum urang bangsa takik padang ngak palei pala bahrau.

Khaw tin dunya

# Akaok mintri Quốc phòng Mỹ Giêm Ma-tít (James Mattis) ndom lac panuac sanya ka an ninh di Mỹ saong Hàn Quốc dalam tuk bruk đe dọa an ninh meng gah  Triều Tiên dak harei dak catang tagok. Di mbang ginum biai dalam harei saong urang dang akaok Cơ quan An ninh negar Hàn Quốc Kim Quan Chin (Kim Kwan-jin), akaok mintri Quốc phòng Mỹ Ma-tít jeng khan veik meda jhul khang bruk ba tabiak hệ thống phòng thủ tên lửa tầm glaong tukvak puac (THAAD) di Mỹ di taneh ia Hàn Quốc piah daong cakak saong bruk đe dọa quân sự meng gah Triều Tiên.

# Thủ tướng Ixraen Ben-gia-min Nê-ta-ni-a-hu meda nao rivang Luânđôn dalam adit tal piah ginum biai haong Thủ tướng Anh Tê-rê-xa Mây. Dua urang pal akaok meda ginum biai ka dom kadha an ninh, dom kadha dunya, dalam nan hu bruk sron mbon di Trung Đông. Thủ tướng Anh Tê-rê-xa Mây brei thau amuk meda ndom tagok dom kadha daok suh sah di Anh ka bruk Ixraen patagok bruk padang ngak dom labik daok tái định cư ngak oh siam tal hatai jia.

# Tổng thống Liên bang Nga Vla-đi-mia Pu-tin barau hu mbang ravang  Hung-ga-ry piah jhul khang talei pambuak bruk di dua negar dalam dom gah, dalam nan praong abih lac gah kinh te. Ini lac mbang ravang sa taneh ia châu Âu akaok mereip di urang dang akaok Nga di thun 2017./.