# Biar harei 5/1, Thủ tướng Nguyễn Xuân Phúc raok Đại sứ Cộng hòa Séc pak Việt Nam, Ong Martin Klepetko mai salam likau drei tamat vaktu ngak bruk. Thủ tướng tadhau ayuh ong Đại sứ hu ngak siam bruk ngak di drei dalam vaktu tapa di Việt Nam taphia di nan jeng brei thau cambaih laih, Việt Nam iek prong talei rohim pambuak bruk siam mekre di Séc song Việt Nam.

# Melam kabroi (5/1), di Cung ilimo Thiếu Nhi ban sit Hải Phòng, Trung ương Đoàn, Hội đồng Đội Trung ương peih ngak danakdak nghệ thuật ngan saong kadha “Tuổi thơ praong tagok gam saong taneh ia”. Danadak lac paok pandap dhar phor dom nhạc sĩ daok kak kajap saong bruk ngak di dom sang  Thiếu nhi dalam taneh ia saong caong ngak brei medeih tagok hatai takre, pchreih ba dom nhạc sỹ hu paneh rilo kadha ka thiếu nhi.

# Harei kabroi 5/1, lambaok dom tỉnh Bình Dương, Vĩnh Long, Hậu Giang, Cà Mau saong bal Cần Thơ gam haong dom jabat thông tấn, báo chí hu mai rivang, alin brei pandap Tết pak dom jabat dalam Bộ Tư lệnh Vùng 5 Hải Quân daok di huyện pulao Phú Quốc, tỉnh Kiên Giang nan lac: Lữ đoàn 127- Xưởng  pasiam veik gilai X 58,  Tiểu đoàn 563, 551,565, Tiểu đoàn 553 saong dom Phòng, Ban chức năng di jabat ini. Sa-ai Phạm Hồng Thái, chiến sĩ ranaih umo di Tiểu đoàn 553- Bộ Tư lệnh Vùng 5 Hải Quân khan lac:  Dom chiến sĩ di dom jabat mboh dom kapul nyaom mai rivang thei jeng bui sambai. Adei kham merat pasiam tui jalan bộ đội Cụ Hồ, ngak siam bruk ngak di drei. Dom chiến sĩ meng harei nhập ngũ tal urak ini diuk rai biak siam, pato pakai ka dahlak ralo kadha gheih. Dom bruk mbang ma-in, bac megru…  biak siam,môi trường quân đội pak ini biak siam lagaih ka dom chiến sĩ.

# Biar harei kabroi 5/1, ông Phạm Việt Thanh, Bí thư Đảng ủy Khối Doanh nghiệp Trung ương saong kapul ngak bruk nao ravang, alin 6 tỷ 350 triệu đồng daong Quỹ Cứu trợ di Ủy ban Mặt trận negar Việt Nam tỉnh Quảng Nam, daong bhapbini  pasiam dom khut khat kayua hajan xua. Ini lac kadung jien kayua 13 Tập đoàn, Tổng công ty, gilang pariak di gah Khối Doanh nghiệp Trung ương rik daong. 

# Nyaom darak khuyến mãi Xuân Quảng Nam 2017 bahrau peih pakak pak Pasak Ilamo tỉnh ngan haong bruk hu mbaok di 100 doanh nghiệp, palei ngak, labik ngak pandap pablei salih dalam saong langiu tỉnh. 250 gian hàng pak Nyaom darak khuyến mãi xuân Quảng Nam 2017 pataom tame dom janih pandap kaya nong; điện, điện tử, công nghệ thông tin; khan ao; trang trí nội thất, thủ công mỹ nghệ, sinh vật cảnh… Nyaom darak daok dalam dom bruk ngak di Mbang jak ba “Urang Việt Nam brei pandar pandap Việt Nam”. 

# Công an phường Hoa Lư, ban sit Pleiku, tỉnh Gia Lai, barau mek quả tang 5 urang likei kumei pandar ma túy patau di sa sang trọ. Bruk ini rah tabiak di harei 4/1, tuk Công an phường Hoa Lư, ban sit Pleiku glang iek tạm trú tạm vắng di tuk Tết di hẻm 169 jalan Cách Mạng Tháng Tám. Di tukvak glang iek, kapul công an duah mboh 8 kadung nilon dalam nan hu caik chất rắn dạng tinh thể sambo màu mbong. Dom urang khai ini lac ma túy patau kayua Phạm Văn Hải blei di ban raya Hồ Chí Minh ngan saong yaom 20 triệu đồng, ba mai piah pandar. Urak ini, gah công an daok duah thau, ngak cambaih bruk ini.

# Pahadar 38 thun harei Campuchia jayak Khmer Đỏ saong tukvak akaok thun 2017, Đồn Biên phòng Bo-heng, Bộ đội Biên phòng Đắk Lăk peih bruk nao rivang saong alin brei pandap ka Đồn Cảnh sát pacang khik tapen negar Coban Đomrây, tỉnh Munđulkiri, Negar Campuchia. Dahlau di nan, tukvak pahadar 72 thun Harei padang Quân đội bhap bani Việt Nam, Bộ đội Biên phòng tỉnh Đắk Lắk jeng hu jao brei công trình jalan điện trauc hadah, alin hadiah ka 3 đồn Cảnh sát pacang khik tapen negar di Campuchia (dalam nan hu đồn Coban Đomrây) saong yaom jien ngak abih 4,7 tỷ đồng.

Khaw tin dunya

# Harei kabroi 5/1, di ban Viêng Chăn (Vientiane) - Lào rah tabiak mbang nyaom thường niên yaka 26 di dua kapul urang jakar tapeng negar Việt Nam - Lào. Di mbang nyaom, dalam chreih chrai, bui sambai, abih hatai jum pataom saong pambuak bruk di Việt Nam - Lào, dua gah hu iek veik bruk peih ngak dom Hiệp định, Thỏa thuận ka tapeng negar di dua taneh ia saong Biên bản mbang nyaom thường niên yaka 25 di thun 2016 barau blaoh.

# Tổng thống In-đô-nê-xi-a, Uy-đô-đô (Joko Widodo) bahrau brei thau, talei pambuak bruk nao mai di negar ini haong Ô-xtrây-li-a jeng daok siam yaom lac dahlau di nan dua negar hu padeih bruk pambuak gauk gah quân sự. Urak ini gah đặc nhiệm di In-đô-nê-xi-a jeng daok hu mbaok dalam mbang pathram di căn cứ quân sự pak Ô-xtrây-li-a di Pơn (Perth). Pambuak bruk quân sự Ô-xtrây-li-a - In-đô-nê-xi-a hu  patagok khang dalam dom thun jaik di. Hải quân In-đô-nê-xi-a jeng hu mbaok dalam mbang pathram ralo negar kayua Ô-xtrây-li-a dang tabiak peih ngak.

# Mỹ, Hàn Quốc saong Nhật Bản barau njauk hatai gauk jhul khang dom bruk ngak haong gauk piah paglaong pren kateik Cộng hòa dân chủ bhapbini Triều Tiên hadei di tuk taneh ia ini brei thau ngak hu tal tukvak puac di bruk thử nghiệm tên lửa đạn đạo liên lục địa. Tui taong yaom di gah  Mỹ, Cộng hòa dân chủ bhapbini Triều Tiên ngak hu dom bruk barau dalam năng lực hạt nhân saong tên lửa hadei di dom mbang thử hạt nhân saong papar tên lửa praong oh ka mboh meng thun dahlau. Bruk ini jeng brei mboh bruk đe dọa meng gah Triều Tiên dak harei dak praong jang./.