Khaw tin 19h, 4/8 saong 6h30 harei 5/8

     #/ Mintri ngak nong song patagok palei bahrau hu harak pok tagok thủ tướng rajaei, likau rajaei buh tabiak meng kadung jien khik piah pakat negar piah dong ka urang nong 4 tỉnh Hà Nam, Nam Định, Ninh Bình song Thái Bình hu taneh ngak nong njauk khat lihik kayua ribuk ka sa meng bloh. Tui nan, dong 620 tấn padai pajaih, 230 tấn tangei pajaih song 24 tấn asar njam piah ka urang nong dom tỉnh nan samar pasiam veik dom khut khat ka vụ ni, khik hu taneh jang yau sản lượng ka phun padai song dom janih phun pala karei karei

    # Tui maong mbang nyaom thường kì bilan 7 barau blaoh di rajaei, abih di nyu nan lac Kết luận di Thủ tướng Nguyễn Xuân Phúc, bhapbini tỉnh Đắk Nông biak njauk hatai saong bruk tacei pato khang. Ông Nguyễn Long Phi daok di phường Nghĩa Thành, ban sit Gia Nghĩa, tỉnh Đắc Nông caong khin dom puk palei di bhum Tây Nguyên ngak njauk tui panuac tacei di Thủ tướng ka bruk kareik bambang glai tự nhiên : “Ta-eng dom  tỉnh Tây Nguyên ye dahlak hu caong khin bruk khik caga glai bo Thủ tướng rajaei jao brei njauk peih ngak siam saong catang jang”

      #/ Jiak 3 thun peih bruk brei mesraiy ưu đãi piah pala cà phê, min di tỉnh Đak Lak bahrau hu 19 urang nnog song 8DN mesraiy hu phun jien ni. Makna lac kayua yaom jien brei mesraiy takik, urang nong oh ginup dom kadha biak catang di gilang pariak piah hu mesraiy phun jien.

      # Tui Chi cục Thú y Quảng Bình, jit tả patuh tabiak di tapol pabui di xã Vạn Ninh (Quảng Ninh) daok hu pacang cakak. Ông Phạm Hồng Sơn, akaok Chi cục Thú y tỉnh Quảng Bình brei thau, yaok ratuh drei pabui njauk jit aih traoh kayua bhapbini tuh tabiak mblang hamu rilo harei tapa hu puk palei lam, cuh klak tui njauk adat.

      #/ Dalam bilan 8/2016 tỉnh Thừa Thiên - Huế daok buh brei 2000 tấn brah meng kadung jien khik piah pakat negar piah dong ka urang tong ikan tui sarak 1138/QĐ-TTg di thủ tướng rajaei. Yaom brah ni hu parabha ka dom puk palei dalam tỉnh piah dong ka urang tong ikan tui tanut 15 kg ka sa urang dalam sa bilan dalam tuk vak takik di abih lac 6 bilan. Dom urang hu dong lac dom menuac dalam sang di po kapan, sang hu urang ngak angaok kapan tong chap ikan di bhum tapen takai tasik, bhum lộng oh caik jamriak atau caik jamriak hu công xuất ala 90CV, boh sang ngak sara, song boh sang ngak dịch vụ hậu cần tong ikan gaok kan kandah tapak kayua bruk kaya ikan metai rilo

      # Pagaiy harei 4/8, di tỉnh Ninh Thuận, rayo sap ndom VN saong Công ty Acecook Việt Nam peih danakdak alin 100 bồn padang ia ka dom sang kan kandah, daok dalam bhum tua riya di dua xã Phước Diêm saong Phước Nam, huyện Thuận Nam.  Yaok  bồn padang ia đa năng padang hu 1.000 lít, meng nhựa  siam pandar hu suai livik, lagaih ka bruk ngak mbang ngak huak. Langiu bồn padang ia, yaok sang kan kandah di dua xã Phước Diêm saong Phước Nam daok hu alin pandap lac mì tôm di Công ty Acecook saong 100.000 đồng jien pajeng bồn meng pasak mai sang. Bui sambai tuk hu alin bồn padang ia, saai Nguyễn Thị Thanh, urang daok di xã Phước Diêm, huyện Thuận Nam khan lac :Yaok mbang nao ngak mai, kurang ia, kreh melam njauk nao nong biak atah. Glaih glar lô. Hu bình ia ini siam lo. Ieu sa radaih ia jaik 200 rabau  đồng, tuh tame dalam nan caik piah pandar hu sa bilan. Nyu siam lagaih jang. Daok tuk oh ka hu bồn ini, sang dahlak njauk nao naong yaok harei.

     #/ Pahadar 55 thun harei bala jru klik kruac VN 10-8  tỉnh Tiền Giang hu labaih 4000 urang njauk jru mek klik kruac hu brei pandap. Ong Lê Quốc Bảo, Akaok kapul urang njauk jru mek klik kruac /Diôxin tỉnh Tiền Giang brei thau: tapa bruk ngak ni, yaom lac pok pandap sit min brei mboh hatai anit ranam, bruk iek glang di XH di Đảng karja ka urang njauk jru klik kruac. Meng nan, daong ka urang chreih chrai yam tagok dalam rai duik

      Khaw tin dunya

     # Bair harei 3/8, akaok mintri ngoại giao Lào Saleumxay Kommasith saong Akaok mintri ngoại giao Trung Quốc Vương Nghị, taneh ia po sang hu peih ginum biai. Gah Trung Quốc caong khin gam saong Lào ngak siam dom bruk bo urang dang akaok dua taneh ia hu njauk gauk brei ngak, kuhria caga ka mbang taom gaok pakat glaong dalam nyaom biai Thượng đỉnh G-20 rah tabiak di Hàng Châu, Trung Quốc akaok bilan 9 tal, duah tabiak jalan patagok di dua taneh ia, ba talei pambuak bruk dua gah tagok glaong jalan barau.

    # Thủ tướng Nhật Bản S.A-bê  salih bahrau rajaei, song dom urang pan bruk praong di rajaei dahlau nan hu khik veik, piah jhul samar bruk peih ngak danak dak KT Abenomics.

     # Hadei di sa tukvak pasang iek, duah thau, melam 2/8, cảnh sát pacang caga ma túy di kapul cảnh sát taneh ia Campuchia  hu đột kích tame baok sang pah di Chay-ya-phông Phi-say-phan (Chhayaphong Phisayphan), 52 thun quốc tịch Thái Lan di ban ine Phnôm Pênh, mek khik  20 kg ma túy dom janih, dalam nan hu jaik 700 gram hêrôin. Urang likei ini njauk mek khik kayua sahaneng lac par akaok sa jalan pablei salih ma túy meng taneh ia langiu, rilo meng bhum tapeng negar Mi-an-ma, Thái Lan saong Lào tame Campuchia, ngak bruk hu dom thun ini mai di Phnôm Pênh./.