Khaw tin 19h, harei 17/10 saong 6h30 harei  18/10

# Page harei 17/10, Ủy ban Thường vụ Quốc hội patui veik danak dak mbang nyaom ka 4, brei panuac tame dom harak pathau khan di Raja-ei ka kết quả peih ngak bruk patagok kinh tế xã hội saong kadung jien karja thun 2016; jalan patagok thun 2017. Pasang iek veik harak pathau khan ka kinh tế xã hội,  dom urang dalam  Ủy ban Kinh tế ndom lac, GDP dalam thun tui kuhria ngak brei patagok 6,3 tal 6,5% nan meda biak kan si ngak hu. Dalam mbang nyaom page ini , Ủy ban Thường vụ Quốc hội hu peih bruk rik pataom jien padai daong ka bhap bani dom tỉnh gah kreh negar gaok khat lahik trak kayua ribuk ia sua. Akaok Quốc hội Nguyễn Thị Kim Ngân brei thau, bruk rik pataom jien daong ini jeng meda hu peih ngak dalam mbang peih pakak mbang nyaom ka dua, Quốc hội khóa 14 di harei 20/10 tal.

# Di mbang nyaom biar harei 16/10, langiu bruk brei padang tổ ngak bruk duah thau bruk xả lũ di sang mac Thủy điện Hố Hô, akaok mintri Trần Tuấn Anh hu pandar Công đoàn Ngành Công Thương daong ka mikva bhum xua ribuk di dua tỉnh Hà Tĩnh saong Quảng Bình, yaok tỉnh 350 triệu đồng. Paok jien ini hu ba tal 2 tỉnh nan dalam harei 17/10.

# Tui kuhria mboh dahlu di Đài Khí tượng Thủy văn Bình Dương, dalam dua harei 17 saong 18/10, mbaok aia di hạ lưu kraong Sài Gòn daok di tanut aia ndik. Ngan haong tanut aia tuk aia ndik glaong jang tanut báo động III meng 2 tấc tal 2 tấc meteh meda ngak brei dauk di dom labik dalam tỉnh Bình Dương. Dom labik yau: bal sit Bến Cát, bal Thủ Dầu Một, bal sit Thuận An, tỉnh Bình Dương meda hu ia dauk. Kayua yau nan ye, dom labik nan njauk peih ngak siam dom jalan pacang caga piah patrun bruk talah ar pacang, aia tapa ar ngak khat lahik tal drap ar saong ngak kan kandah tal rai diuk di bhap bani.

# Harei 17/10, tỉnh Thừa Thiên - Huế peih bruk khánh thành Bia chiến công 11 urang kumei kraong Hương, daok di labik bồn bingu, praong abih tih 900m2 saong hợp phần phun kayau karei di khu quy hoạch Vỹ Dạ, phường Vĩ Dạ, ban sit Huế. Công trình hu yaom jien buh tame ngak 2,8 tỷ đồng kayua urang jakar, viên chức lao động, tapon pan phao kraong, kapul liên hiệp urang kumei tỉnh, nữ tu dom agama, dom doanh nghiệp saong urang hảo tâm, dom tổ chức xã hội dalam tỉnh Thừa Thiên - Huế rik daong.

# Ủy ban Mặt trận Negar bal raya Hồ Chí Minh pok sap iew bhap bani bal raya saong dalam negar njauk sa tangin haong gauk rik pataom jien padai piah daong ka mikva daok njauk khat lahik trak kayua hajan ribuk di dom tỉnh gah kreh negar. Ong Nguyễn Hoàng Năng, Akaok Ủy ban mặt trận negar Việt Nam bal raya Hồ Chí Minh brei thau: anak meta, bal raya daong brei 10 tỷ đồng piah samar daong ka bhap bani dom tỉnh gah kreh negar daok gaok ralo kan kandah kayua ribuk aia sua. Urang dang akaok bal meda dang tabiak ba akaok dom kapul nyaom nao brei jien daong nan tal mikva labik aia sua. 

# Tỉnh Bạc Liêu daok peih ngak rilo bruk daong ka bhapbini pacang caga hajan, ngin, ribuk, abih di nyu nan lac mbang triều cường dalam dom harei tal. Ông Lai Thanh Ẩn - Chánh Văn phòng Thường trực Ban Chỉ huy pacang caga xua ribhuk saong duah daong urang njauk bala tỉnh Bạc Liêu brei thau : hu pambuak bruk saong huyện Vĩnh Lợi samal daong dom sang bhapbini hu sang jaleih saong tapaok tabung tani tanat labik daok; taphia nan, kuhri kuhria khat lihik saong daong jaik 40 triệu đồng ka dom sang ini ngan saong tanut daong meng 6 - 6,5 triệu đồng ka sang jaleih saong meng 200 rabau đồng tal 4 triệu đồng ka sang tapaok tabung.

# Pak Cà Mau, page 17/10, sa mbang hajan prong dui atah meng 5 tuk tal 9 tuk jeng oh ka padeih, ngak ka jaik abih dom canah jalan nai mai dalam pasak bal Cà Mau dauk dalam aia. Hajan rah tabiak dalam tuk tabung glaong saong dui atah nan ye dom urang ngak amaik ame gaok ralo kan kandah dalam bruk ba anek kamuan drei tame sang bac, urang jakar nao ngak bruk suai jang tuk ba tabiak; bruk pablei salih jeng gaok kan kandah tui.

Khaw tin dunya

# Jabat pambuak bruk dunya Nhật Bản (JICA) brei thau, Nhật Bản meda daong Việt Nam caga dauk ia bo oh njauk buh jien tame ngak. Dự án caga dauk ia ini hu peih ngak tapa bruk padang dom doanh nghiệp pambuak bruk Nhật – Việt (SPC) piah peih ngak dom hạng mục saong hu peih ngak di ban raya Hồ Chí Minh di thun 2017 ngan saong yaom jien đầu tư tagok tal 22 tỷ yên (jaik 211 triệu USD).

# Klup kapul urang kamei Việt Nam pak Malaysia bahrau pambuak haong Đại sứ quán Việt Nam pak Malaysia peih pakak tal bac sap Yuan akaok mereip brei ka anek kamnuan urang Yuan daok pak ini. Hu jaik 30 adei tut angan tame tal bac ini, hu parabha jeng dua tal pambak tui umo saong tui taong yaom. Anak meta, tal bac meda peih pabah mbang 1 van dalam adit di harei car saong tapuk bac hu ba meng Việt Nam tapa, tui danak dak di Mentri pato megru.

# Lingiu nyaom biai thượng đỉnh nhóm dom nền kinh tế barau tamuh dang akaok dunya BRICS) di bang Goa (Gô-a), gah Tây Ấn Độ, harei 16/10 Chủ tịch Trung Quốc Tập Cận Bình (Xi Jinping) hu gaok Cố vấn taneh ia Myanmar Aung San Suu Kyi (Oong Xan Xu Chi). Dua gah brei mboh hatai jia lac patagok talei pambuak bruk piah jhul khang talei pambuak bruk praong di taong abih gah./.