Khaw tin 19h harei 2/8 saong 6h30 harei 3/8

     # / Di mbang nyaom rah tabiak di mesup harei 2/8, Văn phòng thường trực Ban tacei jalan TƯ ka bruk pacang caga bala meng lingik tasik hu panuac ieu dom tỉnh bhum ceik gah barak caga hajan khang kayua ribuk ka 2 meda ngak brei glut jaleih taneh, ia ndik, ia sua. Ong Văn Phú Chính, Chánh văn phòng mban tacei jalan  Trung ương ka bruk pacang caga bala meng lingik tasik hu panuac lac : Dom tỉnh njauk patagok bruk pathau khan angaok dom rayo papar sap, papar binguk pakat tỉnh song dom jalan pathau khan di puk palei, gam gam brei thau ka hajan ribuk. Brei thau cambaih dom kuhria mboh dahlau di pasak khí tượng thủy văn Trung ương ka dom labik mbuan hu ia ndik ia sua, glut jaleih taneh, piah karja puk palei song bhap bini thau, piah samar caga, nyaik.

     # Cục khik ramik urang ngak langiu taneh ia ( mintri Lao động Thương binh saong Xã hội brei thau): Dalam bilan 7, abih tih urang ngak VN nao ngak bruk di taneh ia langiu lac labaih 11 rabau  600 urang, pataom tame di dom darak pasal ye : Đài Loan- Trung Quốc (labaih 6 rabau urang ngak ); Nhật Bản (labaih 3 rabau 500 urang ngak ), Hàn Quốc (labaih 1 rabau 100 urang ngak; patui di nan lac Malaysia, Ả rập - Xê út saong dom darak pasal karei. Yau nan, dalam 7 bilan tapa, urang ngak Việt Nam nao ngak bruk di taneh ia langiu lac labaih 65 rabau 700 urang, hu labaih 66% bruk ba tabiak dalam thun.

       #/ Tui amuk Cao Thị Hạnh, Trưởng Ban Kế hoạch song khik ramik phun jien, Tổng Công ty padai brah gah barak (Vinafood1), Tổng công ty dok peih bruk blei di 4 palei daok labaih sara lac Bến Tre, ban raya  Chí Minh, Bạc Liêu song Ninh Thuận. Meng bruk lac yaok harei blei tame meng 300-400 tấn, tal urak ni Vinafood1 hu blei tapak meng urang ngak sara jiak 10.000 tấn sara. 

      # Meng akaok thun tal ini di Cà Mau hu labaih 600 sang raong reng daok tangin saoh kayua reng laik yaom. Rilo sang laik tame sraiy kayua mesraiy jien piah raong reng. Tui dom urang blei, reng laik yaom kayua sang mac padheih thử nghiệm pablei reng tabiak taneh ia langiu. Taphia di nan, san luong reng biak rilo pablei oh abih. Reng oh pablei tabiak taneh ia langiu hu, nan ye nyu labaih rilo ba tal laik yaom.

     #/ Kurang ia hacih saat ka dom sang bac di bhum palei pala lac bruk dut hatai dalam rilo thun ni mai di tỉnh Bạc Liêu. Tỉnh hu jak ba dom jabat, urang ngak pahla rik dong piah dom sangg bac kuac bingun. Bahrau ni tapa tỉnh đoàn Bạc Liêu, dom urang ngak pahla hu dong padang ngak bilai pabak ia hacih song rilo pok pandap alin brei ka dom sang bac di huyện Đông Hải. Yaok bilai ia hacih hu yaom 16 triệu đồng

       Khaw tin dunya

      # Gah pacang caga kanyak jhak kayua lingik tasik taneh ia Philipin harei 1/8 brei thau, jaik 9 ranau urang njauk nao plaih tuk ribuk nhiệt đới Ni-đa (Nida) nduac tapa taneh ia ini. Dom sang bac di 10 tinh gah Brak Philipin njauk kareik bambang. Kuhria meng puac adit blaoh, jaik 40 mbang par di dunya saong dalam taneh ia njauk klak kayua lingik jhak.  

      #/ Di TQ, harei 1/8 jeng hu ba tabiak dom jalan ngak piah caga ribuk Ni đa tuh tame negar ni. Karja dom tỉnh Quảng Đông Quý Châu, Vân Nam song khu tự trị bangsa Choang Quảng Tây hu tui iek ribuk song samar tabiak panuac brei thau. Ủy ban pacang balal meng lingik tasik pakat negar hu panuac kakei bhap bini  daok dalam bhum ribuk nao tapa njauk khik piah dom pandap cần thiết. Dom jalan patrun bala samar meda hu peih ngak  meyah mboh cần thiết.

      # Tổng thống Ai Cập Áp-đen Fa-ta En Si-si (Abdel Fattah al-Sisi) harei 1/8 hu panuac lac, dom jalan ngak khang meda lac njauk ngak piah daong jhul patagok kinh te taneh ia daok gaok rilo kan kandah. Urak ini rajaei Ai Cập daok ginum biai ka sa danakdak brei mesraiy ngan saong kadung jien dunya yaom 12 tỉ đôla Mỹ./.