Khaw tin 19h, harei 6/7 saong 6h30 harei 7/7

       # Mentri Công Thương bahrau tabiak Thông tư 07 brei thau ka bruk đấu giá hạn ngạch thuế quan blei saradang tme thun 2016. Tui nan, urang blei saradang piah ngak pandap atau pandar saradang tamo piah ngak saradang tinh luyện saong dom urang, kapul nyaom pambuak pagam tal… hu mbaok tame đấu giá thí điểm hạn ngạch blei saradang thun ini.

       # Anak bruk hu jaik 70.000 sinh viên bac gah sư phạm bac tamat bloh oh ka likau hu bruk, Mintri pato megru brei thau meda tacei pato pasang iek, quy hoach veik dom sang bac piah paglaong chất lượng gru pato, khik ka sinh viên bac tamat bloh hu bruk ngak. Mintri pato megru rami ramik veik dom sang bac pato pakai gah ini. Tui nan, anak tal tok daok 8-9 labik pato gah sư phạm praong, dom labik daok veik lac phân hiệu.

       # Pambuak pagam tal bruk ramik pasiam veik dom mmaok jalan vin taom dhal  danao Hoàn Kiếm (Hà Nội), ong Phạm Tuấn Long, Phaok Akaok Uỷ ban bhap bani quận Hoàn Kiếm brei thau meda likau  ý kiến bhap bani. Quận Hoàn Kiếm hu pok panuac tagok Ủy ban bhap bani bal Hà Nội brei ramik pasiam veik 2 jalan phố lac: Tràng Tiền - Hàng Khay - Tràng Thi - Điện Biên Phủ saong Đinh Tiên Hoàng - Lê Thái Tổ - Hàng Khay meng jien di kadung jien karja thun 2016. 

       # Tui pasak Y tế Dự phòng tỉnh Gia Lai, urak ini, tỉnh hu 16/17 huyện, ban sit mboh ruak pandiak tabiak darah, hu jaik 1.600 urang ruak, rilo jang labaih 18 mbang duk saong dom bilan ini thun dahlau, dalam nan hu sa urang metai. Piah caga ruak pandiak tabiak darah patuh tabiak, pasak Y tế Dự phòng tỉnh jeng hu pambuak bruk saong karja dom puk palei patabiak bruk hacih saat alam moi truong, pataom hareik, pametai lăng quăng, bọ gậy dalam dom pandap padang ia nerak vil tam dar beir, sang, jah hareik hareim saong kuac ribong krong …

     # Tui Pasak Y tế dự phòng Sở Y tế Đắk Nông, kuhria tal harei 5/7, toàn tỉnh hu jaik 600 urang njauk ruak pandiak tabiak darah, rilo jang 4 mbang dut haong tukvak ini thun dahlau saong lac glaong abih dalam ralo thun ini mai. Njauk caik hatai, urang njauk ruak pandiak tabiak darah dalam tỉnh Đắk Nông daok tagok glaong. Tui kuhria mboh di gah y tế, dalam 10 harei tapa, dalam tỉnh hu labaih 70 urang njauk ruak pandiak tabiak darah bahrau.  

     # Ngan tui danakdak daong sang daok ka sang kathaot tui harak ka 167/2008/QĐ – TTg di Thủ tướng rajaei, tỉnh Trà Vinh hu rajaei brei adat peih ngak đề án daong sang daok ka 11.417 sang kathaot palei pala tukvak II 2016 – 2020, saong yaom jien ngak abih tih 326,8 tỷ đồng. 

      # Kuhria caga ka thun bac bahrau, Bal raya Hồ Chí Minh hu ba tabiak bruk palih ruah yaok ribau gru pato ka dom sang bac. Meng akaok bilan 7, rilo  quận, huyện dalam bal raya Hồ Chí Minh tabiak harak brei thau palih rauh labaih 2.600 gru pato ka thun bac bahrau, ralo meng lac pakat mầm non saong tiểu học. 

      Khaw tin dunya

       # Thái Lan caong tame lượng brah pablei tabiak dalam 6 bilan puac thun 2016. Gah rajaei taneh ia ini, dalam bilan 7/2016, rilo kapul ngak bruk meda peih dom mbang ngak bruk tal Mô-zam-bíc (Mozambique), Kê-ni-a (Kenya) saong Singapore piah xúc tiến bruk pablei brah tal dom taneh ia ini. Tui kuhria, bruk ngak di rajaei Thái Lan meda pablei tabiak taneh ia langiu jaik 9,5 triệu tấn brah.

      # Mentri Pablei salih Ấn Độ harei kabroi 5/7 brei thau, negar ini jeng daok tapa mbaok Trung Quốc dalam bruk pablei jru tavao tabiak negar lingiu dalam thun 2015 ngan haong tanut patagok jaik 8%, mek hu jaik 13 tỷ USD. Langiu di nan, Ấn Độ jeng tapa mbaok Trung Quốc pak taong abih darak pasar prong yau Mỹ, châu Phi saong Liên minh châu Âu (EU).

     # Cao ủy Liên minh châu Âu iek bruk pablei salih Cê-xi-la Man-xtrôm (Cecilia Malmstrom) harei 5/7 ndom lac, thỏa thuận tự do pablei salih di Liên minh châu Âu saong Ca-na-đa (daok ieu lac Ceta), njauk hu brei tabiak meng taong abih nghị viện dom taneh ia thành viên. Panuac nan hu ba tabiak piah tah klak dom panuac lac, dom thỏa thuận yau ini lac bí mật saong tok hu kein ka dom công ty praong. Amuk Man-xtrôm jeng brei thau, Ủy ban châu Âu hu panuac ka Hội đồng châu Âu mbaoh tangin tame thỏa thuận ini saong gah Ca-na-đa.