Khaw tin 19h00 harei 13/2/2017

      # Peih ngak đề án patagok kinh tế - xã hội bhum urang bangsa Cờ Lao, tỉnh Hà Giang, Jabat Bangsa huyện Yên Minh jhul khang peih ngak dom sarak daong patagok kinh tế, grap tanat labik daok, taphia di nan daong patagok ilamo – brei thau, khik ramik dom kapul daoh tamia di palei, pachreih anek saih bangsa Cờ Lao angui cuk khan ao di bangsa tuk nao bac...

    # Harei pataom pháo bingu pakat dunya Đà Nẵng 2017 ngan saong kadha “Hadah tanyak Ngũ Hành Sơn” rah tabiak meng harei 29/4 tal 24/6, di Đà Nẵng. Tui kuhria thun ini harei pataom phao bingu hu mbaok di 8 kapul mai meng Thụy Sĩ, Nhật Bản, Trung Quốc, Anh, Italy, Australia, Áo saong Việt Nam.

    # Kapul Dam dara Việt Nam huyện Ea Kar bahrau pambuak bruk haong sang iek ruak Đa khoa huyện peih ngak danak dak “Hành trình nhân ái kayua pren yava bhap bani” di xã Cư Bông, huyện Ea Kar, tỉnh Đắc Lắc. Tui nan, kapul hu iek ruak, brei jru ka labaih 150 urang taha, baoh sang kathaot, baoh sang sarak karja; tacei jalan iek glang pren yava ka baoh sang, kham merat pacang khik môi trường, labik daok piah pacang caga jit ruak…

    # Tỉnh Bình Phước urak ini hu jaik 14.000 sang kathaot saong labaih  5.800 sang jaik si kathaot, dalam nan hu 2.743 sang katahot oh ka hu sang daok atau daok dalam dom baoh sang taik tahak. Dom sang kathaot rilo meng mboh di dom huyen hu rilo bhapbini bangsa takik. Piah dak harei dak jhuk khang sang kathaot yam tapa kan kandah, patruh kathaot khang kajap, thun ini, tỉnh kuhria apdang jaik 700 baoh sang ka sang kathaot ngan saong paok jien jaik 36 tỷ đồng meng jien xã hội hóa.

     # Langik tasik oh siam, hajan suan bilan gam gam dalam tukvak tapa ngak ka mblang taneh raong Artemia ( daok iew lac hadang hamu sara) di bal sit Vĩnh Châu, tỉnh Sóc Trăng njauk khat lahik trak. Kuhria tal urak ini, hu takik abih labaih 200 ha njauk khat lahik trak dalam labaih 400 ha Artemia hu palao raong. 

    # jhul khang bruk ngak tui danakdak padang ngak palei pala barau, thun 2016, tỉnh Cà Mau ieu pataom hu labaih 872 tỉ đồng. Meng yaom jien ini, dalam tỉnh pataom tame patagok jalan nao mai, dom công trình thủy lợi, sang bac, cơ sở vật chất ilimo, jalan menyek, bưu điện, darak palei pala…tal puac thun 2016, dalam tỉnh hu 21 xã ngak hu chuẩn palei pala barau. Ia mbaok palei pala saong raidiuk di urang nong dalam tỉnh hu salih bahrau. Urak ini, tỉnh daok 23.646 sang kathaot, meblah jaik 8% saong 11.388 sang jaik si kathaot, meblah jaik 4%.

     # Urak ini, angaok kraong Chợ Gạo, tỉnh Tiền Giang ralo sruh gilai pajeng trak palao nduac tui aia, pataok padeih oh njauk labik brei adat, ngak kan kandah tal bruk nao mai. Thiếu tá Trần Văn Tân, Phaok Akaok Trạm Kỳ Hôn, Phòng Cảnh sát giao thông jalan aia, Công an tỉnh Tiền Giang brei thau, kraong Chợ Gạo oh brei adat ka dom sruh ghe gilai pajeng trak pataok padeih. Daok dom gilai gal veik kayua ia kaoh, sruh gilai nao hadei njauk plaih njaik cang aia ndik tagok glaong, oh hu jalan ngak pasiam.

      Khaw tin dunya

     # Harei 12/2 (lac harei 16 bilan sa tui saka ia bilan) jaik 200 Phật tử saong dom urang takre đạo Phật di ban ine Praha saong dom bhum jaik taphia di Cộng hòa Séc hu mbaok tame Đại lễ Thượng nguyên Xuân Đinh Dậu 2017, caong ka  quốc thái, dân an, sang drei sir, haniem phuan dalam thun barau.

       # Dom puk palei di Trung Quốc daok kham merat jhul pakhang bruk pacang caga jit cúm menuk ada H7N9 hadei di tuk hu njaom mbak tapa manuac urang. Dom jabat chức năng njauk brei kareik pabah mbang 280 labik pablei salih saong thik raih menuk ada diuk di bal Toại Ninh, tỉnh Tứ Xuyên hadei di tuk hu mboh 4 urang njaom vi-rút H7N9 angaok manuac urang dalam thun ini. 

# Gah chức trách Ôx-trây-li-a harei 12/2,  hu tabiak lệnh sơ tán bhapbini di dom bhum palei pala takik menuac urang di bang Niu Sao Uên (New South Wales) di taneh ia ini dalam tuk dom mbang khuah glai daok khang jang kayua lingik pandiak bhang saong angin khang, mbuan ba tal khuah tayah rilo baoh sang saong kareik bambang dom canah jalan. Karja palei hu tabiak cảnh báo khẩn cấp di 5 bhum palei pala di bang Niu Sao Uên. Bhapbini hu tacei brei samal panduan nao atau duah libik plaih siam piah plaih gaok kan kandah di dom mbang khuah glai. Labaih 2 rabau urang padam khuah hu ba nao piah daong cakak 86 libik khuah patuh tabiak dalam mbang Niu Sao Uên./.