# Thủ tướng raja-ei bahrau mboh tangin tame harak  angan dom xã biak kan kandah bhum bãi ngang tapen tasik saong pulao kaoh tukvak 2016-2020. Tui nan, hu 291 xã, dalam 23 tỉnh hu daong brei đầu tư  tui  Quyết định ka 1722/QĐ-TTg harei 2-9-2016 di Thủ tướng Raja-ei brei adat peih ngak danak dak brukngak negar Patrun kathaot khang kajap tukvak 2016 - 2020. 

# Tui Sở Du lịch Quảng Bình, meng harei 26-1 tal harei 2-2, tuai du lịch mai ravang mein di Quảng Bình hu 105.000 mbang tuai, tagok 8% duk saong  Tết Nguyên đán 2016. Abih di nyu nan lac tuai dunya hu 7.000 mbang tuai, tagok 133% duk saong dom bilan ini thun dahlau.  

# Tukvak akaok thun bahrau athak menuk 2017, Nhà xuất bản Kim Đồng meyaih khan dom baoh tapuk siam ka uranaih sit yau sa pok pandap uan thun bahrau saong bak mana brei ka urang puac tapuk lac uraniah. Bộ tapuk “Nao tapa dom negar Đông Nam Á” hu 4 baoh “365 harei lễ hội”; “dom adat cambat tanarakun biak karei”; “Njauk saong oh njauk”; “Tuyển tập dom kadha siam abih ba urang puac mai haong mbang du xuân akaok meti. 

# Lac urang dang akaok kapul Liên hiệp urang kumei phường Thắng Nhất, ban sit Vũng Tàu, tỉnh Bà Rịa - Vũng Tàu meng thun 2011 tal ini, saai Nguyễn Thị Phương Hoa gam saong dom pakat karja, kapul nyaom hu daong ka rilo urang kumei saong uranaih kathaot sang kan kandah. Saai jeng hu biai saong kapat ủy đảng, karja, kapul nyaom lang talaih dom tavak tavaiy, pasiam thủ tục, gam saong kapul jak ba jian padai piah ngak baok sang anit ranam yaom 48 trieu dong alin ka saai Đẩu. Tukvak tapa, saai Hoa hu jak ba dom kapul, nyaom, menuac urang rik daong hu jaik 1,3 tỷ đồng, daong 3.249 mbang urang kumei, uranaih kathaot, padang 6 “baok sang anit ranam” saong alin pandap ka sang hội viên kathaot yaom labaih 250 triệu đồng, rik daong patruh eik patrun kathaot dalam bhum.

Khaw tin dunya:

# Akaok Mentri Quốc phòng Mỹ Gim Ma-tis (Jim Mattis) khan lac meda ba tabiak jalan phản ứng “siam lagaih saong khang kadang” meyah Cộng hòa dân chủ bhap bani Triều Tiên palih ruah bruk pandar vũ khí hạt nhân. Akaok mentri Quốc phòng Mỹ jeng sanya daong Hàn Quốc-sa dalam dom đồng minh prong di Mỹ pak bhum châu Á. Daok gah drei, Akaok mentri Quốc phòng Hàn Quốc Han Min Cô (Han Min-koo) hu ndom veik ka bruk padang Hệ thống phòng thủ tên lửa tầm glaong tukvak puac abih (THAAD) di Mỹ angaok bhum taneh Hàn Quốc. 

# Ngoại trưởng Đức Sích-ma Ga-bri-en (Sigmar Gabriel) barau hu panuac ndom tal bruk njauk ngak dom bruk meda ngak hu piah jhul patagok thỏa thuận hạt nhân saong Iran. Brei panuac tuk daok ravang Mỹ, ông Ga-bri-en jeng brei thau oh hu dấu hiệu halei brei mboh Mỹ caong khin yah klak thỏa thuận ini. Ngoại trưởng Đức Ga-bri-en jeng barau hu mbang taom gaok Phó Tổng thống Mỹ Mai Pen-xơ (Mike Pence). Dua gah ginum biai labik dang di NATO piah khik caga an ninh di châu Âu, Bắc Mỹ.

# Nhật Bản meda pachreih hu 40 triệu tuai damuai dunya dalam thun 2020. Hãng tin Ki-ô-đô (Kyodo) brei thau, ini lac bruk hu ba tabiak dalam jalan ngak bruk 4 thun pamong tal Thế vận hội Ô-lim-píc (Olympic) saong Pa-ra-lim-pic Tô-ki-ô (Paralympic Tokyo) 2020 meda hu raja-ei Nhật Bản brei tapa dalam puac bilan 3 ini. Thun dahlau, Nhật Bản mek hu  bruk ba tabiak lac pachreih hu 20 triệu tuai damuai dunya./.