# Patui mbang nyaom ka 50 di Ủy ban Thường vụ Quốc hội, page harei  12/7, pak Baoh sang Quốc hội, dom thành viên hu brei panuac ka dự kiến danak dak pasang iek di Quốc hội, Ủy ban thường vụ Quốc hội thun 2017. Brei panuac ka  dự kiến Danak dak padang ngak hukum, pháp lệnh di Quốc hội thun 2017 saong dự kiến pasiam veik danak dak padang ngak hukum thun 2016.

     # Harei 11/7, gilang pariak dunya saong gilang pariak karja Việt Nam peih bruk mbaoh tangin tame hark brei mesraiy  paok jien yaom  560 triệu đô la Mỹ daong dua dự án patagok đô thị saong paglaong pren pacang biến đổi khí hậu saong khik caga bruk ngak mbang khang kajap di bhum taneraong kraong Cửu Long. Dalam paok jien ini, 250 triệu đô la caik ka Dự án Patagok ban sit Cần Thơ saong paglaong pren thích ứng di đô thị piah trun takik khat lhik meng xua ribuk saong pasiam jalan nao mai di pasak ban sit saong dom labik đô thị barau. Dự án meda ba mai kein laba ka 420.000 bhapbini daok dalam ban sit saong daong ka karja khik iek khat lihik meng bala di lingik tasik hu siam jang.  

     # Phòng Cảnh sát giao thông Công an tỉnh Gia Lai pambauk haong Phòng Cảnh sát giao thông Công an huyện Phú Thiện bahrau peih bruk pathau khan adat hukum nao mai angaok jalan mbak ka bhap bani urang bangsa takik pak Plei Dmăk, xã Ia Ake. Jalan pathau khan nan lac peih phim tư liệu saong ndom tapak ka adat hukum nao mai angaok jalan, pambuak pagam panuac sua tangin hu thưởng ka bhap bani javap jalei, asal kadha pambuak pagam tal Hukum nao mai angaok jalan mbak.

     # Bộ Chỉ huy Bộ đội Biên phòng tỉnh Thừa Thiên - Huế barau pambuak bruk saong pasak pato megru thường xuyên huyện A Lưới peih tan pato sap bangsa takik thun 2016 caik ka 28 urang jakar, sĩ quan, urang lin chuyên nghiệp daok ngak bruk di 4 đồn biên phòng di bhum ceik A Lưới. Dalam  tukvak 4 bilan, dom urang hu bac pang, ndom, puac, vak piah pandar  hu siam sap bangsa takik; thau ka bruk ngak mbang kinh te, ilimo, xã hội… piah daong ka urang bac hu ilamu pathau khan ka bhapbini paglaong raidiuk .

    # Hadei di 8 thun peih ngak Sarak 30a,  baoh sang kathaot di  huyện Đa Krông, tỉnh Quảng Trị trun,  meng 63% di thun 2009 trun daok  jaik 21% di puac thun 2015, kuhria rah tapa yaok thun baoh sang kathaot trun hu 5%; jien mek tame kuhria tui akaok menuac hu 15 triệu đồng sa urang sa thun; taong abih jalan mai xã, 70% jalan tame palei hu tuh bê tông.

    # Dalam 6 bilan akaok thun huyện Pác Nặm, tỉnh Bắc Cạn hu pato bruk ka labaih 200 urang ngak, saong yaom jien peih pato labaih 440 triệu đồng; ba bruk ngak ka jaik 100 urang ngak; daong ka anek saih bán trú labaih 11 tỉ đồng; daong 40 drei limo ka dom sang kathaot …

     # Meng harei 18 tal harei 25/7, Harei pataom nghệ thuật 5 negar Việt Nam, Lào, Campuchia, Myanmar saong Thái Lan thun 2016 meda peih tabiak pak bal   Đông Hà, Quảng Trị. Harei pataom pachreih hu jaik 960 nghệ sĩ, diễn viên mai meng  4 kapul nghệ thuật Campuchia, Lào, Myanmar, Thái Lan; saong 17 kapul nghệ thuật dalam negar. Dom nghệ sĩ ba mai harei pataom labaih 200 kadha nghệ thuật hu asal pok meyaom kadha siam gheih di taneh aia, palei negar, anek manuac, dom kadha biak karei di yaom bhum taneh, dom jak jeng siam mekre di yaok bangsa, taneh aia mek hu dalam tukvak tapa saong di urak ini dalam khối ASEAN, abih di nyu lac talei rohim di dom negar Việt Nam, Lào, Campuchia, Myanmar saong Thái Lan.

       Khaw tin dunya

     # 6 bilan akaok thun 2016, Campuchia hu pablei tabiak taneh ia langiu labaih 268.000 tấn brah, trun jaik 6% duk saong dom bilan ini thun dahlau. Phó Tổng cục trưởng Tổng cục Nông nghiệp Campuchia Hean Vanhan brei thau, brah pablei tabiak taneh ia langiu trun kayua kurang brah, kayua dom sang mac chai brah saong pablei tabiak brah oh ginup jien blei padai brah caik piah di bilan vụ dahlau piah chế biến saong pablei tabiak taneh ia langiu. Sa makna tra lac brah pablei tapa Việt Nam, gam saong bruk Thái-lan pablei brah tabiak darak pasal biak rilo saong yaom bair jang, dalam tuk nan yaom jien piah ba brah tabiak taneh ia langiu di Campuchia glaong jang.

     # Hội đồng An ninh Ma-lai-xi-a hu panuac caong pandar chế độ thị thực ngan haong tuai damuai mai meng dom negar Trung Đông, pasang iek catang dom  giao dịch jien padai di dom công ty Ma-lai-xi-a haong dom gah pambuak bruk di dunya, piah pacang cakak kol IS mai tame negar ini.

      # Dalam mbang nyaom di ban sit Chiêng Mai di Thái-lan, lambaok 17 kapul nyaom vũ trang sắc tộc Mi-an-ma njauk hatai peih sa nyaom biai di harei 26/7 tal di bang gah Brak Ca-chin (Mi-an-ma) piah kuhria caga ka nyaom biai Hòa bình liên bang, atau nyaom biai Panglong abap 21, meda hu peih tabiak di puac bilan 8 tal di ban Nây Pi Đô di taneh ia ini./.