# Kuhria tal bilan 7 thun 2016,  urang blei Bảo hiểm xã hội bắt buộc dalam negar drei hu labaih 12,4 triệu urang; Bảo hiểm y tế jaik 73 triệu urang saong mek hu tanut labaih 79%  dom menuac sia blei Bảo hiểm y tế. Jien mek tame meng Bảo hiểm xã hội, Bảo hiểm y tế, Bảo hiểm tự nguyện kuhria dalam 7 bilan thun 2016 hu labaih 133 ribau tỷ đồng, mek hu jaik 57% bruk di Thủ tướng Raja-ei jao.

      # Harei 16/8, mbang akaok meti ban Hội An, tỉnh Quảng Nam peih “harei oh mbang ralo kayua môi trường saong pren yava”. Bruk ngak ini piah pachreih tui jalan diuk rai khang kajap, thau khik caga môi trường sinh thái; ngak brei pamedeih tagok hatai sahneng di anek menuac ka mối liên hệ di bruk randap mbang menyum saong pren yava saong bruk biến đổi khí hậu dunya.  

      # Tỉnh Khánh Hòa urak ini hu jaik 40 bè nổi duh bruk mbang huak, ma-in sambai ka tuai damuai nao ma-in angaok pulao tasik, mboh ralo pak bal Cam Ranh; vịnh Nha Trang. Dom bè ini hu mikva padang ngak angaok dom  baoh thùng katak, oh khik kajap an toàn saong oh hu brei adat pablei salih. Tỉnh Khánh Hòa tacei pato  dom ban ngành, puk palei oh brei adat ka dom baoh bè ngak bruk mbang huak saong ma-in giải trí angaok tasik. Anak meta, dom huyện, bal sit, bal prong peih bruk pasang iek, brei padeih dom bruk ngak ini, duah thau cambaih asal di nyu saong brei ka dom bè nan ngak njauk bruk dahlau deih di nyu.

     # Meng thun 2011 tal urak ini, tỉnh NT ieu pataom hu 5.584 tỉ đồng, dalam nan hu jien di kadung jien karja saong bhap bini rik daong. Meng phun jien nan, NT ngak pakhang hu jaik 54km jalan palei, jalan tame hamu. Pakhang hu labaih 4km kraong ribaong pakat 2, 3. Ramik pasiam veik dom blai y tế xã… Kuhria tal abih thun 2015, NT mek hu chuẩn palei pala barau, 2 xã mek hu chuẩn meng 15 tal 18 tanut, 19 xã khá.  

      # Page harei 16/8, Công an Bal raya Hồ Chí Minh tabiak mbaok peih mbang tabung glaong khik caga siam mekre salamat bruk nao mai angaok jalan mbak saong trật tự xã hội tukvak pahadar 71 thun Cách mạng bilan 8, Harei negar 2/9 saong patagok dom jalan ngak piah khik caga siam mekre salamat bruk nao mai angaok jalan dalam dom bilan puac thun 2016. Trung tá Huỳnh Trung Phong, Phaok phòng Cảnh sát giao thông Jalan bộ - Jalan pasei, Công an Bal raya Hồ Chí Minh lac: “dalam mbang tabung glaong ini khaol dahlak peih ngak ralo bruk jang, nan lac ralo đội hình jang, ralo canah jalan jang, patagok tukvak ralo tổ công tác jang saong pataom tame  langyah bruk peih radaih hu menyum alak, bia. Kadha praong bo khaol dahlak caong khin lac tapa nan, bhap bani bal raya meda hu ý thức saong trách nhiệm jang ngan haong rup drei saong dom urang karei peih radaih nao mai angaok jalan piah ka bal raya hu siam mekre  jang.”

     # Di sang ilamu lao động tỉnh Lâm Đồng daok rah tabiak bruk parang iek mỹ thuật Đông Nam Bộ - bhum VII, mbang ka 21. Parang iek, yaih khan tal bhap bini 154 tác phẩm, ngan saong dom kadha ka tasik, phong cảnh, ilamu dom bhum palei dalam taneh ia, di 136 tác giả mai meng 9 tỉnh dalam bhum nan lac Lâm Đồng, Đồng Nai, Bình Dương, Bình Phước, Tây Ninh, Đắc Nông, Ninh Thuận, Bình Thuận saong Bà Rịa - Vũng Tàu. Dom tác phẩm dalam mbang parang iek ini hu dom tác giả sáng tác dalam sa thun ini mai, angaok dom chất liệu sơn mài, ba-ar, kayau (sarak)…. Parang iek rah tabiak tal harei 22/8.

      # Harei pataom nghệ thuật bhap bani saong pakacah trích đoạn lễ hội, daoh ragu daoh bhap bani, angui cuk khan ao meng tỉnh Lào Cai thun 2016 bahrau hu peih tabiak, hu mbaok  13 kapul nyaom nghệ thuật mai meng 9 huyện, bal, dom sở, ngành, đơn vị doanh nghiệp dalam tỉnh. Ini lac tukvak piah ka dom đơn vị, puk palei dalam tỉnh hu taom gaok, bac megru gauk dom bruk ngak ilamo, daoh tamia, taphia di nan pok glaong, khik ramik  ilamo gheih mekre di dom bangsa.

       Patui di ini dom khau tin dunya:

      # Tui panuac khan di mintri Du lịch Campuchia, meng akaok thun tal ini, taneh ia ini taduan labaih 2,3 triệu mbang tuai damuai dunya, rilo jang 2,6% duk saong tukvak ini thun dahlau. Dalam nan, Việt Nam jeng daok lac taneh ia dang akaok ka dom tuai damuai mai CPC ngan saong jaik 462 ribau mbang.

      # Gah Cảnh sát Thái Lan duah mboh ralo jang thiết bị patuh oh ka kích hoạt pak klau labik rivang ma-in dang akaok di negar ini tuk daok điều tra dom mbang patuh bahrau ini di dom tỉnh gah meraong. Dom thiết bị patuh pak labik padeih padei Hủa Hỉn, Phu-kệt saong Phang Nga hu cakak klaak. Dom thiết bị ini hu caga piah ngak patuh haong tukvak  dom mbang taong bom rah tabiak dahlau nan. Hadei di tuk rah tabiak dom mbang patuh, jaik 20 đại sứ quán negar langiu pak Thái-lan hu ba tabiak panuac cảnh báo bruk nao mai di bhap bani drei saong ndom lac meda rah tabiak dom mbang srau dhau karei.

      # Tổng Thư ký Tổ chức giải phóng Pa-le-xtin X.Ê-rê-cát payua harak ieu pachreih bhap bini dunya brei panuac pacap I-xra-en padeih padang ngak dom labik tái định cư dalam taneh Pa-le-xtin; ndom lac bruk ngak sung hukum ini, nyu sung haong hukum dunya, ngak tayah jalan dua taneh ia. Ong Ê-rê-cát jeng ieu akaok mintri ngoại giao dom taneh ia tẩy chay dom cty saong tổ chức ngak tui sarak meblah mek, peih praong labik định cư di I-xra-en, taphia di nan oh brei pablei tabiak negar lingiu dom pandap hu ngak meng labik định cư ini./.