# Pak jabat Raja-ei, Thủ tướng Nguyễn Xuân Phúc bahrau dang tabiak peih mbang nyaom Raja-ei bilan 3/2017. Hu mbaok dalam mbang nyaom daok hu Akaok Ủy ban Trung ương Mặt trận negar Việt Nam Nguyễn Thiện Nhân, Phaok akaok negar Đặng Thị Ngọc Thịnh. Yaom lac hu ba tabiak 10 tín hiệu siam di nền kinh tế, min Thủ tướng Nguyễn Xuân Phúc ndom lac, kinh tế quý 1 patagok suai. Kayua nan ye njauk duah tabiak dư địa tăng trưởng piah pasiam veik GDP quý 1 tagok biar. Ndom lac dư địa tăng trưởng daok prong dalam ralo gah, Thủ tướng ndom lac, meyah khai thác siam, ngan haong hatai kham merat glaong meda duah tabiak jalan nao. Dalam nan, Thủ tướng brei thau njauk jhul pakhang bruk jak ba phun jien đầu tư xã hội piah jhul patagok tăng trưởng.

     # Tui mban peih bruk ngak pacit daa po Hùng - Lễ hội Đền Hùng thun 2017, piah khik  siam mekre salamat ka tuai damuai mai ngak pacit daa saong lễ hội, gah chức năng tỉnh Phú Thọ daok ba tabiak rilo jalan ngak. Meng harei camereip peih tabiak 1/4 (lac harei 5/3 tui saka ia bulan), jaik 1.000 urang jakar chiến sĩ Công an tỉnh Phú Thọ hu ba mai khik kajap an ninh trật tự tuk pacit daa po hùng. Tỉnh Phó Thọ jeng hu pabak, caik pagam 50 camera di dom đền, labik pataom ralo menuac, jalan nao mai ralo piah lagaih ka bruk tui iek, peih dom jalan ngak khik kajap an ninh trật tự.

     # Yaok rituh bhap bani saong tuai damuai hu mai pataom mbaok dalam lễ Khao lề thế lính Hoàng Sa pak kalan palei An Hải, xã An Hải, huyện Lý Sơn, tỉnh Quảng Ngãi. Lễ Khao lề thế lính Hoàng Sa hu peih ngak ngan haong 2 asal kadha chính: Lễ tế cổ truyền saong lễ pakacah gilai Tứ linh (Lân, Long, Qui, Phụng). Hadei di binah po lễ puac sớ, dom talei but pajaih angaok xã An Hải hu urang tabiak sa trường meng kan hu peih ngak nghi lễ cúng tế, raok ba dom hình nhân (hình nộm) thế mạng saong dom mô hình gilai piah palao tatheik tabiak tasik.

      # Bruk ba talang lin Hoa Kỳ lahik dalam mesruh metak di VN hu rah tabiak di mblang kapal haok pakat dunya Đà Nẵng. Lambaok VN hu jao ka lambaok gah Hoa Kỳ 3 bộ talang kayua bhap bini ba brei saong dom kapul pambuak bruk dauh mboh dalam mbang nao duah hong gauk mbang ka 126 rah tabiak meng bilan 2 tal bilan 4/2017. Ini lac mbang trao trả talang lin Mỹ lahik dalam samar mesruh metak VN mbang ka 140 kuhria meng thun 1973.

      # Akaok Ủy ban bhap bani tỉnh Thừa Thiên - Huế Nguyễn Văn Cao bahrau tabiak dom Quyết định công nhận xã Điền Lộc (huyện Phong Điền), xã Phú Thuận (huyện Phú Vang) saong xã Sơn Thuỷ (huyện A Lưới) mek hu chuẩn nông palei pala bahrau. Yau nan, dalam taong abih 92 xã peih ngak danak dak padang ngak palei pala bahrau, tal tukvak ini, dalam tỉnh hu 23 xã mek hu  chuẩn palei pala bahrau.

     # Tui ong Ngô Văn Tuấn, Giám đốc Sở Công Thương tỉnh Tiền Giang, dalam dom bilan akaok thun 2017, bruk xuất khẩu hu ralo siam lagaih ngan saong yaom jien tagok glaong di abih kuhria meng dahlau tal ini. Kuhria tal abih bilan 3/2017, yaom jien pablei pandap tabiak negar lingiu di tỉnh mek hu jaik 627 triệu USD, jaik samu 27% bruk ba tabiak  dalam thun saong ralo jang 50% duk saong dom bilan ini thun dahlau.

       # Tui kuhria dahlau di Viện Khoa học Thủy lợi gah meraong, dalam dom harei anak tal, jalan nduac meng halau kraong Mê Công meda trun, độ mbak meda patagok. Kayua nan ye, gah ngak nong tỉnh Sóc Trăng peih ngak ralo jalan khik piah aia taba duh ka bruk pandar, pala drak dalam bilan thu. Ong Hà Tấn Việt, Akaok Chi Cục Thủy lợi tỉnh Sóc Trăng brei thau, tranh thủ aia meng akaok halau tuh trun, jabat hu tacei pato vận hạnh hệ thống cống, tích cực ba aia taba tame khik piah di dom kênh thủy lợi nội đồng.

      Patui di ini dom khau tin dunya:

    # Mban urang dang akaok Đảng Cứu Quốc (CNRP) di Campuchia barau peih mbang nyaom piah bầu veik mban urang dang akaok barau ka nyu njauk tui nội quy di Đảng hadei di tuk ong Sam Rên-xi, urang dang akaok đảng likau padeih. Tamat mbang nyaom, Đảng Cứu Quốc pok ong Kem Sốc-kha, Phaok chủ tịch đảng ngak Chủ tịch, lingiu di nan hu pilih ruah 3 urang pok ngak phaok Chủ tịch barau.

     # Trung Quốc bahrau pok sap iew Mỹ iek prong dom quy tắc pablei salih  dunya, patagok bruk pambuak gauk saong đối thoại piah langyah dom kadha chung pambuak pagam tal bruk pablei salih, tok sa harei  hadei di tuk Tổng thống Mỹ Đô-nan Trăm mboh tangin tame 2 sắc lệnh hành pháp bahrau piah  đối phó saong dom bruk lạm dụng thương mại di negar langiu. Dahlau di nan, Tổng thống Mỹ Đô-nan Trăm hu mboh tangin tam dua sắc lệnh hành pháp piah đối phó haong dom vụ lạm dụng thương mại di negar langiu, ngak brei ba tal  thâm hụt thương mại jaik 500 tỷ đô la Mỹ yaok thun di negar ini.

     # Rajaei HQ brei thau, daok kham merat duah 22 thuyền viên di kapal HQ lahik angaok bhum tasik Nam Đại Tây Dương, jaik U-ru-goay. Bruk duah kapal pajeng pandap Xten-la Đai-xi hu peih tabiak hadei di tuk sa urang dalam thủy thủ đoàn payua tin nhắn ka công ty hàng hải chủ quản ndom lac kapal daok kram. Tal tukvak ini, dom urang cứu hộ barau duah hu 2 thuyền viên urang Philippin di sruh kapal ini./.