Khaw tin 6h30 harei 18/1

    # Piah khik kajap bruk pabak điện thun 2018 ka gah meraong, Akaok điện lực Việt Nam (EVN) ndom lac: bruk pabak điện tuk halei jeng catang dalam dom thun tapa, nan ye, Tổng công ty njauk hu jalan caga tuk lingik tasik oh lagaih ngak kan kandah tal bruk khik caga di hệ thống. Taphia di nan ngak salah bruk pataom mek dữ liệu meng atah di dom balai biến áp công cộng saong balai biến áp chuyên dùng meng akaok thun 2018 piah duh ka bruk phụ tải, pacang quá tải. 

# Taong yaom ka bruk patagok di gah takhaok kalik dalam 2018, ông Nguyễn Đức Thuấn, Chủ tịch Hiệp hội kalik –tathaok –kadung Việt Nam (Lefaso) ndom lac, gah takhoak kalik meda hu pren khang siam jang thun 2017 kayua hu rilo bruk mbuan lagaih, min jeng hu rilo kan kandah. Thun 2018 gah takhaok kalik caong pablei tabiak taneh ia lingiu mek hu 20 tỷ USD, tagok 10% duk saong thun 2017.

# Sở Y tế tỉnh Quảng Ngãi bahrau hu van ngak bruk haong urang pal akaok tỉnh di Sang iek ruak Sản nhi tỉnh saong brei thau ka bruk kỷ luật urang kamei hộ sinh Phan Thị Vân, urang brei suan jru meng dưỡng thai tapa plaih thai ka urang metian Lương Thị Tưởng, umo 32 thun, xã Nghĩa Thắng, huyện Tư Nghĩa, tỉnh Quảng Ngãi.  Hội đồng kỷ luật Sang iek ruak Sản nhi tỉnh Quảng Ngãi hu tabiak  kỷ luật cảnh cáo saong panduan salih bruk ngak, oh daok brei ngak bruk chuyên môn ngan haong urang kamei hộ sinh Phan Thị Vân. Taphia di nan, Ban Giám đốc Sang iek ruak jeng taduan xử lý gah trách nhiệm khik iek.

# Di nyaom biai xúc tiến đầu tư tỉnh Phú Yên thun 2018 rah tabiak di harei 19/1 tal, hu rilo dự án buh jien tame gah ngak nong hu padang ngak, jao brei harak adat đầu tư, harak tut angan đầu tư. Dalam nan hu : dự ánTrang trại raong limo ia tasau praong tui jalan công nghiệp Công nghệ glaong di xã Sơn Định, huyện Sơn Hòa, ngan saong yaom jien buh tame abih tih labaih 1.150 tỷ đồng. 3 dự án karei gah ngak nong jeng hu peih ngak. Ông Lê Tấn Hổ, Giám đốc Sở Kế hoạch- Đầu tư tỉnh Phú Yên brei thau: Dom dự án hu padang ngak mbang ini lac jalan peih tabiak piah hadei ini meda ieu rilo dự án buh jien tame gah ngak nong.

# Harei 17/1, pak Mu-yim tỉnh Kon Tum hu rah tabiak bruk peih parang iek inem mek ilamo “Bhap bani dom taneh aia ASEAN”. Parang iek hu 3 kadha ngan haong 334 tác phẩm, 39 hiện vật mai meng dom negar yau Malaysia, Indonesia, Lào, Campuchia, Singapore... brei mboh rai diuk, dom labik gheih mekre, ilamo 10 negar ASEAN. Abih di nyu nan lac, dalam 334 tác phẩm hu parang iek dalam mbang ini, hu mbaok di 10 tác phẩm mek hu Cúp đồng hạng “Thaot binguk ASEAN 2017”. 

#mBan tacei pato jak ba halan hatian brei darah Cần Thơ daok patabiak bruk“Lễ hội Xuân hồng 2018” saong harei “adit bhong” thun 2018 ngan saong kadha” brei tanyaoh darah bhong– alin brei raidiuk’. Tui nan, Cần Thơ kham merat jak ba takik abih 10.000 urang tut angan brei darah, taduan mek takik abih 6.700 đơn vị darah. 

Khaw tin dunya

# Dalam sa mbang họp báo bahrau ini, Tổng thư ký Liên Hợp quốc An-tô-ni-ô Gu-tơ-rét (Antonio Guterres) brei thau: talei rohim pambuak bruk di Mỹ saong Trung Quốc hu makna biak praong, saong bruk dua negar ini padang sa talei rohim pambuak bruk siam meda ngak pambak khang tal dom taneh aia karei angaok dunya.

# Kuhria tal harei 16/1, takik abih 25 rabau urang njauk nao plaih hadei di tuk ceik apui May-ơn  (Mayon) di tỉnh An-bay (Albay), Phi-líp-pin daok pruh. Viện roh duah ceik apui saong địa chấn Phi-líp-pin (Phivolcs) mboh hu 9 mbang megaiy, dalam nan hu 4 mbang pagam tui dom cột nham thạch saong 75 mbang pruh nham thạch, taphia nan brei thau sa mbang pruh tayah tayac khang meda rah tabiak tuk halei oh thau dahlau hu.

# Bộ Thống nhất Hàn Quốc brei thau, negar ini hu padang sa kapul ngak bruk di raja-ei piah daong dom bruk di kapul Triều Tiên mai hu mbaok dalam Thế vận hội mùa Đông Pi-âng-chang 2018. Tui pathau khan, kapul ini hu jaik 20 urang jakar Mnetri Thống nhất saong mnetri ilamo, jeng yau Ủy ban peih ngak Thế vận hội mùa Đông Pi-âng-chang 2018, hu brei bruk daong dom vận động viên Triều Tiên, kapul urang cổ động saong kapul nghệ thuật nao tui./.