# Harei (17/11), pak bal Nam Định, Pasak Điều phối negar gah pagam  bộ phận rup babhap manuac urang (dalam Mentri Y tế) pambuak haong Sang bac Đại học Điều dưỡng Nam Định peih Harei pataom “Rik daong brei ka rai diuk” piah pathau khan saong pok sap iew manuac urang hu mbaok tame bruk alin hadiah mô, tạng hadei di metai nao. Labaih 5.000 sinh viên dom sang bac đại học, cao đẳng dalam bal Nam Định hu mbaok tame harei pataom ini. 

# Akaok Ubbhap bini tỉnh Thừa Thiên-Huế bahrau mbaoh tangin brei adat buh jien tame ngak dự án “Palagaih song pacang caga biến đổi khí hậu tỉnh Thừa Thiên-Huế” kayua rajaei Luxembourg dong  meng kadung jien Khí hậu dunya di negar ni. Dự án hu yaom jien buh tame ngak abih tih 2,3 triệu Euro, samu  55 tỷ đồng, hu peih ngak di 29 xã dalam dom huyện Quảng Điền, Phú Vang song huyện Phú Lộc. 

# Pahadhar 35 thun Harei Gru pato Việt Nam 20/11, pak tỉnh Vĩnh Long hu peih bruk thau dhar phor 27 gru pato hu ralo rik daong ka gah pato megru taduan mek  hu biểu trưng tri ân di UBND tỉnh Vĩnh Long. Langiu di nan, 50 gru pato hu rai diuk kan kandah jeng hu daong brei, yaok baoh sang hu 2 triệu đồng. 

# Pahadar 35 thun harei gru pato Việt Nam 20/11, bahrau ni Sở pato megru  tỉnh Cà Mau peih bruik pok meyaom dom gru pato naih gheih. Dalam mbang ni, Sở pato megru Cà Mau dok hu pok meyaok 37 gru pato song  14 anek saih dalam tỉnh hu rilo jak jeng dalam bruk  “bac da-a song ngak tui jalan hadah krah siam mekre di Hồ Chí Minh”.

 # Hu bruk njauk hatai di Thủ tướng raja-ei ka bruk palih ruah harei 10/12 lac Harei Cà phê Việt Nam, meng harei 9 - 11/12, danak dak “Harei Cà phê Việt Nam mbang ka sa” thun 2017 meda hu peih ngak pak bal Đà Lạt, tỉnh Lâm Đồng ngan haong kadha “Tukvak cakrok patagok bahrau di cà phê Việt Nam dalam tukvak mbeik drei yam tame”. Ini jeng lac tukvak piah ka dom doanh nghiệp thau ka darak pasar, meyaih khan pandap panda, peih prong darak pasar pablei  cà phê “Made in Vietnam”. 

  # Xã Tam Hiệp, huyện Bình Đại, tỉnh Bến Tre dok di kreih krong Tiền, hu labaih  3.600 boh sang duik rai  song jiak 600 ha bein phun mbang boh. Palao kaoh ni hu ar pacang taom dar atah 24 km; dalam nan bahrau hu   1,7 km  ar pacang hu  bê tông khang kajap. Bahrau di, ia ndik song riyak khang ngak tayah 200 mét ar pacang di  palei 1. Biak metuah, bhap bini thau avar song pasiam veik chip, nan ye khat lihik drap ar oh hadom. 

 # Harei (16/11), Pasak Y tế huyện Nhơn Trạch, tỉnh Đồng Nai brei thau daok taduan saong iek ruak pandung ka 10 urang ngak di Công ty TNHH Hwaseung Vina (daok di Khu công nghiệp Nhơn Trạch 1, huyện Nhơn Trạch). Dom urang ngak ini njauk pandung kayua patuh bình điện pak công ty. Urak ini dom urang ruak daok hu  tui iek pren yava, oh hu thei nguy hiểm tal tính mạng.

Khaw tin dunya:

# Rajaei Hy Lạp bahrau tabiak panuac lac caik quốc tang 3 harei piah hadar dom urang gaok bala di mbang ia sua meng bloh di negar ni ngak takik di abih 15 urang metai .

# Hạ viện Mỹ bahrau brei tapa jalan pasiam veik bruk kak  je kayua raja-ei di Tổng thống Đô-nan Trăm pok tagok, meyah hu patabiak ini lac mbang salih bahrau bruk kak je prong abih pak Mỹ kuhria meng thun 1980. Tui nan, kadung jien kar ja di Mỹ meda thâm hụt 1 ribau 500 tỉ đô la Mỹ dalam 10 thun tal. Cambaih laih, tanut kuhria je thu nhập cá nhân hu patagok, meng 4 tagok 7 saong thuế thu nhập doanh nghiệp trun meng  35% daok 20%.

# Di gah kreih negar Nga  rah tabiak sa bruk paok gauk trak di sa radeih  buýt song radeih tải, ngak takik di abih  15 urang metai. Tui  cảnh sát, langik tasik meda lac sa dalam dom makna, kayua lac di tuk rah tabiak bruk radeih paok gauk hu tuyết laik di labik ni./.