# Patui danak dak mbang nyaom, mesup harei ni, Quốc hội ginum biai di ka dự án hukum pacang caga tham nhũng (pasiam veik). Dahlau di nan, ginum biai dự thảo sarak ka jalan ngak, sarak patagok ban raya Hồ Chí Minh, hu rilo urang njauk hatai glong song bruk ba tabiak sarak song ndom lac, ni lac tuk vak palagaih piah ka QH ba tabiak jalan ngak sarak ka ban raya  Hồ Chí Minh. 

# Ủy ban Mặt trận negar Việt Nam tỉnh Phú Yên barau taduan mek pandap daong di rajaei Lào daong ka tỉnh Phú Yên ramik pasiam kanyak jhak di mbang ribuk 12 hu: 10 tấn brah; 10 tấn ndiuk saong 01 tấn ralo pabui, limo thu . Dom kadung panadap ini hu parabha ka dom huyện bhum ceik Đồng Xuân, Sông Hinh saong Sơn Hòa piah brei ka urang bhapnini. 

# Dhar Gilang pariak sarak karja Việt Nam di Đắk Lắk hu ba dom kapul nao rivang tangi sua, dong ba bhap bini di puk palei  pasiam veik dalam  mbang ribuk ka 12. Tui nan, Dhar hu jao tapak ka Uỷ ban MT negar Việt Nam 5 huyện njauk khat lihik trak dalam mbang ribuk meng bloh yau  M’Đrắk, Ea Kar, Krông Bông, Krông Năng song  huyện Lắk, tong abih yaom jien labaih 500 triệu đồng.

# Di tỉnh Quảng Trị, hadei dom mbang hajan praong, lượng hajan meng 200- 300 mm, ia dom kraong tagok samal, libik hạ du mbuan si ia dauk trak. Mban tacei pato pacang caga bala saong duah daong bala tỉnh Quảng Trị hu pandar dom puk palei peih bruk pacang caga saong hajan xua tui pakat báo động; ba brei menuac urang khik caga, cảnh báo kanyak jhak ka dom libik ngầm, tràn, tatua cống, bến đò ngang, caga oh brei urang bhapnini nao mai dalam tuk hajan praong.

# Harei 21-11, sa khối lượng prong patau di angaok  ceik Hải Vân njauk glut dane  ngak ka jalan pasei Bắc Nam tapa ceik  Hải Vân hu gar radeih veik. Công ty khik ramik  jalan pasei Quảng Nam - Đà Nẵng brei padeih bruk peih nduac, phong tỏa hiện trường, piah pasiam veik bruk glut jaleih patau. Urak ni rilo radeih pasei brei dok veik di 2 ga Kim Liên song Đà Nẵng piah cang pasiam veik jalan dhual.

       # Pambuak tal bruk pacah đê bao cồn Phú Đa, thuộc xã Vĩnh Bình, huyện Chợ Lách, tỉnh Bến Tre, rayo sap ndom Viet Nam hu khan brei thau, uy mban bhapbini huyện Chợ Lách brei thau, oh ka caga hu glut jaleih haluk di libik ini. Barau ini, di libik ini hu labaih 20 mét taneh tapeng kraong Cổ Chiên daok glut dalam trun ia, pambak tame mbaok haluk meng 2-3 mét.  Urak ini, puk palei peih bruk thi công dak padang siam 470 mét đê barau piah caga ia tagok.

# Hadei di rilo bilan ramik caga song peih bruk kỹ thuật, harei  25/11, tuyến radeih buýt jalan krong mbang camereip di ban raya HCM hu lộ trình meng Bến Bạch Đằng, Quận 1 tal Linh Đông, quận Thủ Đức hu ba tabiak ngak. Jalan ni pandar kapan buýt 80 labik, meyah lac, kurhia ka bruk taduan song bayar tuai, kapan buýt jalan krong lihik abih 30 minite lac hoàn thành lộ trình, samu 2/3 dut song radeih buýt  jalan mbak angaok sa tuyến. Yaom  harak vé tui kuhria lac 15.000 đồng/sa urang. Langiu di nan, radeih buýt krong mbang ka 2 hu atah 10,3km, jalan nao meng Bến Bạch Đằng tal labik  bến Lò Gốm (Phường 7, Quận 6) hu peih ngak dalam thun  2018.

Khaw tin dunya

# Dalam nyaom biai akaok mintri Ngoại giao ASEM mbang yaka 13 (FMM-13) di Mi-an-ma, Phó Thủ tướng, akaok mintri Ngoại giao Phạm Bình Minh hu mbang taom gaok dua gah saong akaok mintri Ngoại giao dom taneh ia  Pháp, Lúc-xăm-bua, Hung-ga-ri, Phần Lan saong taduan raok Quốc vụ khanh Ru-ma-ni. Dom đối tác khan brei thau lập trường nguyên tắc di Việt Nam saong ASEAN ka bruk khik hoà bình, tani tanat, tự do hàng hải saong jalan par di Biển Đông.

         #  Harei 20/11, tổng thống Mỹ Đô nan Trăm (Donald Trump) hu ba  negar Triều Tiên tame harak dom negar dong ka bruk khủng bố. Ong Trăm ndom lac karja Triều Tiên hu rik dong ka dom bruk khủng bố dunya  dalam nan hu ám sát di negar langiu jang yau pandar ieu negar ni njauk padeih jip danak dak patagok hạt nhân song tên lửa đạn đạo di drei. Ong Trăm brei thau mintri jien padai Mỹ hu pathau khan dom bruk trừng phạt khang bahrau tal tanut glong di abih ka  Triều Tiên dalam harei  21/11.

# Đảng đối lập praong di Zim-ba-bu-uê peih mbang nyaom di harei 21/11 piah quyết định njauk hai oh gam saong đảng cầm quyền ZANU-PF luận tội Tổng thống Rô-bớt Mu-ga-bê. Hãng tin CNN di Mỹ brei thau, di mbang ginum biai di Tổng thống Zim-ba-bu-uê  Mu-ga-bê saong dom tướng lĩnh bol bala, urang dang akaok 93 thun ini jeng njauk hatai từ chức saong harak từ chức di ông hu dalam dự thảo./.