# Harei 22/6, di tỉnh  Bình Dương, patui dom bruk ngak dalam mbang mai rivang Việt Nam di Thủ tướng Campuchia Hun Xen, Thủ tướng Nguyễn Xuân Phúc song  Thủ tướng Hun Xen hu var ngak bruk, ginum biai dom jalan jhul pakhang talei pambuak bruk 2 negar. Thủ tướng Nguyễn Xuân Phúc caong Campuchia patui jalan sangka, tacei pato dom gah chức năng jhul pakhang song ngak siam bruk brei harak gar njauk adat hukum ka urang Việt daok di Campuchia tui ginum biai dalam mbang taom gaok harei  25/6.

# Dalam dom bruk di danakdak “ adit angan negar Việt Nam 2017", di Hà Nội hu peih parang iek jak jeng di taneh ia Việt Nam, rah tabiak meng harei ini tal abih harei 24/06. Parang iek jaik 100 blah thoat, yaih khan ka dom angan negar ye: dây chuyền ngak  mbon –jangaih brah;  kiak bingu Secoin; Đạm cà Mau; dom njam patam baoh kraoh pablei tabiak taneh ia lingiu…urang mai mong parang iek meda mboh hu tukvak dak padang saong patagok di dom doanh nghiep tapa dom tukvak peih ngak danakdak  angan negar.

# Harei 22-6, di ban raya Hồ Chí Minh, Mintri pajeng ba peih bruk patom iek veik 3 thun peih ngak hukum pasiam veik, pabak dom paka di hukum jalan krong ribong gah merong.  Dalam 3 thun tapa, dom bến đò tagok jiak 2000 bến; tuia damuai song pandap panda tagok samu 13 song 16%. Hu 210  mbang jalan krong ngak brei 146 urang metai,  khat lihik drap ar jiak  22 tỷ đồng.

 # Harei 22/6, jaik 9.500 thí sinh tỉnh Sơn La yam tame môn pakacah akaok mereip, mbang pakacah Trung học phổ thông pakat negar thun ini. Di var pakacah akaok mereip ini, dom hội dong pakacah dalam tỉnh hu ngak catang dom adat pakacah; oh hu thí sinh saong giám thị iek pakacah halei ngak suan adat pakacah. Min hu 50 thí sinh klak pakacah oh hu makna.

 # Harei 22-6, labaih 13.000 thí sinh di Tiền Giang yam tame harei pakacah  camereip di mbang pakacah Trung học phổ thông pakat negar.  Piah palagaih ka dom thí sinh, tỉnh  padang 25 labik pakacah song 553 balik pakacah di 10 huyện, ban song ban sit  . Tui danak dak “ Daong pren bilan pakacah”, Kapul dam dara ban Mỹ Tho hu alin pok lisei ka thí sinh kathaot. Tapa nan, Kapul pahla song dom kalup kapul hu ba jiak 1.000 pok lisei dong ka dom thí sinh. 

# Thành Đoàn ban raya Hồ Chí Minh barau peih mbang nyaom yaka sa Hoi dong uranaih ban raya ngan saong bruk hu mbaok di 55 urang jakar umo meng 9 tal 16 thun. Ngan saong kadha “ ban raya harei hadei di adei” mbang nyaom taduan hu rilo sáng kiến siam mekre di thiếu niên, nhi đồng ban raya pataom tame dom asal kadha ye: caong khin di adei ka ban raya harei hadei yau habla dalam dom bruk bac megru, bui mein, labik daok, jalan nao mai di bhapbini; ba tabiak jalan ngak cambaih piah paglaong chat luong daok ka uranaih di ban raya hu patagok di abih gah.

 # Tỉnh Bạc liêu dok peih ngak rilo jalan piah ba gah  du lịch dalam taneh ia patagok. Tỉnh kham merat thun ni achreih hu labaih 1,4 triệu mbang tuai damuai dalam negar song dunya, jien mek hu labaih 1.150 tỷ đồng. Bạc Liêu urak ni hu  8 labik du lịch hu pok brei angan gheih mekre di bhum taneran krong  Cửu Long. Tukvak tapa, tỉnh  hu patagok talei pambuak bruk, dui pachreih saong ieu da-a  rilo  doanh nghiệp buh jien tame gak mbang gah bruk ni. Kuhria meng thun 2011 mbiah tal ni Bạc Liêu taduan labaih 5 triệu tuai damuai, mek hu labaih  4.000 tỷ đồng. 

Khaw tin dunya

# Nhật Bản barau peih dom mbang pasram caga khủng bố di mblang par dunya di ban ine Tô-ki-ô saong gilang pariak trung ương Nhật Bản piah paglaong an ninh dahlau di Thế vận hội Ô-lim-pic saong Pa-ra-lim-píc 2020. Di jabat gilang pariak Trung ương, jaik 40 urang di gilang pariak gam saong cảnh sát hu pataom tame mbang pasram bruk lac kol khủng bố duah jalan nduac tame saong caik bom di gilang pariak.

#  Mỹ hu panuac lên án bruk kol IS palai pajoa sang megik islam Nuri di ban Mô-xun, gah brak  I-rắc song tòa tháp đôi hu angan Hát-ba (Hadba) di sang megik ni.  Thiếu tướng quân đội Mỹ Giô-sép Mác-tin (Joseph Martin), Tư lệnh lục quân di liên quân pacang khủng bố, ndom lac bruk dom tay súng IS palai pajoa sang megik song sang prong nan lac sa  tội ác cagar veik bhap bini Mô-xun song negar I-rắc.

# Akoak mintri Kinh tế Thổ Nhĩ Kỳ Ni-hát Dây-bếch-chi (Nihat Zeybekci)  brei thau lac sruh kapal tasik akaok meraip pajeng pandap daong di taneh ia ini brei ka Ca-ta hu tagok jalan harei kabroi. Bruk ngak ini di Thổ Nhĩ Kỳ rah tabiak dalam tuk Ca-ta daok gaok dom taneh ia dalam khu vực phong tỏa gam gah ngoại giao saong kinh tế. Javap calei phỏng vấn hãng tin Anadolu, akaok mintri Kinh tế Dây-bếch-chi brei thau, Thổ Nhĩ Kỳ daok daong Ca-ta meng hatai caong khin mbang khủng hoảng ngoại giao di vùng Vịnh samal hu langyah. Tui ông, Thổ Nhĩ Kỳ hu brei 105 mbang par pajeng ba pandap daong ka Ca-ta kuhria meng tuk taneh ia ini gaok phong tỏa./.