# Mintri Y tế tabiak Thông tư ka 15/2018/TT-BYT quy định yaom dịch vụ iek ruak, iek ruak bảo hiểm y tế di dom sang iek ruak dalam negar song tacei jalan áp dụng yaom, bayar jien iek ruak dalam dom trường hợp. Njauk sangka dalam Thông tư 15 lac yaom iek ruak trun meng 15% - 20%. Thông tư ni hu ba tabiak pandar meng harei 15/7.

# Tui kuhria mboh di mintri Lao động thương binh saong xã hội, dom thun tapa, kadung jien brei mesraiy tui sarak hu nao tal taong abih dom xã, phường ban sit dalam taneh ia, dalam nan pataom tame brei mesraiy ka dom xã bhum atah bayah, bhum kan kandah. Meng phun jien ini, labaih 112 rabau urang ngak lac urang bangsa takik duah hu bruk ngak. Baoh sang kathaot dalam taneh ia tukvak 2005 – 2017 trun meng 22% daok ala 7%, abih di nyu nan lac patrun kathaot di bhum bhapbini bangsa takik.

# Di dom huyện bhum ceik tỉnh Quảng Ngãi, rilo bruk rong glang, ngak mbang pablei salih di mik va ba mai kein liba glong. Meng pandar siam jien mesraiy, rilo boh sang patruh kathaot, yam tagok kaya meda. Meng akaok thun tal ni, pok jien brei sre ngak nong, palei pala  di  tỉnh Quảng Ngãi jiak 7.500 tỷ đồng. Dalam nan jien sre tapa kapul mesraiy labaih 1.600 tỷ đồng. Quảng Ngãi peih ngak dom danak dak pachreih nong, pachreih glai, pachreih ikan dong palagaih ka bhap bini patrun kathaot. 

# Tỉnh Ninh Thuận hu 37 xã dalam 6 huyện di bhum bangsa takik saong bhum ceik ngan saong menuac sia labaih 348 rabau urang, meblah jaik 57% dom urang bhapbini dalam tỉnh. Dalam nan, bhapbini bangsa takik hu 162 rabau urang, rilo meng lac bansga Cam saong bangsa Ra Glai. Meng thun 2010-2017, UB bhapbini tỉnh hu pataom tame jak ba caik dahlau bruk pambuak pagam rilo phun jien meng dom danakadak, dự án, jak ba hu labaih 5.900 tỷ đồng ba tame ka jaik 800 hạng mục công trình ka bhum nan. Lingiu di nan, tỉnh daok caik phun jien daong padang barau labaih 5.500 baoh sang ka bhapbini bangsa takik, sang kathaot bhum kan kandah; peih taneh bilau saong ramik pasiam labaih 2.500 ha taneh pala drak ka labaih 300 sang urang bangsa takik. 

# Tui  panuac khan di  Hợp tác xã ca cao Thống Nhất, tỉnh Đồng Nai urak ni yaom boh ca cao that di Công ty TNHH ca cao Trọng Đức dok beir jang duh song yaom langiu darak pasa ngak patrun kein laba di urang nong pala ca cao. Hu thau, Hợp tác xã ca cao Thống Nhất urak ni hu labaih 69 hécta, dalam nan 45 hécta dok dalam tuk paik boh song hu Công ty TNHH ca cao Trọng Đức mbaoh tangin blei abih meng rilo thun tapa.

Khaw tin dunya

# Mbang akaok meti dom urang alamu di sang bac King’s College London di Anh hu ngak iek pambuak saong hóa trị haong dom janih jru iek ruak kanyik kalik di ranaih kurang bilan dalam iak ruak ung thư, tapa nan daong pachreih bruk miễn dịch tự nhiên di rup pabhap. Kapul roh duah di sang bac King’s College London duah mboh lac, sa janih jru daok hu ngak iek dalam iek ruak kanyik kalik di ranaih ndih tapui kurang bilan tuk pambuak saong hóa trị liệu meda pacang cakak HO-1, tapa nan brei ka hệ miễn dịch mbang tame dom tế bào ung thư hu siam lagaih di abih.

#193 urang oh ka duah mboh hadei di tuk sruh kapan kayua ong Tua Sagala peih nyu tabaleik di danao ceik pui di Indonesia 3 harei dahlau. Cảnh sát negar ni chap ong Tua Sagala piah thẩm vấn ka bruk meda jeng sa bala khang abih di angaok krong di Indonesia ngan saong hu 193 urang  lahik

  # Philipin jeng lac taneh ia bo Cao ủy Liên hợp quốc ka urang tị nạn dahlau diah hu panuac huac kanda rilo ka bruk caga ma túy di taneh ia ini. Panuac ini gaok bruk chỉ trích khang di Tổng thống Philipin Rô-đri-gô Đu-téc-tê (Rodrigo Duterte). Ngan saong bruk Mỹ jaik ini tabiak truh Hội đồng Nhân quyền Liên hợp quốc, rilo urang brei thau lac Philipin meda lac taneh ia nao tui jalan nao di Mỹ tabiak truh Hội đồng nhân quyền. Min, brei panuac di var họp báo, urang brei panuac di Tổng thống Philipin Ha-ri Rô-kê (Harry Roque) khan lac, tabiak truh Hội đồng nhân quyền Liên hợp quốc lac bruk di Mỹ. Philipin jeng daok dalam jabat ini./.