# Tukvak pahadar 70 thun Harei Thương binh liệt sỹ, page ini 24/7, Phó Thủ tướng Thường trực Raja-ei Trương Hòa Bình hu mai pok bingu saong am cuh gilau di labik rup patau Amaik Việt Nam anh hùng di xã Tam Phú, bal Tam Kỳ, tỉnh Quảng Nam. Phaok Thủ tướng Trương Hòa Bình saong dom urang pal akaok  tỉnh Quảng Nam hu caik sa minit pahadar saong thau dhal phol tal bruk rik daong, var klaak rup drei di dom anh hùng liệt sỹ; bhap bani saong dom amaik Việt Nam anh hùng brei ka bruk dang tagok peih paha bangsa, dak padang saong khik iek palei negar.

# Tapa nan,  tỉnh Quảng Nam hu brei sổ patak pataom dhar phuan alin ka 914 amaik Việt Nam anh hùng daok diuk, yaok sổ 5 triệu đồng; daong padang sang daok ka dom sang sarak, ramik pasiam dom labik pahadar liệt sĩ ngan saong yaom jien labaih 9 tỷ đồng.

# Ban liên lạc urang dahlau daih ngak bol lin Trung đoàn 20 – Quân khu 9 bahrau peih pakak Rup patau pahadar dom anh hùng, liệt sỹ Trung đoàn 20 - Quân khu 9 pak ấp Hai Lành, xã Ngọc Hòa, huyện Giồng Riềng, tỉnh Kiên Giang. Công trình hu padang ngak di taneh praong labaih 500m2 haong yaom jien abih labaih 300 triệu đồng kayua Kapul urang dahlau diah ngak bol lin Trung đoàn 20 – Quân khu 9 rik daong.

# Tui mintri pato megru, suai abih harei 1-8, dom sang bac đại học meda patabiak điểm chuẩn trúng tuyển saong angan anek saih trúng tuyển. Hadei di tuk dom sang bac patabiak điểm xét tuyển, anek saih njauk brei thau tame bac meng bruk nap ka sang bac bản chính harak chứng nhận kết quả pakacah.

# Page harei 23/7, pak sang iek ruak Đa khoa tỉnh Đắk Lắk, Kadung jien daong uranaih tỉnh Đắk Lắk pambuak haong Kapul blac raih cambuai klao Việt Nam (Operation Smile Việt Nam)  peih ngak danak dak Khám saong blac raih cambuai brei saoh ka 140 uranaih saong urang prong sang kan kandah di dom tỉnh Tây Nguyên lac: Đắk Nông, Đắk Lắk, Gia Lai, Kon Tum, Lâm Đồng. Ini lac mbang ka 4 Kapul Operation Smile Việt Nam, Kadung jien daong uranaih tỉnh Đắk Lắk peih bruk khám, blac raih cambuai ka uranaih saong urang prong di dom tỉnh Tây Nguyên.    

# Piah plaih bruk gian lận thuế xăng, menyek, anak tal Cục thuế ban raya Hồ Chí Minh meda peih bruk taok tem abih dom cây xăng.  Bruk taok tem ini pandar ka taong abih dom cây xăng,  kuhria gam cây xăng hu kết nối điện tử. Dahlau di nan, Cục Thuế ban raya hu ngak bruk saong 29 libik pablei salih xăng menyek đầu mối ka bruk taok tem ini. Ông Lê Duy Minh, Phó Cục trưởng Cục Thuế ban raya Hồ Chí Minh brei thau: “Anak meta kol dahlak meda peih ngak di dom quận trung tâm. Hadei di nan, kol dahlak pasang iek dom thao tác taok tem di dom saai dalam tổ pambuak bruk saong bruk pablei salih di dom cửa hàng pablei salih xăng menyek. Kol dahlak pataom veik kinh nghiệm saong peih ngak abih di dom quận daok veik siam jang”.

# Sa bruk baleik gilai angaok binek thủy điện Trị An dalam biar harei 23/7 ngak ka sa urang kamei metai. Tui panuac khan tuk akaok mereip, jaik 17h harei 23/7, sa nyaom 3 urang hu 2 urang likei sa urang kamei oh ka thau angan je nao tame sa quán nhậu jaik binek thủy điện Trị An, ấp Bến Nôm 2, xã Phú Cuờng, huyện Định Quán, tỉnh Đồng Nai mbang menyum. Mboh sa sruh gilai sit caik di nan, 3 urang ndik tagok nao tabiak langiu ma-in. Tuk nao atah ar jaik  10 mét ye sruh gilai nan mbleing blaoh tabaleik, dua urang likei dam caluai hu tame ar pok sap iew daong, min urang kamei oh thau caluai metai thit.

Khaw tin dunya

# Hãng thông tấn karja di Mi-an-ma barau brei thau, gah an ninh taneh ia ini puac adit blaoh hu mek kareik 31 nghi phạm khủng bố di ban Mang-tau (Maungtaw), mbang Ra-khi-nê (Rakhine), gah meraong taneh ia ini. Gah an ninh Mi-an-ma hu caik dalam cảnh giác glaong di 2 ban ini, tuk bol bala jaik ini duah mboh rilo jalan hầm, phao ndao saong trại pato pasram khủng bố di ini.

# Thủ tướng Thái Lan Pra-dút Chan-ô-cha (Prayut Chan-o-cha) bahrau tacei  Cục Khik iek xuất nhập cảnh mong iek brei klaak bruk pandar tuai negar langiu vak tame harak brei thau bruk nao – mai dalam mẫu “TM6” tuk ngak harak xuất nhập cảnh. Urak ini, mẫu “TM6” hu labik caik ka tuai negar lingiu vak brei thau bruk nao mai hu dua binah tame - tabiak, ngak ka bruk ngak harak xuất nhập cảnh abih ralo rukvak. Piah pasiam veik thủ tục xuất nhập cảnh, trun takik tukvak cang pak mblang kapal haok, palaghaih ka tuai du lịch, Rajaei Thái Lan hu brei tapa tok pandar mẫu “TM6” tal abih harei 30 bilan 9 tal. Meng harei 1/10 meda pandar mẫu “TM6” bahrau mbuan lagaih jang, khik iek tự động meng mã vạch.

# Cảnh sát di tỉnh I-ba-ra-ki (Ibaraki), Nhật Bản brei thau, sa mbang bala di jalan mbak barau rah tabiak di jalan cao tốc Giô-ban (Joban) di tỉnh I-ba-ra-ki, ngak brei 3 urang metai saong 5 urang karei bị thương. Dalam thun 2016, dom urang metai kayua bala di jalan mbak di taneh ia ini hu trun ala 4 rabau urang saong ini lac thun hu dom urang metai kayua bala di jalan mbak bair abih uhria dalam 67 thun tapa di Nhật Bản./.