#Thủ tướng Nguyễn Xuân Phúc bahrau mbaoh tangin brei ngak Đề án "Pasram, paglaong ilamu bangsa ka dom urang jakar, urang ngak bruk karja tukvak 2018-2025."  Dom menuac di Đề án lac urang jakar, urang ngak bruk karja tui iek tapak bruk bangsa, iek gah bruk bangsa, urang jakar, urang ngak bruk karja daok ngak bruk di dom labik hu urang bangsa takik, urang jakar palei taom gaok, ngak bruk tapak haong bhap bini bangsa takik. Đề án piah daong peih ngak siam bruk pathau khan, jak ba bhap bini bangsa takik patagok bruk ngak mbang kinh tế-xã hội tui jalan di Đảng, hkum di Karja, patagok bruk jum pataom bangsa. 

# Meng harei 1/7/2018, 9 Hukum hu ba tabiak pandar. Nan lac hukum: khik ramik sraiy công; hukum ramik pasiam, pabak dom paka di hukum Jabat lambaok taneh ia Cộng hòa xã hội chủ nghĩa Việt Nam di taneh ia lingiu; hukum Cảnh vệ; hukum khik ramik, pandar phao ndao, pandap patuh saong công cụ daong; hukum Trách nhiệm bồi thường di karja; hukum jao brei công nghệ; hukum Thủy lợi; hukum jalan radaih apui; hukum taduan mek thông tin.

# Urak ini, jaik 4.000 sang bhap bini daok di 3 labik lac ban sit Phú Túc, xã Phú Cần, palei Kiến Xương di xã Chư Gu dalam huyện Krông Pa, tỉnh Gia Lai daok pandar ia njom pasei biak ralo. Tui pathau khan di sang mac ia pandar huyện Krông Pa, bilan 6/2018, pasei dalam ia pandar di bhap bini lac 1,17 mg/l, glaong jang 5 mbang dut saong quy chuẩn kỹ thuật quốc gia (0,3 mg/l). Njauk biai nan lac bruk ini rah tabiak meng bilan 5/2017 min oh ka hu langyah tal labik tal dhua.

# meng akaok thun tal ini, huyện Bắc Bình, tỉnh Bình Thuận  hu 61 urang ruak pandiak tabiak darah, dalam nan hu 4 urang ruak trak, 874 urang gaok aih traoh, 18 urang ruak tangin takai cambuai. Tal tukvak ini, di huyện Bắc Bình oh hu sruh jit praong. Piah caga jit ruak di bilan hè, ông Tạ Văn Tổ - akaok jabat brei thau, pato pakai pren yava, pasak Y tế Bắc Bình khan lac: dalam pathau khan, kol dahlak tuk halei jeng ndom khang piah urang bhapbini hadar ruak pandiak tabiak drah oh ka hu jru iek ruak đặc hiệu saong oh hu văcxin caga ruak, biak mbuan si metai meyah oh hu chẩn đoán saong iek ruak drah samal. Yau nan ye caga ruak lac bruk siam di abih.

# Dalam mbang pasang iek khảo cổ học bahrau ini di huyện Tĩnh Gia, tỉnh Thanh Hóa, dom urang roh duah di Viện Khảo cổ học duah mboh hu ralo bingun klak ndung bak ilamu Chăm Pa di xã đảo Nghi Sơn. Baoh bingun praong abih hu mbaok atah yaok gah lac 2,9m, dalam labaih 5m daok yau tamo. Daning bingun hu pagam meng dom candaih patau kapal, hu kaoh ngak biak siam, pablak tame lac dom candaih patau praong, samu jangaih, oh hu chất kết dính. Bruk njauk biai nan lac mbat bingun hu ngak sit veik meng 3 tal patau dak 4 meta praong angaok, sit ala.

Khaw tin dunya

# Di tỉnh Kandal, taneh ia Campuchia, bol bala Hoàng gia Campuchia, karja tỉnh Kandal saong Quân khu 9 – bol bala bhapbini Việt Nam hu peih ngak praong prang bruk jao brei saong taduan mek 33 talang Quân tình nguyện saong chuyên gia Việt Nam ndih trun di Campuchia mai taneh ia. Meng thun 2002 tal ini, Quân khu 9 saong karja, bol bala, bhapbini tỉnh Kandal hu pambuak gauk pataom hu labaih 1.100 talang liệt sĩ ba mai taneh ia, tui nan abih tih talang liệt sỹ hu kuac mek dalam taneh ia Campuchia lac jaik 7.500.

# Trung Quốc bahrau khan lac jit cúm menuk ada A/H5N1 tamuh tabiak di sa trang trại daok di tỉnh Thanh Hải, tây bắc Trung Quốc. Gah Thú y dunya (OIE) hu jabat di Pa-ri ba panuac pathau khan di Mintri ngak nong Trung Quốc brei thau, tapon menuk ada di trang trại ini njom cúm A/H5N1 mbuan ba tal ruak biak glaong. Dom gah chức năng hu ba nao am cuh klaak labaih 1 ribau drei menuk rilo piah pacang cakak jit tamuh tabiak. Ini lac sruh jit cúm A/H5N1 akaok mereip tamuh veik di Trung Quốc kuhria meng thun 2014.

# Dom urang dang akaok châu Âu daok pachreih Thủ tướng Anh Thê-rê-sa Mây (Theresa May) ngak cadu dom “giới hạn bhong” ka  Brexit tuk khan lac tukvak piah ngak hu sa thỏa thuận siam oh daok rilo. Urang ngak praong châu Âu jeng pachreih rajaei Anh jhul samar bruk ba tabiak quyết định piah mek hu thỏa thuận tabiak truh saong thỏa thuận ka dom bruk pambuak gauk di harei hadei dalam bilan 10 tal.