Khaw tin 6h30 harei 30/5

 # Ban Nha Trang, tỉnh Khánh Hòa caik sa binah vỉa hè di 30 jalan labik pasak ban dong ka bhap bini pablei salih. Adat pandar vỉa hè brei ka urang hu hộ khẩu daok di ban song oh hu labik pablei salih. Tuk karja mek veik vỉa hè  njauk bayar veik bo oh hu panuac ieu bayar jien, dong jien. Urak ni hu labaih 350 boh sang hu adat pablei salih di vỉa hè dom jalan brei adat. Bruk ngak ni, dong ka bhap bini sahnang hatai ngak mbang, gam khik caga siam mekre mbaok meta jalan mbak. 

# Bruk padang mblang hamu praong pala tabau jeng ye dom janih phun karei di Gia Lai dak harei dak tagok khang. Abih di nyu nan lac bhum bhapbini bangsa takik urang J'rai saong Bahnar dalam tinh tuk camereip hu ngak tui bruk pala drak barau ini saong hu jak jeng. Salih phun pala hu maong lac jalan ngak salih raidiuk di dom buôn, palei; taphia nan, jeng lac “ libik hadah” dalam bruk patagok kinh te njauk hu peih praong di dom bhum bhapbini bangsa takik dalam tỉnh.

          # Công ty Cổ phần rong glang CP - dhar tỉnh Tây Ninh hu peih cửa hàng pablei rilaow hacih di pasa Long Thuận, palei Long Phi, xã Long Thuận, huyện Bến Cầu. Ni lac cửa hàng rilaow pabui saat cemereip abih hu peih tabiak dalam  chuỗi 40 cửa hàng rilaow pabui di Công ty, tui kuhria hu peih di dom  huyện, ban di tỉnh dalam thun ni piah ba rilawo saat meng dom trang trại rong glang di Công ty tal tangin urang blei mbang. 

# Bilan ngak bruk kayua uranaih thun 2017 rah tabiak meng harei 1/6 tal harei  30/6 di Cần Thơ, ngan saong hatai caong khin dom uranaih hu nao bac, hu pasang iek pren yava, pataom tame bruk bui mein, abih di nyu nan lac uranaih kathaot, bhum atah bayah, uranaih sang kan kandah hu daok dalam labik siam mekre, hu jalan piah ndom tagok sap ndom di drei… Thun ini dom gah, dom puk palei pataom tame paglaong bruk brei thau dom quy dinh ka caga khik uranaih dalam Hukum uranaih, dom kien thuc ka pacang caga taong paoh, xam hai uranaih.

 # Kayua biến đổi khí hậu, abih di nyu nan lac dom mbang hajan jhung bilan ngak ka dom bein chôm chôm di tỉnh Bến Tre tabiak bingu suai jang dom thun dahlau meng 2-3 bilan.  Di tuk vak ni, yaom lac bilan lagaih min  dom bein chôm chôm jeng dok tuk vak tabiak bingu song hu boh sit. Nan ye, tuk Tết Đoan Ngọ song harei patom boh kayau bingi hacih mbang ka 16 dok rah tabiak, tỉnh Bến Tre dok kurang boh kayau ni piah parang saong pablei. Kayua takik hu nan ye yaom  boh chôm chôm di tuk vak ni tagok tal jiak  100.000 đồng/kg. 

          # Tỉnh Long An brei thau lac apdang bhum Đồng Tháp Mười hu dom  huyện Tân Hưng, Vĩnh Hưng, Hộc Hóa, Tân Thạnh, Thạnh Hóa saong ban sit Kiến Tường lac libik ngak nong praong, ngak nong công nghệ glaong di tỉnh. Dalam thun 2015 - 2020, pamaong tal 2030, tỉnh quy hoạch libik ini lac labik pala padai chat luong glaong hu dom pajaih padai pahe chat luong glaong ngan saong taneh pala drak yaok thun 260.000 ha; dalam nan, sản lượng brah chất lượng glaong pablei tabiak taneh ia langiu yaok thun labaih 300.000 tấn. 

# Sở Nông nghiệp song patagok palei pala tỉnh Trà Vinh dok peih ngak danak dak pachreih ba urang nong salih apa pala janih phun karei di labaih 7.900 ha taneh pala padai di dom bhum oh siam lagaih kayua biến đổi khí hậu, kurang ia song njom mbak. Tui nan,  di  huyện Trà Cú hu  2.140 ha , huyện Châu Thành hu 1.570 ha, huyện Cầu Ngang 350 ha taneh padai  salih tapa pala phun karei…Dom mblang taneh nan hu pachreih ba urang nong pala njam patam, phun  công nghiệp katut harei, phun mbang boh pambuak song rong kaya ikan … 

Khaw tin dunya

# Takik di abih 144 urang metai kayua hajan xua saong glut taneh di Sri Lanka. Jaik 500 rabau urang lihik sang danaok. Dom mbang hajan praong abih di taneh ia ini kuhria meng thun 2003 ngak dauk dom libik gah pai saong gah meraong. Sri Lanka hu ba 2 rabau binh sỹ nao daong. Min, dom urang dang akaok brei thau, bruk nao tal dom libik  bala jeng gaok kan kandah saong kan si duah mboh 99 urang lihik.

 # Dom bilan dahlau di bruk bầu cử liên bang, Liên minh chính trị di  thủ tướng Đức An-giê-la Méc-ken jeng dok ba akaok.. Tapa duah thau hatai sahneng di bhap bini jeng brei mboh, meyah thủ tướng Đức hu plih ruah tapak, 52% palih ruah amuk An-giê-la Mécken, dalam tuk hu 29% palih ong Mác-tin Sun-dơ. Mbang tổng tuyển cử  di  Đức hu rah tabiak  di harei 24/9/2017. Rilo blah báo kuhria mboh lac, ni bruk pakacah gauk di amuk Mécken song ong Mác-tin Sun-dơ.

# Labaih 2.000 urang bhapbini daok gaok gar di ban Ma-ra-uy (Marawi), gah meraong Phi-líp-pin, libik rah tabiak bruk mesruh gauk di kol phiến quân Mau-tê (Maute) saong gah rajaei jaik sa adit blaoh. Urang brei panuac di Uy mban pasang iek khủng hoảng Phi-líp-pin brei thau, dom urang bhapbini di ban Ma-ra-uy hu ba nao plaih, min jeng daok jaik 2.000 urang daok gar di dom libik kayua dom phiến quân Mau-tê (Maute) khik iek.