# Harei 30/5, dom urang Quốc hội ginum biai ka bruk kuhria dahlau danak dak padang ngak adat hukum thun 2019, ramik veik danak dak padang ngak adat hukum thun 2018. Dom urang QH ndom lac, hồ sơ caong padang ngak dom dự án hukum oh ka kuhria caga tani tanat, bruk likau dui atah tukvak, rút, pabak dự án tame danak dak daok hu mboh ralo, jeng daok hu ralo bruk ngak oh siam dom adat hukum. Dom urang QH daok brei thau makna ba tal chất lượng dự án adat hukum oh grap tanat sa binah halei nan kayua dahlau di nan, bruk mek ý kiến dalam tukvak padang ngak adat hukum daok ngak meng ngak.

       # Darak pasar padai brah daok tagok khang tui jalan mbang khang dom janih brah siam, hu yaom glaong. Hiệp định pambuak bruk Xuyên Thái bình dương (CPTPP) hu mbaoh tangin bloh, daong ka Việt Nam peih praong darak pasar, paglaong yaom brah pablei tabiak taneh ia lingiu. Tui ralo chuyên gia, meng dom siam lagaih nan, gah padai brah njauk pandar dom ilamu kỹ thuật bahrau, ngak ka nyu siam jang.

# Bộ đội Biên phòng tỉnh Quảng Trị bahrau duah mboh bruk pajeng ba 4.000 lít menyek diezel pablei lậu tapa jalan Pabah mbang tapen negar Dunya Lao Bảo. Jaik 10 tuk page harei 28/5, gah chức năng peih bruk pasang iek sruh radaih ô tô biển số Lào katung tui rơ-moóc tuk daok ngak harak gar nao tapa Lào tapa pabah mbang tapen negar Dunya Lao Bảo. Pak ini, jabat chức năng duah mboh angaok radaih pajeng 4.000 lít menyek diezel padang dalam 20 thùng phi janih 200 lít kayua Ngô Nhật Dương, umo 32 thun, daok di bal sit Lao Bảo peih radaih.

# Đak Lak njauk patagok jang bruk di gah kiểm lâm dalam khik iek glai, nan lac panuac tacei di kapul ngak bruk di Mintri ngak nong saong patagok palei pala kayua ong Hà Công Tuấn, Thứ trưởng thường trực Mintri ngak nong saong patagok palei pala ba akaok di mbang ngak bruk haong  Ủy ban bhap bini tỉnh Đak Lak ka bruk khik iek glai dalam tỉnh.

# Tukvak jaik di ini, di tỉnh Đăk Nông rah tabiak gam gam dom mbang mblung aia, urang metai ralo meng lac dom anek saih. Anak bruk yau nan dom jabat chức năng saong xã hội njauk sangka jang tal bruk pacang khik saong mong iek uranaih tuk hè mai tal. Tui kuhria mboh  di Sở lao động Thương binh saong Xã hội tỉnh Đăk Nông, meng akaok thun tal ini, dalam tỉnh rah tabiak jaik 6 mbang mblung aia ngak ka 12 urang metai, rilo jang sa mbang saong rilo jang 4 urang metai dut haong tukvak ini thun dahlau. Bahrau di abih nan lac mbang mblung aia rah tabiak di harei 9/5 pak xã Đăk Buk So, huyện Tuy Đức ngak ka 4 anek saih metai.

# Di xã Nam Yên (huyện An Biên, Kiên Giang), Hội Liên hiệp urang kumei huyện An Biên pambuak bruk haong Đồn Biên phòng Tây Yên peih tabiak danak dak "Nao gam haong urang kumei tapen negar" tukvak 2018-2020. Danak dak hu dom bruk pathau khan, pato pakai paglaong jalan sahneng, jalan ngak ka urang kumei bangsa takik, urang kumei sang kan kandah daok dalam xã; patrun patakik bruk uraniah klaak bac.... Danak dak jeng hu alin hadiah 1 baoh sang anit ranam yaom 30 triệu đồng, 25 paok pandap ka hội viên, urang kumei kan kathaot, 38 pok jien bac, kuhria tabiak yaom jien abih tih lac jaik 100 triệu đồng./.

#  Hãng thông tấn negar Triều Tiên KCNA harei 30/5 brei thau, Ngoại trưởng Nga Xéc-gây La-vơ-rốp meda hu mbang nao rivang Triều Tiên tui panuac daa di Ngoại trưởng Triều Tiên Ri Yâng Hô (Ri Yong Ho). Yau nan min, hãng ini oh brei thau tukvak ong La-vơ-rốp nao tal Triều Tiên saong makna di mbang nao ravang. Bruk brei thau ka mbang ravang rah tabiak dalam vaktu, Mỹ - Triều Tiên daok caga ka bruk taom gaok tabung glaong Mỹ-Triều tui kuhria rah tabiak harei 12/6 anak tal di Xinh-ga-po.

# Hajan khang kayua ribuk cận nhiệt đới An-béc-tô (Alberto) ngak brei jaleih haluk saong gluh baok di bhum kreh saong bhum pai Cu-ba, ngak klaoh ralo jalan, ngak jaleih sa baoh tatua, ngak brei sa sang mac halang menyek padeih ngak bruk. Tui Jabat tasik praong saong Khí quyển negar, bilan hajan ribuk thun 2018 angaok Đại Tây Dương tui kuhria meda rah tabiak meng 10 tal 16 mbang ribuk nhiệt đới, dalam nan hu meng 5 tal 9 mbang ribuk meda jeng ribuk khang tagok tal pakat 3, hu ngin khang tal 178 km/h.

# Akaok mentri Quốc phòng Mỹ Giêm Ma-tít (James Mattis) brei thau, Mỹ daok caga dom kadha bo Oa-xing-tơn brei thau lac bruk quân sự hóa di Trung Quốc ngan haong dom pulao kaoh di bhum tasik Đông. Panuac di Ngoại trưởng Mỹ oh caik hatai tal bruk Trung Quốc lên án bruk ngak di hải quân Mỹ dalam khu vực puac adit tapa. Ong Ma-tít jeng brei thau ong meda hu dom baoh panuac khang jang ngan saong Trung Quốc tuk ong nal tal Xing-ga-po hu mbaok dalam diễn đàn an ninh Đối thoại Xăng-gờ-ri-la (Shangri-la) dalam puac adit ini./.