Khaw tin 6h30 harei 6/2

# Thứ trưởng Mintri Ngoại giao Vũ Hồng Nam, Chủ nhiệm Ủy ban Karja ka urang Việt Nam daok di taneh ia lingiu brei thau: danak dak Xuân Quê hương 2018 hu angan ieu lac “Việt Nam hadah hadah harei hadei” hu peih tabiak di harei 7/2/2018 (lac harei 22 bilan Mat thun sak menuk) di Hà Nội. Urak ini, yaok ribau  urang VN daok di negar lingiu hu tut angan pataom mbaok tame danak dak thun 2018. 

 # Tui mintri ngak nong saong patagok palei pala, bilan 1/2018 darak pasal padai brah di dom tỉnh bhum taneran kraong Cửu Long gindang jua, rilo puk palei abih padai that, yaom padai takik trun tagok. Min, rilo kaya nong karei tagok yaom kayua hu darak pasal Tết Nguyên đán blei rilo. Tui hệ thống tabiak yaom di puk palei, yaom padai di dom tỉnh bhum taneran kraong Cửu Long yau di Vĩnh Long, padai thu dang di yaom  5.300 đồng/kg...

# Dalam bilan jaik tal Tết Nguyên đán, yaom pabui ralo tagok hasit. Min tapa nan urang raong jeng oh ka hu laba, nan ye oh khin raong veik. Di dom tỉnh ban gah meraong yau Đồng Nai, Bình Dương, ban raya Hồ Chí Minh, yaom pabui ralo meng 30.000 - 33.000 đồng/kg, tagok 4.000 đồng/kg dut saong bilan dahlau. 

# Uan Tết Mậu Tuất 2018, gam saong bruk tanyi ravang alin pandap ka dom sang buh pren yavca ka taneh ia, dom urang sarak karja, uy mban bhapbini huyện Chư Sê, tỉnh Gia Lai hu jak ba dom doanh nghiệp, urang hảo tâm rik daong yaok rabau paok pandap, yaok paok yaom meng 300 tal 500 rabau đồng hu brah ndiuk, ahan keo, menyek mbang…piah alin ka dom sang kathaot dalam huyện hu raok Tết anek thak thau. Amuk Lê Thị Ngọc, Trưởng phòng Lao động Thương Binh saong Xã hội huyện Chư Sê brei thau: “ Hội chữ thập đỏ huyện hu jak ba saong daong 1 rabau paok pandap ka sang kathaot dalam huyện, Gilang pariak Sacombank daong 200 paok pandap ka sang kathaot, Công ty Cao su Chư sê, siêu thi Coopmart jeng hu dom paok pandap daong ka dom sang kathaot, abih di nyu nan lac urang bangsa takik di bhum atah bayah piah mikva hu tết trei sir. Huyện oh caik ka sa sang halei eik saong oh hu Tết” 

# Urak ini, dom doanh nghiệp ngak mbang, pablei salih, pablei lẻ di Bình Dương hu pabak ka darak pasar Tết yaom pandap abih tih jaik 759 tỷ đồng, pabak dalam 2 bilan dahlau saong hadei Tết (rilo jang 25% dut saong thun  2017).

Khaw tin dunya

#Đông Nam Á daok jeng darak pasal dui pachreih dom gah ngak alak Soju di Hàn Quốc tuk alak brah danei angan di negar Kim Chi dak harei dak hu urang bhapbini di dom taneh ia ini takre. Tui Lotte Chilsung Beverage Co. - tập đoàn ngak ia giải khát di Hàn Quốc, meng bilan 2/2018, doanh nghiệp ini hu peih bruk pablei tabiak dom janih pandap đặc trưng hu angan Soonhari tapa darak pasal Thái Lan saong Việt Nam.

# Rajaei Iran daok kham merat ngak rilo jalan piah pacang ô nhiễm trak urak ini di ban ine Tehran saong dom bhum jaik taphia. Dalam harei 5/2, taong abih dom sang bac tiểu học di Tehran hu adat brei kreik pabah mbang piah khik caga siam mekre pren yava diu dom anek saih

 # Không quân Ấn Độ saong Mỹ daok patagok talei pambuak bruk kayua kein laba di dua taneh ia di bhum Ấn Độ Dương - Thái Bình Dương.  Tướng Goldfein taong yaom Ấn Độ lac "gah pambuak bruk praong” di Mỹ dalam tuk nao duah dom “giá trị” haong gauk dalam bhum./. 

Thúy Linh/VOV-TPHCM