#Mesup harei ini 5/7, di Hà Nội, Thủ tướng Nguyễn Xuân Phúc hu mbaok dalam nyaom biai pataom iek veik bruk ngak di Ủy ban Công tác ka dom kapul lingiu rajaei negar lingiu tukvak 1996-2017. Tapa labaih 20 thun ngak bruk, Ủy ban công tác di dom kapul lingiu rajaei negar lingiu hu tui kajap dom sarak di Đảng, hukum di karja, kham merat peih ngak dom bruk hu jao brei; samnar ba tabiak saong pok panuac tagok Thủ tướng rajaei dom sarak, jalan ngak…pambuak tal bruk ngak di kapul liungiu rajaei negar lingiu. Urak ini, Việt Nam hu talei pambuak bruk haong labaih 1.000 kapul lingiu rajaei negar lingiu, dalam nan hu jaik 500 kapul ngak bruk gam gam di Việt Nam saong yaok thun daong labaih 3.000 danak dak, dự án saong jien daong, lac labaih 4,3 tỷ USD oh bayar veik dalam 20 thun tapa.

#Tui Tổng Công ty Điện lực miền Trung, dalam dom harei akaok bilan 7 ini, sản lượng điện kuhria rah tapa yaok harei jaik 60 triệu kWh, tagok 12% duk saong dom bilan ini thun dahlau. Pandiak bhang dui atah gam saong tukvak rah tabiak Vòng Chung kết caoh blaong dunya - World Cup 2018 yau nan ye bruk pandar menyek tagok glaong. Dom libik di tỉnh Thừa Thiên - Huế rah tabiak bruk quá tải mac biến thế, ba tal sự cố. Piah khik caga nguồn điện duh ka ngak mbang ngak hoak, pala drak, Tổng Công ty pandar dom libik thành viên peih ngak sumu gauk dom bruk: peih điện ka dom công trình menyek dahlau di bilan thu 2018 saong oh cakak menyek dalam dom harei pandiak bhang.

# Pambuak tal bala trak angaok kraong Sài Gòn ngak brei 2 urang lihik, tal 10 tuk page mesup harei 5/7, dom gah chức năng di  TPHCM jeng daok kham merat duah min oh ka duah mboh 2 urang lihik. Thượng tá Nguyễn Văn Công, Phó trưởng Phòng Cứu nạn, Cứu hộ di Cảnh sát caga khuah, padam khuah TPHCM  brei thau, labaih 30 tuk tapa, dom thợ lặn hu nyuk duah gam gam aala ia saong tame dalam sàn lan kram, nyuk duah di dom labik jaik taphia  min oh ka duah mboh. Tukvak ini, ia di kraong Sài Gòn hu 2 mbang nduac nao, mai, kayua yau nan ye bruk duah hu salih tapa jalan ngak karei..

#175 urang daok dalam angan hu huyện Vạn Ninh, tỉnh Khánh Hòa  ba tabiak daong hadei di rabuk ka 12 (bilan 11/2017) ngan saong paok jien abih tih 23,7 tỉ đồng njauk yah klak kayua oh ginup điều kiện tui adat hukum. Kayua dalam tuk padang angan khat lihik hadei di rabuk, dom urang dang akaok xã, ban sit oh ka thau cambaih dom quy dinh di nghị định 02 rajaei ka daong khat lihik kayua bala, ba tal ngak suan. Tui UB bhapbini huyện Vạn Ninh, hadei di tuk klaak,, paok jien nan hu bayan veik kadung jien karja.

# Harei 5/7, Pasak y tế dự phòng tỉnh Cà Mau brei thau, tapa xét nghiệm di Viện Pasteur TPHCM mboh lac urang ruak angan Tr.V.Ch. (69 thun, daok di ban sit Trần Văn Thời, huyện Trần Văn Thời, Cà Mau) metai kayua njom A/H1H1. Dahlau di nan, harei 28-6, ông Tr.V.Ch. hu ba tame sang iek ruak đa khoa Trần Văn Thời dalam pandiak glaong, patuk. Hadei di tuk iek ruak di labik ini mboh oh cadu, ong Ch. Hu ba tagok sang iek ruak Đa khoa Cà Mau piah iek ruak. Pak ini, ong Ch. hu chẩn đoán lac viêm phổi trak saong hu pasang iek cúm A. Tal harei 30-6, ong Ch. Metai.

# Bair harei 4/7, urang dang akaok sang iek ruak Phụ sản Cần Thơ brei thau bruk cấp cứu hu siam mekre ka sa anek kamal kumei trak 740 gram. Hu thau, amaik di adei bahrau metain adei  hu 25 adit. Tuk ndih tapui tabiak, rup adei tím jhuk, padheih suak yava, oh megei hagait. Tuk hu ba nao tal khoa Sơ sinh, adei hu bác sĩ brei ngak hồi sức tích cực, daong suak yava meng jamriak min suak yava oh hu, mboh lac kan diuk hu. Ini lac mbang akaok mereip sang iek ruak Phụ sản Cần Thơ ba tangin tame meng pandar kỹ thuật Lisa, pambuak haong thở áp lực dương hamiet, daong ka pren yava anek kaman hu siam veik. Urak ini adei mam hu ia tasau amaik saong daok hu tui iek di khoa Sơ sinh.

Khaw tin dunya

# Karja tỉnh Hải Nam, Trung Quốc brei thau, biar harei, sa sruh kapal haoh đổ bộ sit di sa cty hàng không taneh ia ini gaok bala saong laik trun danao ia dalam tuk daok pato pasram, ngak ka 1 urang peih kapal haoh metai saong 1 urang peih kapal haoh karei lahik. Makna di bruk nan daok hu duah thau, ngak brei cambaih laih.

#Pasak khik ramik hòa bình saong trật tự Thái Lan hu ba tabiak jalan daong 8 bước kapul caoh blong “Lợn Hoang" daok gar meng harei 23-6. Tui nan, hadei di tuk dom urang gaok bala hu ba tabiak truh pabah hang, 12 adei sit saong huấn luyện viên di dom urang ini hu pakon meng cáng piah takik tổn thương. 13 radaih cứu thương hu ginup trang thiết bị, bác sĩ saong y tá yaok radaih hu ba mai saong caga raok dom urang gaok bala. Hu 3 jalan ngak daok hu iek veik: khoang tapak trun tabung hang piah ba đội caoh blong tabiak lingiu; piah urang gaok bala lui ia; atau cang ia trun abih. Dalam dom jalan ngak nan, jalan ngak piah urang gaok bala lui ia saong lui tabiak lingiu daok jeng pilih ruah ka sa.

# Urang brei panuac di jabat di cư Liên hợp quốc brei thau, jaik 9.000 menuac di cư hu mai veik 30 taneh ia Phi saong châu Á meng Libya tui danak dak halan hatian mai veik palei negar dalam 6 bilan tapa. Jaik 20 rabau menuac hu jabat ini brei nao veik palei negar dalam thun 2017.  Tui kuhria mboh dahlau, meda hu 30 rabau menuac nao veik palei negar dalam thun 2018./.