Khaw tin 6h30 harei 8/2/2018

           # Dom gah jalan mbak pajeng ba, công an giao thông, trật tự tỉnh Thừa Thiên - Huế bahrau pambuak bruk haong Công ty cổ phần bến xe Huế tabiak bruk khik caga pajeng ba tuai damuai siam mekre salamat tuk Tết Mậu Tuất. Tui nan, tuk tết ini, tỉnh Thừa Thiên - Huế ieu pataom labaih 500 radaih pajeng tuai, rilo jang jaik meteh dut saong yaok harei karei

# Tui Sở Giao thông Vận tải Đồng Nai, piah khik caga ka urang bhapbini nao palei hu siam mekre, plaih bruk jhik tuai tuk Tết Nguyên đán 2018, Đồng Nai brei 155 sruh radaih dự phòng ngan saong 5.000 libik daok cang pajeng tuai quá tải. Tuk dom radaih nduac tapa tỉnh, meyah mboh radaih pajeng rilo menuac urang tapa quy định, gah chức năng meda ba tuai tapa radaih daok caga, ba dom urang nan nao palei. 

 # Sacombank dhar Bình Phước pambuak bruk haong Sở Lao động - Thương binh saong Xã hội tỉnh peih danak dak “Ấm tình mùa xuân - Mậu Tuất thun 2018”.Tui nan, Sacombank hu alin hadiah 230 pok pandap yaom abih tih 100 triệu đồng brei ka urang taha daok sa drei, uraniah metui, jaoh jo daok dalam tỉnh. Danak dak thun 2018 hu peih tabiak meng harei ini tal abih harei 11/2 di 63 tỉnh, ban dalam taneh ia saong yaom jien piah ngak abih tih lac 11 tỷ đồng.

# Rilo bilan ini mai, dom sang raong pabui di Trà Vinh njauk khik veik tapol pabui raong di sang ngan saong hatai jia lac yaom pabui hơi meda tagok tuk Tết Nguyên đán ini piah pabak veik dom khat lihik dalam thun 2017, kayua yaom pabui trun bair. Min, dom harei jaik si Tết, yaom pabui hơi dalam tỉnh Trà Vinh jeng oh tagok, tok 27.000-29.000 đồng/sa kg. Tui yaom ini, urang raong glang njauk khat veik meng 700.000-900.000 đồng/sa tạ (100 kg). 

# Tui Sở ngak nong saong patagok palei pala tỉnh An Giang, urang nong dalam tỉnh trun pajaih hu bloh labaih 233.402 ha padai vụ Đông Xuân 2017-2018, samut 98 % bruk dalam vụ, samu haong bruk trun pajaih di tukvak ini thun bloh. Chi cục khik caga phun pala tỉnh An Giang jeng hu panuac kakei mikva urang ngak nong caik hatai tal dom janih palai kaik padai, abih di nyu nan lac takuh. Lingiu di nan, urang ngak nong njauk sangka ngak taneh dahlau di tuk trun pajaih, piah khik hu glaong năng suất saong sản lượng vụ padai Đông Xuân 2017-2018

Khaw tin dunya  

         # Philippines hu blei 16 sruh kapal ahaok trực thăng Bell 412EPI di Bell Helicopter piah pasiam patagok gah không quân di taneh ia ini. Harak pambuak bruk blei ini hu mbaoh tangin dalam mbang parng iek hàng không Singapore di Bell Helicopter (Mỹ) saong Philippines. Ini lac bruk pablei salih dalam bruk hiện đại hoá bol bala Philippines hu angan “Tầm nhìn 2”.

         #Rilo urang lambaok ka Liên hợp quốc hu mbaok di Xy-ri  (Syria) hu panuac ieu padeih cuh chip di Xy-ri piah ba pandap daong ka bhap bini taneh ia Trung Đông ini. Hu thau, bruk mesruh gauk dui atah jaik 8 thun tapa di Xy-ri ngak ka labaih 340 ribau menuac metai, 7 triệu menuac njauk nduac klak sang danaok nao daok labik karei dalam taneh ia, saong  5,3 triệu urang nduac tapa rilo taneh ia karei. Dalam tuk nan, 10 triệu urang karei daok daok dalam kan kandah saong mbuan metai lihik

# Barau ini, yaok ratuh urang trun jalan Nam Sudan ba gauk nao angaok jalan phố di ban ine Juba piah phản đối bruk Mỹ ba tabiak lệnh pakauk pjeng ba phao ndao ngan saong taneh ia Đông Phi daok dalam bruk mesruh metak dui atah luac 4 thun tapa. Dom urang trun jalan hu panuac lac bruk ba tabiak di Mỹ lac sa bruk mesruh veik saong chủ quyền di Nam Sudan./.

 Thúy Linh/VOVTPHCM