# Phó akaok negar Đặng Thị Ngọc Thịnh barau mai rivang , alin hadiah pandap ka baoh sang amaik VNAH Lương Thị Định hu pasang saong anek lac liệt sĩ; alin hadiah 4 baoh sang anit ranam (yaok baoh sang yaom 50 triệu đồng saong 1 ti vi sambo)  saong 30 paok pandap (yaok paok yaom 2 triệu đồng) ka dom baoh sang sarak karja hadah krah, baoh sang hu buh pren yava ka cách mạng di dom xã Đông Thạnh, Đông Thành, ban sit Bình Minh, tỉnh Vĩnh Long. Di yaok labik mai rivang, alin hadaih pandap, phaok akaok negar Đặng Thị Ngọc Thịnh hu tangi sua, pachreih ba dom baoh sang sarak karja yam tapa kan kandah, yam tagok dalam rai diuk.

# Dalam tuk pahadar 70 thun harei Thương binh Liệt sỹ (27/7/1947 – 27/7/2017), Tỉnh ủy Tây Ninh barau peih bruk pahadar 70 thun harei Thương binh Liệt sỹ saong pok meyaom urang buh pren dalam tỉnh, taom gaok dom kreih camin hadah trah. Di var taom gaok, Tỉnh ủy Tây Ninh hu ba tabiak quyết định di akaok taneh ia ka bruk truy tặng angan amaik Việt Nam anh hùng ka lambaok sang di 9 amaik saong alin huân chương độc lập hạng Nhì, hạng klau ka 31 sang; pok meyaom 117 urang buh pren hadah trah jeng ye taom gaok dom kapul nyaom saong urang hadah trah. Ông Trà Văn Đực, xã Lộc Thịnh, huyện Bến Cầu, sa dalam dom urang hadah trah hu pok meyaom, brei thau: Lac bộ đội mai veik palei ku karja sangka daa mai ini dahlak biak chreih bui. Tuk nan, thương binh phục viên mai sang jeng hu ngak mbang, daong urang kathaot, daong pandap  ka đồng đội. Meyah đồng đội oh hu taneh padang sang lac daong taneh piah ngak sang.

# Tui lambaok Sở Y tế Hà Nội, meng akaok thun tal ini hu labaih 6 ribau 700 urang ruak pandiak tabiak drah. Mbiah tal urak ini jit ruak jeng daok patagok saong hu urang metai. Jit pandiak tabiak drah daok rah tabiak kan kandah urak ini, makna nan lac kayua bilan hè pandiak, hajan ralo, jamuok caih mebaoh ralo. Dom labik mblang taneh klak tasaoh, labik sang oh ka hu menuac daok, công trình padang ngak kandaong ia…jeg labik ka jamuok caih anek. Dom jalan pacang cakak urak ini ralo meng lac tui iek, duah urang ruak, pathau khan, peih bruk pametai jamuok, bọ gậy. Urak ini jeng oh ka hu jalan đặc hiệu yau vắc xin atau jru pasiam ruak.

# Kayua ribuk ka 4, rilo jalan đê bao nội đồng  di tỉnh Thừa Thiên-Huế jaleih tayah; atah abih tih labaih 300 mét. Hajan praong jeng ngak ka jaik 2.000 héc ta padai hè thu dauk ia meng 2 tấc tal 3 tấc. Dom puk palei daok kuac cống rãnh, tathuak ia ka padai. Di dom xã bhum tasik, kayua ia tagok glaong hadei di ribuk ka 4, rilo jalan đê tasik daok glut jaleih dalam tame mbaok haluk. Urak ini, tỉnh Thừa Thiên Huế hu tacei pato dom puk palei, libik thi công, abih di nyu nan lac dom po đầu tư tui iek dom labik daok thi công glut jaleih jeng ye dom đê kè di tapeng tasik. Hu jalan ngak piah khik caga siam công trình jeng ye an toàn ka tính mạng, drap ar di urang bhapbini.

# Ủy ban bhap bini tỉnh Ninh Thuận barau tacei Bộ Chỉ huy Quân sự tỉnh gam saong dom đơn vị pambuak tal samar ngak cambaih laih bruk patuh pambuak tal sruh kapal haok quân sự di khu phố 1, phường Bảo An, ban Phan Rang – Tháp Chàm, taphia di nan peih bruk nao rivang, trấn an bhap bini njauk rambuah saong jaleih sang danaok. Tui kuhria mboh, hu abih tih 9 baoh sang khut kayua patuh. Anak meta, UB bhap bini phường Bảo An hu daong 2 triệu đồng ka yaok baoh sang. Trung đoàn không quân 937 đóng di Ninh Thuận jeng hu mai pasang iek  saong daong khat lahik ka dom baoh sang.

# Sa adit dahlau di tuk tapa Nhật Bản pasram, huấn luyện viên trưởng Mai Đức Chung pataom tame pasiam ilamu chiến thuật ka dom tuyển thủ urang kumei negar. Tui taong yaom di Ban huấn luyện, dom cầu thủ kumei dak harei dak brei mboh bruk tani tanat dalam chiến thuật, ngak tui đấu pháp, gheih jang dalam tấn công, pacang đối phương caoh tame. Tui bruk ba tabiak, đội tuyển kumei negar meda tagok jalan nao pasram di Nhật Bản di harei 01/08 tal saong huấn luyện viên trưởng Mai Đức Chung jeng chốt danh sách dahlau di mbang pasram ini. 

Patui di ini dom khau tin dunya:

#  Bruk karja Tổng thống Mỹ Đô-nan Trăm oh brei urang Mỹ du lịch tal Triều Tiên oh ngak kan kandah tal gah DL di taneh ia ini. Nan lac panuac ndom di sa urang ngak praong TT ba tabiak harei 25/7, dom harei hadei di tuk lệnh cấm hu khan tal dom hãng lữ hành Mỹ. Kayua dalam jaik 5 ribau tuai damuai phương tây mai tal TT yaok thun, tok hu 20% lac urang Mỹ saong dom mbang nao bhian oh pandar labaih 2 ribau đô la. Ong Hanchôn-sun ndom lac, jalan ngak di Mỹ tok di ngak khat lahik ka dom hãng lữ hành Mỹ saong bhap bini Mỹ lahik quyền tự do du lịch jeng yau duah thau ka Triều Tiên.

# mintri Tư Pháp Thái Lan barau tabiak quyết định brei kareik dom tài khoản gilang pariak di urang dahlau thiah ngak Thủ tướng Dinh-lắc Xin-na-vắt pambuak tal paok jien phạt 1 tỷ đôla ka dom khat lihik kayua danakdak daong yaom brah  tukvak rajaei di amuk ngak. Kapul luật sư di amuk Dinh-lắc hu nop đơn kháng nghị tagok tòa án tuk tabiak panuac lac brk ngak nan ngan haong urang dahlau thiah ngak Thủ tướng lac suan hukum. Tui kuhria, Tòa án tối cao Thái Lan meda ba tabiak bản án chính thức ka bruk ini di harei 25/8 tal.

# Urang ngak praong gah y tế Mi-an-ma ndom lac taneh ia ini barau hu gilac 2 urang metai kayua vi-rút cúm pabui H1N1 saong labaih 10 urang njaom ruak. Jeng dalam harei nan, mintri Y tế Mi-an-ma brei thau 13 urang karei njauk dương tính hong vi-rút H1N1 saong daok hu iek ruak đặc biệt. Anak bruk duh hatai ka vi-rút H1N1 mai veik mbuan tamuh jeng jit saong njom mbak, mintri y tế Mi-an-ma ieu bhap bini hu dom jalan ngak pacang cakak saong mai khám di dom labik y tế meyah mboh dom medil. Mintri y tế Mi-an-ma brei thau hu panuac ieu bruk daong di gah y tế dunya kayua urak ini taneh ia ini oh hu vắc-xin pacang cúm H1N1./.