Meng ini tal harei 20/11, 28 bhum palei palei brei langyah sumu gauk dom gilai ikan oh ginup harak gal, gilai ikan oh daok mbaoh harak min daok ngak bruk. Tỉnh Cà Mau hu peih ngak taka so dom gilai “ 3 saoh” saong dom gilai mbuan ngak suan hukum. Labaih 1.500 gilai taong chap ikan labik tasik atah di tỉnh daok hu tui iek catang. Mentri Ngak nong saong patagok palei pala jeng hu eiw dom bhum palei kuhria iek veik taong abih, ngak salah bruk sarak taong abih gilai ikan, cih taka so tut angan gilai ikan tame tabiak tasik, pataok tame atau tabiak tapen tasik, oh ngak suan gilac bo kapol urang jakar Thanh tra di UB chau Au hu duah mboh  di tapen ikan Tân Phước, tỉnh Bà Rịa - Vũng Tàu meng blaoh.

Mentri Ngak nong saong Patagok palei pala bahrau jao danak dak Brong ribaong ia Nguyễn Tấn Thành ka Kong ti Khai thác thủy lợi Tien Giang pasang iek, ngak bruk pacang njom ia mbak, ia ndik di bhum palei. Tui nan, tuk njom ia mbak glaong meng kraong Tiền tame, brong ribaong kraong Nguyễn Tấn Thành brei kareik brong pasak saong brong kapal gilai. Yaom lac brong kareik piah pacang njom ia mbak min bruk di brong kapal gilai jeng khik kajap ka dom sruh gilai nao mai tapa brong. Abih di nyu nan lac, danak dak ini daong Tien Giang oh hu lahik yaok rituh ty dong piah ngak banek pacang njom ia mbak yaok thun.

Huyện Giồng Riềng, tỉnh Kiên Giang daok hu rilo bruk patagok mboh di meta meng tuk peih ngak siam Danak pakat negar patagok kinh te - xa hoi di bhum urang bangsa takik sang bhum ceik 2021 -2030; vaktu I: meng thun 2021-2025. Danak dak ini hu makna biak praong dalam ngan haong raidiuk urang bangsa takik, salih birau ralo ye jalan mbak saong patagok  dom bruk ngak kinh te khang kajap. Thun 2023, baoh sang kathaot dalam bhap bini daok 1,23%, ngak brei salih birau khang kajap  suai lavik di mikva. Huyen kham merat tak thun 2029 jien mek tame kuhria tui yaok manuac  di bhum urang bangsa takik lac 62 trieu dong sa thun.

Palei Cầu Gãy saong Đá Hang, xa Vĩnh Hải, huyen Ninh Hải, tinh Ninh Thuận hu mikva bangsa Raglai, dom baoh sang kathaot daok rilo, min urak ini, raidiuk di mikva hu salih birau. Di palei Đá Hang oh daok bruk radak palakhah ka anek saong khin likei kamei jaik but pajaih. Labaih meteh baoh sang hu sang daok laneing lanoi sa-at mat, dalam nan hu 35 baoh sang padang hu sang khang kajap. Hu jak jeng nan lac meng karja palei ngak samu dom sarak bangsa. Dalam thun 2023, xa Vĩnh Hải padang jalan ngak gah phun jien ngak mbang, ngak dom sarak bangsa lac 8,5 ty dong; phun jien meng Danak dak jalan ngak negar patagok kinh te - xa hoi bhum mikva bangsa takik saong bhum ceik labaih 1 ty dong.

Tỉnh Trà Vinh hu 143 baha Phật giáo Nam tông Khmer, jaik abih hu peih bruk pato akhar huroh Khmer oh mek jien di bilan padeih hè, ngan haong 900 tal, pachreih hu labaih 20.000 anek saih tui bac. Langiu pato akhar huroh dalam bilan hè, gah Pato megru tỉnh Trà Vinh hu ba danak dak tame pato huroh Khmer  ka dom labik pato pakai dalam tỉnh. Kuhria rah tapa yaok thun bac, tỉnh hu labaih 100 labik pato bac pho thong hu peih tal pato akhar huroh Khmer ka labaih 800 tal saong 19.000 anek saih.

Mon 14 tuk kreh pandiah harei ini tui mon Viet Nam, bruk pilih ruah Tong thong di Mỹ hu salah blaoh, ong Donald Trump di Ndang Cong Hoa mek hu 270 phieu janeh phaok Tong thong Kamala Harris di Ndang Dan Chu. Tong thong dahlau daih Donald Trump meblah hu rilo phieu di cu tri tui hukum ba tabiak piah hu jeng tong thong ka 47 di negar Mỹ. Tui kuhria mboh dahlau, dom cu tri di dom mbang brei nyaom ginum di 17/12 anak tal piah buh phieu pilih ruah ong Trump ngak veik Thong thong di negar Mỹ. Ong Trump brei tuyên thệ tagok rai di mbuan Capital di harei 10/1/2025.

Dom urang roh duah negar Trung Quốc caga jaik yuak padai rai ka 3 meng asar pajaih hu ba mai meng mbang patagok langik vu tru di thun 2022. Mbang padai ini hu tukvak praong labaih 100 harei di sa labik pabam pajaih saong pala di Thượng Hải. Dom urang ilamo brei pabam pajaih ini veik dalam duk bilik nhan tao piah mek hu rilo asar pajaih jang dahlau tuk trak di hamu. Bruk nan brei mboh mbang akaok meti Trung Quốc  ngak iek hu salah bruk pala padai pajaih angaok langik tal tuk yuak.   

Jabat Khik ramik Drap ar Langik tasik di Indonesia brei thau, sa drei “lamen anek” hu menek tabiak di bein bingu Buluh Cina di Riau angaok kaoh pulao Sumatra, ngak parilo anek lamen meda mbuan lahik saong daok hu pacang khik catang ini. Indonesia lac labik diukrai di dom janih lamen daok mbuan lahik, abih di nyu nan lac lamen Sumatra. Tapol lamen ini daok patui veik bruk kurang kayua lahik labik diuk di nyu, bruk urang menuac pametai anek athur saong bruk man patauk./.