3 bilan akaok thun ini mai, dalam taneh ia hu 23 urang metai kayua ruak gila maroi. Anak bruk ruak gila maroi daok mbuan rahtabiak saong ba tal metai manuac lac biak glaong, Thủ tướng Rajaei hu Sarak paglaong dom jalan ngak samar drah piah pacang caga ruak gila, maroi. Dalam tuk nan, ieu kakei dom po raong asau, mreo ngak njauk bruk raong kareik dalam sang, khik bruk klauk jru lac labaih 70% taong tapon, bhian pasang iek, klauk jru pabak, plaih var klaak asau, mreo, oh caik ka asau nduac ban glai ban glo, tuk ba asau tabiak langiu brei cuk, pacang  cambuai saong hu manuac dui, klauk ginup vaccine pacang caga ruak gila, maroi.

Tui LĐLĐ TPHCM, kadha praong dalam dom bruk di “Bilan urang ngak” thun ini, lac dom pakat Công đoàn TP.HCM meda taom gaok, ndom biai nao  mai haong menuac pandar urang ngak ka bruk ngak, jien bilan, jien thưởng, phụ cấp độc hại saong labik ngak siam mekre salamat di urang ngak, peih dom bruk ngak "dhar phor urang ngak ".  Jeng dalam bilan urang ngak ini, LĐLĐ kuhria buh tabiak 30 tỷ đồng brei ka dom bruk iek glang đoàn viên haong urang ngak, dalam nan hu alin hadiah 10.000 pok pandap brei ka dom đoàn viên sang kan kandah, peih dom "darak anit ranam" haong rilo labik pablei pandap trun yaom ka urang ngak. 

Urak ini hu labaih 25 tấn pa-aok Đồng Tháp hu mbaok di dom siêu thị Co.opmart dalam taneh ia. Di TPHCM, yaom pablei dom janih pa-aok meng 11.200 - 30.000 đồng/kg, gam tui di nan, hu janih trun yaom tal mateh. Tui Sở Công Thương Đồng Tháp, bruk ngak ini piah daong ka dom doanh nghiệp, hợp tác xã, kapul pambuak gauk, labik ngak di dalam tỉnh padang thaot bingu, yaih khan, angan je pa-aok Đồng Tháp tal urang blei. Gam tui di nan jeng peih praong darak pasa pablei salih, pabak tui hatai caong di darak pasa dalam saong langiu  taneh ia, dak harei dak pamaong tal bruk pala saong duah jalan pablei tabiak  pa-aok Đồng Tháp lagaih haong hatai takre di urang blei.

Urak ini, baoh lamut, daok ieu lac sa pô di tỉnh Tiền Giang daok hu yaom glaong, lamut pajaih Mặc Bắc yaom meng 15-20 rabau đồng/kg; lamut Mehico yaom mangaok 70 rabau đồng/kg. Tui yaom ini, urang pala bein hu laba glaong. Yaok ha taeh pala lamut, yaok thun mek jien tame hu labaih 300 triệu đồng. Tỉnh Tiền Giang hu bruk pala lamut pablei dalam labaih 30 thun tapa, ngan haong 1.500 ha. Duk haong 11 janih phun mbang baoh karei hu pala rilo dalam tỉnh, lamut lac janih phun mbuan pala, hu baoh pablei luac thun, tamuh hu di taneh njaom ia mbak.

Mintri Công an hu jao harak quyết định brei tagok bậc hàm meng Thiếu tá tagok Trung tá ka liệt sỹ Nguyễn Xuân Hào urang jakar di Kapul Cảnh sát jalan mbak Công an huyện Đức Hòa, tỉnh Long An  metai tuk daok ngak bruk cap khik kol tội phạm ma túy rahtabiak di harei 21/4 bahrau blaoh saong jao paok jien 100 triệu đồng meng kadung jien “hatai anit ranam di ayuh saat di kapul Công an nhân dân” ka gauk gar di liệt sỹ Nguyễn Xuân Hào. Pambuak tal bruk ini, kapul chức năng tỉnh Long An pasang iek hu, cap khik pak di labik dua urang; pasang iek saong pataom mek 5kg janih madil lac ma túy patao, 4 asal medil lac heroin. Tapa  ngak bruk, kapul chức năng hu cap khik veik 3 urang karei, pataom mek veik 1kg janih medil lac túy đá saong 14kg asal medil lac heroin.

Meng bilan 5 tal bilan 8 anak tal, Campuchia meda gaok bruk di El Nino. Bilan hajan thun ini mai suai jang thun 2022, ia hajan jeng takik jang meng 20-30% ia hajan kuhria rah tapa yaok thun. Di akaok bilan hajan jeng bhian hu ngin rabuk, ngin khang. Abih di nyu lac bilan thun thun ini, Campuchia meda hu rilo mbang pandiak thu. Nan ye Mintri Kaya ia saong Khí tượng taneh ia ini hu panuac ieu dom mintri, dom gah, dom jabat saong yaok rahra, brei pandar ia patak pataom, abih di nyu lac di dom bhum palei pala daok atah di jalan ia.

Meng akaok thun tal urak ini hu labaih 2,4 triệu rahra Thái Lan caong hu daong y tế kayua njom ruak pambuak tal tachrauk alam langik tasik, taeng dalam adit blaoh hu jaik 200 ribau urang njauk tame sang iek ruak. Dalam thun 2022, Thái Lan hu mboh nồng độ dhul klik PM 2.5 tui kuhria glaong tal 3,6 mbang tui tanut brei adat ka chất lượng langik tasik yaok thun di gah Y tế dunya (WHO). Tui kuhria mboh di WHO jeng  mboh lac tachrauk nerak alam lac makna ngak brei labaih 31.000 urang metai saong ngak khat lahik jien padai tal labaih 63 tỷ USD di thun 2019 di dalam taneh ia.

kapul pasang iek duah thau hatai sahneng KOPRA Hàn Quốc tapa pasang iek mboh lac, jaik 60% menauc sia taneh ia ini dalam umo 20 saong 30 thun oh pachreih tui bruk yasa haong Triều Tiên, dalam tuk talei pambuak bruk 2 gah Triều Tiên saong dom bruk ginum biai oh hu hạt nhân daok ka oh hu jalan tabiak. Talei pambuak bruk 2 gah Triều Tien saong talei pambuak bruk di dom taneh ia ayut di Hàn Quốc saong với Triều Tiên daok catang tagok, tuk Bình Nhưỡng peih ngak dom bruk ngak iek vũ khí hạt nhân, bahrau di abih lac bruk cuh iek tên lửa đạn đạo liên lục địa Hwasong-18, ngak brei bruk kham merat yasa 2 gah Triều Tiên saong bruk oh hu hạt nhân di mangaok Bán đảo Triều Tiên laik tame labik oh hu jalan tabiak.