Melam 28/4, di Quảng trường ban Vĩnh Long, tỉnh Vĩnh Long peih ngak dalam praong prang Harei pahadar 290 thun padang Long Hồ dinh (1732-2022), 190 thun padang tỉnh Vĩnh Long (1832-2022), 30 thun padang viek tỉnh Vĩnh Long, 47 thun Harei peih Paha gah maraong, peih paha taneh ia saong taduan raok Huân chương Lao động Hạng Nhất. Ủy viên Mintri Chính trị, akaok Quốc hội Vương Đình Huệ mai hu mbaok saong brei panuac. Dut saong thun 1992, gah kinh tế tỉnh Vĩnh Long urak ini hu tagok tal 38,5 mbang; cơ cấu kinh tế salih tui njauk jalan; bruk patagok kinh tế tuk halei jeng hu khik di tanut tagok mbaih, kuhria jaik 7%/ thun; jien mek tame kuhria tui akaok manuac tagok tal 37 mbang. Bruk pablei salih dak harei dak hu siam tagok, tanut maraik gauk pakat tỉnh tuk halei jeng hu khik tani tanat dalam nyaom siam dalam taneh ia.

Pahadar 47 thun Harei peih paha gah meraong negar, yasa taneh ia saong 136 thun Harei Dungya Urang ngak, melam 29-4, di jalan nao takai Nguyễn Huệ, mBan peih bruk pahadar dom harei lễ praong TPHCM peih ngak danak dak daoh tamia ngan saong kadha Việt Nam dalam baoh hatai dahlak. Danak dak hu mbaok dom rilo nghệ sĩ Nhân dân hu angan yau ye: NSND Quang Thọ, NSND Trọng Hữu, NSND Thoại Miêu… Langiu di nan, di melam 30-4 haong 1-5, Sở Ilamu The thao TPHCM hu peih dom danak dak daoh tamia pamere bhap bini di: TP Thủ Đức, quận Tân Phú, quận Bình Tân; dom huyện Cần Giờ, Củ Chi, Bình Chánh, Nhà Bè, Hóc Môn.

Labik daok ka urang ngak di labik CX Linh Trung II bahrau hu peih bruk padang ngak. Ini lac danak dak sang daok xã hội camriep di gah maraong. Tukvak ka 2 di Danak dak hu 2 baoh sang glaong 12 tal ngan haong 360 căn hộ, padang ngak di mblang taneh labaih 5.000m2. Taong abih yaom jien buh tame tui kuhria lac labaih 408 tỷ đồng, pabak hu labik daok ka labaih 1.000 urang ngak. Urang ngak daok dalam labik nan hu mbang tui dom bruk yau ye: sang khik uranaih, labik pablei salih dịch vụ, labik main sambai. Tukvak 1 di danak dak hu buh jien tame ngak atah di ini 10 thun saong ba tame pandar labaih 350 căn hộ.

Tui pathau khan di Viện Pasteur TP HCM, ruak pandiak tabiak darah di bhum gah Meraong kuhria tal puac bilan 4-2022 trun 23% dom urang ruak dalam 100.000 rahra duk haong tukvak ini thun 2021. Min dom urang ruak trak saong metai tagok glaong duk haong tukvak ini thun blaoh. Ruak pandiak tabiak darah meyah samar thau saong samar taong ruak, mboh lac urang ruak takik metai. Dalam tuk jit Covid-19, urang metai kayua ruak pandiak tabiak darah meda tagok glaong kayua urang ruak bhian huac nao tal sang iek ruak, ba tal suai hu taong ruak. Kayua yau nan ye, dom amaik ame njauk caik hatai tuk uraniah mboh tyau ruak pandiak tabiak darah, tapa bruk lac pandiak glaong gam gam meng 2-7 harei saong hu dom tanut tabiak darah, sraiy darah tagei, darah dhung... njauk samar ba tal labik y tế piah hu iek ruak saong taong ruak samar drah.

Bị cáo Đinh Văn Hải (umo 48 thun, daok di xã Ninh Gia, huyện Đức Trọng, Lâm Đồng) bahrau njauk Tòa án Bhap bini tỉnh Lâm Đồng kaoh duas 5 thun guk, 3 thun tui iek di palei hadei di tuk tabiak guk ka duas “Ngak, khik piah, ba tabiak saong pathau khan khau tin, harak piah pacang caga Kanja Cộng hòa Xã hội chủ nghĩa Việt Nam".Tui pathau khan, meng thun 2011, Đinh Văn Hải bhian tagok dom blah mạng xã hội piah Livestream, vak saong ba tagok dom kadha vak hu asal kadha yaih khan, ndem jhak, pacang tayah Đảng, Kanja. Yaom lac hu rajaei pak ini pathau khan, kakei, min Hải jeng khang akaok peih ngak dom bruk ngak suan di drei. Di phiên tòa, Hải hu tapak hatai khan lac, brei mboh hatai thau bruk jhak drei ngak saong caong hu trun manieng bruk taong phat piah samar hu mai gilac haong raidiuk, rahra, ngak manuac siam ka taneh ia.

Harei kabroi (28/4), ban ine Bắc Kinh di Trung Quốc daok brei peih praong bruk dut iek rilo menuac di 1 quận tra, lac Diên Khánh, daok gah Tây Bắc ban ine Bắc Kinh ngan haong 350.000 rahra. Tal urak ini, Bắc Kinh tok daok 4 dalam 16 quận oh ka hu dut iek rilo, dalam tuk labaih 20 triệu menuac, nan lac 90% menuac sia daok veik daok njauk tame bruk dut iek meng harei 25/4. Dalam tuk nan, Thượng Hải rah tapa 1 bilan njauk pacang veik meng kraong Hoàng Phố, saong hu abih tih labaih meteh triệu urang dương tính hu khan brei thau kuhria meng harei 1/3.

Thủ tướng Nhật Bản Kishida Fumio meda hu mbang nao tal abih tih 5 taneh ia di Đông Nam Á saong châu Âu meng harei 29/4 tal harei 6/5. Tui jalan ba tabiak, kapul meda nao rivang In-đô-nê-xi-a, Việt Nam, Thái Lan, Italia saong Anh. Di mbang taom gaok haong dom urang par akaok di yaok taneh ia, ong Kishida Fumio kuhria lac meda ndem biai nao mai ka bruk pacang caga bruk mesuh metak di Nga haong Ucraina saong pambuak gauk piah ngak brei sa "Ấn Độ Dương - Thái Bình Dương tự do saong peih praong" dalam tuk Trung Quốc daok peih praong dom bruk ngak di mangaok tasik.

Tui kuhria mboh oh ka ginup abih di Cục Thống kê liên bang Đức, bruk lạm phát di taneh ia ini dalam bilan 4 tagok tal tanut 7,4% duk haong tukvak ini thun bloh. Ini lac tanut lạm phát glaong abih di Đức kuhria meng bilan Thu thun 1981 saong tagok jang 0,1% duk haong bilan dahlau di nan. Makna ba tal bruk ini, lac kayua pambak meng bruk mesruh Ukraine ngak ka yaom năng lượng saong pandap tamo tagok khang. Dalam bilan 4, yaom pandap mbang di Đức tagok 8,5% duk haong tukvak ini thun blaoh, dalam tuk yaom năng lượng, dalam nan hu năng lượng pandar dalam sang saong menyek jamriak tagok labaih 35%./.

Urang lang: Thu Thảo & M.P – 29/4/2022