UB Bhap bini Ban raya Ho Chi Minh bahrau khan ka Thu tuong ka bruk peih bruk srap gap padang dom dananak dak pahadar 50 thun Harei Peih paha gah Meraong negar, yasa taneh ia (30/4/1975 – 30/4/2025). Dalam nan, banah dieu binh dalam nan hu 36 kapul bol lin pan phao karaong, kong an kayua Mentri Bol lin saong Mentri Kong an pambuak gauk peih ngak. Banah dieu hanh patui veik kayua Ban raya Ho Chi Minh dang ngak dalam nan hu 12 kapul hu labaih 13.050 urang hu mbaok tame. Tal ini, Ban raya Ho Chi Minh hu tabiak jalan kuhria ngak khan dai haong 5.260 labik daok di urang lambaok vakil.

Taong kongti Jalan pasei Viet Nam brei peih nduac sa yau radaih hu angan “Doan tau Thong nhat” hu ngak karei, ndung mak inem mek sajarah. “Doan tau Thong nhat” hu peih nduac dalam melam mesup harei 29/4, radaih pui SE1 peih nduac meng ga Ha Noi saong SE4 peih nduac meng ga Sai Gon, gaok gauk tuk mon 12 tuk kreh pandiak harei 30/4 di ga Da Nang. Yau radaih pui hu ngak dom thaik thaot piah pamedeih gilac tukvak kalin kan mesuh metak yasa taneh ia, daong ka tuai damuai duah thau ka tukvak sajarah di taneh ia saong gah jalan pasei. Bingun ini, gah Jalan pasei trun 40% yaom harak ve ngan haong dom urang hu ngak bruk katmang meng kal dahlau…

Tinh uy Dong Nai bahrau peih pakak rup patau Tong Bi thu Lê Duẩn, di inem mek Trung uong Kuk gah Meraong (Labik kalin Đ, xa Mã Đà, huyen Vĩnh Cửu). Di var peih pakak, ong Vũ Hồng Văn, Bi thu Tinh uy Dong Nai brei mboh, rup patau Tong Bi thu Lê Duẩn hu padang di ini saong peih pakak praong prang di inem mek Trung uong Kuk gah Meraong (1961-1962) brei mboh hatai thau dhar phol rilo ka dom bruk jak jeng praong glaong di Tong Bi thu Lê Duẩn saong dom urang pan akaok tapa dom tukvak ngan haong taneh ia, haong bol lin, rahra gah Dong Nam Bo saong Biên Hòa-Dong Nai.

Page ini, jalan nding ba ia pandar meng jalan nding pasak meng jalan quoc lo 50 (o 1, labik 1, ban sit Chợ Gạo, huyen Chợ Gạo, tinh Tien Giang) pabak ia ka rahra xa Xuân Đông saong xa Hòa Định njauk pacah kayua labik pambuak pagam. Ia meng jalan nding pruh tabiak langiu biak khang, ia sraiy dauk jalan mbak, sraiy tame rilo sang daok rahra ngak khat lahik rilo. Urak ini jabat chuc nang hu mai pasiam bruk kan kandah ini saong duah thau khat lahik ngan haong rahra.

Tui Balai Kuhria Kraong ribaong tinh Hau Giang, harei ini saong harei paguh, rilo labik dalam tinh rah tabiak pandiak biak khang meng 35,5°C-37,5°C; di tabung glaong meda rah tabiak buc xa cuc tim, ngak kanjah jhak tal prein yava. Kayua nan tuk nao ngak bruk di langiu langik, rahra brei ba tui pandap pabang mbaok, khan me-om, kreih camin mat. Taphia nan, langik thu pandiak , tathah dalam yava langik biar nan brei caga apui khuah, patuh saong apui khuah glai. Ia nduac meng kraong Hậu oh hu ginup piah pabak ka bruk pandar saong pala drak nan mikva brei padang khik piah ia, pandar ia kali kalih…

Bruk kuhria hu di mbang pasang iek bahrau hu ba tabiak brei mboh jaik abih rahra Mỹ thei jeng duh hatai ka yaom kaom meda tagok kayua dom asal kadha jien je di Tong thong Donald Trump. Rahra Mỹ bhian hu hatai sahneng karei di gauk patui meta maong di yaok ndang. Meteh rahra hu tangi jaik abih lac dom urang daok dalam ndang Cong Hoa, dom urang nan njauk hatai haong hatai sahneng lac bruk pandik harao ka kinh te katut harei lac njauk hu piah daong negar Mỹ khang jang dalam harei hadei. Nan min dom urang daok dalam ndang Dan chu, oh njauk hatai haong hatai sahneng ini.

Hang khau tin Tan hoa xa di Trung Quoc bahrau ba khau tin, takik abih 20 urang metai dalam mbang apui khuah labik raong urang umo taha di ban Thừa Đức, tinh Hà Bắc. Tui karja palei, mbang apui khuah rah tabiak dalam mon 9 tuk di melam mesup kabroi (8/4). Urak ini dom urang praong thun umo karei dalam labik raong urang umo taha hu panduan nao tal sang iek ruak jaik nan piah patui veik hu pasang iek ruak saong taong ruak. Mbang apui khuah ini mai meng halei daok hu kapul chuc nang pasang iek duah thau piah ngak tantu cambaih laih.

Kapul ngak pahla Save the Children kakei dahlau ka bruk sron mbon salamat di Haiti daok biak jhak dalam bruk dom kapul urang pan phao karaong dak harei dak sanak, peih praong saong pasiam bruk pasang iek tabiak langiu di ban ine Port au Prince. Dalam 3 bilan tapa, labaih 78.500 urang di Haiti hu tabiak truh di sang panduan nao labik karei. Dalam nan, uranaih daok gaok kanjah jhak trak saong brei hu daong samar drah.